1Khulankha khuntti yooshi khunthuula Yinsa khusala anlawana wa Pilaatu.
2N'oofiya khusala anlokoveza yoori: “Nansikana otu awaalikhisaka atthu etthu oripha lumpuru la Seezari, khusala ajilupeza yoori ti Al-Masiihu na mfwalume.”
3Aphano Pilaatu khumuuzela yoori: “Ti weeyo mfwalume wa mayaahuuti?” Yinsa khujipu yoori: “Weeyo walupa.”
4Pilaatu khuwooza attunkhulu a mahaakhimu a tiini apale na khuntti ya atthu etile yaariivo yoori: “Miiyo akinimoonana hatha paathuli otu.”
5Atthu apale khusala avira akhanyarelaka olupa yoori: “Otu ontta owaatapanya atthu a Yudeya yooshi eti, aaza Kalileya mpakha ofiya okhuno.”
6Paata yoosiila mattakhuzi apale, Pilaatu khuuzela yoori: “Otu aya nkalileya?”
7Pilaatu ajuwiyeevo yoori Yinsa aari wa nti wa mfwalume Herooti, khuruma olawaniwa ottuukho. Wakathi aya opo Herooti na-ye aarettiye ari Yeruzaleemu.
8Herooti n'oomoona Yinsa, khwiiya woofurahi venkivene maana aaziye raku otakha omoona mwaasa woosiila vitthu aari orettaazo, khusala aweeja woona minjuza arettaka.
9Aphano khusala amuuzela vitthu za waatta, ila ye khuhisala anjipu hatha etthu.
10Attunkhulu a mahaakhimu a tiini na anamanozela a kano khusala anlokoveza mattakhuzi mawulu-mawulu.
11Herooti na anajanka awe khwaaza onveyisa Yinsa na ontarawu, khunwalisa ajapi y'oofwalume khuruma yoori arutiseliwe wa Pilaatu.
12Herooti na Pilaatu khaari osiilanaka, ila siikhu ethiito khupuwa oshirikha.
13Aphano Pilaatu khuwaakhuwela attunkhulu a mahaakhimu a tiini, anamaphuka milattu na atthu,
14khuwooza yoori: “Mwakitiisela otu mwinlupezaka yoori ontta owaatapanya atthu, ila miiyo kamuuzela vakatthi venu mweeyo, akimoonaneeni hatha paathuli khwa vitthu epo mwininlupezaazo.
15Herooti na-ye khamoonaneeni hatha paathuli, ti eto arumiyeeyo orutiseliwa okhuno. Eto enthoonyeza yoori kharetteeni etthu yoosuhi wuuliiwa.
16Miiyo kintta oruma opiiwa nawiisha kinleve.”
17N'oofiya siikhu ya njampo la Paashikowa, Pilaatu aarina sharuthi yoowaafukulela atthu napherezu mmote.
18Attaaphale atthu ooshi khusala anyakula araka: “Mwimuule oto! Mwinifukulele Baraba!”
19Baraba aafukeliwe mwaasa woolaza onazompere nsitati na khumuula ntthu.
20Aphano Pilaatu khurutela owooza atthu atakhaka onleva Yinsa.
21Ila atthu khusala anyakula venkivene araka: “Akhomeliwe, akhomeliwe vansalapa!”
22Pilaatu khuwoozela swaafu yattaatthu: “Niini arettiyeeyo yootakhala? Miiyo akinimoonana hatha paathuli yoosuhi wuuliiwa. Kinruma yoori mwinhukhumu nawiisha kinleve.”
23Ila yo khusala avira anyakulaka avekaka yoori Yinsa alawe akhomeliwe, akhanyarelaka onyakula.
24Aphano Pilaatu khukhupalela oretta etile aari otakhaaye atthu apale.
25Ye khumfukulela Baraba otule aafukeliweeyo mwaasa woolaza onazompere na wuula, khuwenkha Yinsa otule anvekiyeeyo yoori alawe anrettele etile aari ontakhelaaye.
26Yinsa khuthuuliwa khusala alawaniwa, eettaka olawaniwa etthiipile, khusikaniwa mwinyi mmote wa Sireeni aari wiitthiwaaye Simawu, aari olankhaaye omashapa. Khukholiwa khuthuulisiwa nsalapa opule yoori anlottisele Yinsa.
27Aari olottiwa pi atthu a waatta na aarivo aakha aari onlilelaaye ankhupanyeraka.
28Yinsa khuzukuluwa khuweekesa aakha apale aari onlilelaaye khuwooza yoori: “Aakha a Yeruzaleemu, mwihikililele miiyo, ila mwijililele mweeyo na aaneenu.
29Maana zinteela ofiya siikhu mwinttelaaye olupa yoori: ‘Ashapweyiwa aakha apale oohiina mavokozi, ahinavokole na ahinaamwise.’
30Siikhu ethiito mwinlawa mwalupe yoori: ‘Nyaako zinikwele kulu zinifinikhe!’
31Muutthi nwishi onretteliwa toono khi wa wuuma onttela wiiya toovi?”
32Khuthuuliwa theenya anazompere awiri yoori alawe ooliiwe vamote na Yinsa.
33N'oofiya puuro eniitthiwaaye Kalavaariyu, Yinsa khukhomeliwa na anazompere apale awiri, mmote nkhono-nlume nkina nkhono-nkha.
34Aphano Yinsa khulupa yoori: “Paapa, owaaswaamihi atthu apa maana khanjuwa etthu anrettaaye.” Elottelanaka yo khwaawanyelana kuwo epile za Yinsa nkatthi wa nasipu.
35Atthu aari attaaphale aari woona zooshi. Mahaakhimu a Yudeya khusala antarawu Yinsa araka: “Ye awoosuru atthu akina, mwinlikhe ajuusuru mwennyewe nkhama khweele ti Al-Masiihu nanthawuliwa ti Nnyizinku.”
36Anajanka na-yo khusala antarawu Yinsa antiiselaka viinyu yoonyuunya,
37n'oomuuza yoori: “Nkhama khweele weeyo o mfwalume wa mayaahuuti, ojuusuru omweenyewe.”
38Vansalapa attaaphale aakhomeliweevo, khutthiiwavo lipawu laatikhiweeyo yoori: “OTU MFWALUME WA MAYAAHUUTI.”
39Anazompere apale aakhomeliweeyo vamote na Yinsa, mmote aya khusala anveyisa amuuzaka yoori: “Nkhama weeyo o Al-Masiihu, ojuusuru na onuusurwaka na-fweyo.”
40Otule nkina khujipu ammaruwelaka nzaawe araka: “Weeyo khunimoova Nnyizinku, ye na-fweyo hukhumu yetthu moote?
41Fweeyo khweele ninsuhi ohukhumweliwa epile nirettiyeezo, ila ye kharetteeni hatha etthu yootakhala.”
42Aphano khulupa yoori: “Yinsa, okuupuwele amana ofiya muufwalume mwawo.”
43Yinsa khujipu yoori: “Miiyo kiniwuuza khweele yoori leelo eti weeyo onttela wiiya vamote na-miyo pephooni.”
44Esaleelaka ofiya elukuluku njuwa khuzima, khupuwa yiiza olumwenku wooshi mpakha makaaripi.
45Phazira khuluyeene yaari Nnyupa wa Nnyizinku khuvaruwa vakatthi.
46Aphano Yinsa khukhuwa na kuvu araka: “Paapa, rooho yaka kininkhelela mmakhono mwawo.” N'oolupa nttakhuzi ntthile, khuttiya phuumu.
47Nrooma mmote aari nttunkhulu wa anajanka, nawoona vitthu epile zaarettikhaniyeezo, khunsifu Nnyizinku araka: “Khweele-khweele otu aari ntthu aari weettettisaaye shariya.”
48Ooshi apale aari attaaphale, nawoona vitthu epile zaarettikhaniyeezo, khuruti apiyaka vifuwa zaya athoonyezaka huzuni.
49Ashirikha awe Yinsa ooshi na aakha apale anlottiyeeyo a Kalileya, aarettiye ari peetiwene eettaka woona vitthu epile.
50Aarivo mwinyi mmote aari wiitthiwaaye Yuusufu wa sitati ya Arumateeya nti wa Yudeya. Ye aari wooshapweya rooho na wa shariya, na aari weekeselaaye ota wa Ofwalume wa Nnyizinku. Aari wa khuntti ya mashawuriiya, ila ye khaakhupaleliye epile mashawuriiya aawaziyeezo na aarettiyeezo.
52Ye khulawa wa Pilaatu oveka mwiili wa Yinsa.
53Khulazavo vansalapa aphale, khuputaputela vajoora khulawa khuzikha nliphotto la mwaako laari ahinazikhiwemo hatha ntthu.
54Epo zaarettikhaniye juumwa ochelaniwa jumwaa-monsi.
55Aphano, aakha apale aataniyeeyo Yinsa Kalileya, khunlottelela Yuusufu omwaako okhule eetteliyeewo ozikha mwiili wa Yinsa, olawa woona khapuri na mwiili nanna waazikhiweezo.
56Nawiisha, khurutela owaya olawa waattalela mafuttha oonukhela yoori alawe avaaze mwiili wa Yinsa. Jumwaa-monsi yo khuvumula nkhama etthiipo enrumaazo kano.
