1Saapatu moote, Yinsa aalawiye wa nttunkhulu mmote wa mafwarizeewu olawa oja, atthu aari nttumphule khusala amweekesela Yinsa.
2Attaaphale aariivo, arivo mwinyi aavipiyeeyo mwiili awe wooshi.
3Yinsa khuwoozela mafwarizeewu na anamanozela a kano araka: “Enkhupaleliwa onvonisa nlwele saapatu ama wala?”
4Ila yo khwiiya oonyamala. Attaaphale, khunkhola mwinyi otule nkhono awe, khunvonisa khumuuza olawa safwari zawe.
5Aphano khuwoozela yoori: “Paani wa mweyo anraaye amooniye mwanawe ama mompe yawe ekweliye vanlipu khuhilazivo nasaapiru eri saapatu?”
6Yo khuhiwahi ojipu.
7Wakathi ajuwiyeevo yoori atthu apale aalaleyiweeyo njampo aari othawula puuro za wiilokozi, Ye khulupa nlikaniso opu:
8“Amana olaleyiwa njampo la harusi, ohithawule puuro etile ya wiilokozi, maana khinjuweya alaleyiwe ntthu wootepa oshitahiwa zayita weeyo.
9N'oota otule oolaleyiyeeyo ontta owuuza yoori: ‘Puuro eto omwinkhe otu’. Attaaphale weeyo oniiya woopatthiwa ti haaya olawaka wiikhala puuro ya wiishela.
10Ila amana olaleyiwa ona yawiikhala puuro ya wiishela, n'oota otule oolaleyiyeeyo ontta owuuza yoori: ‘Swaahipu, ote wiikhale puuro eti ya wiilokozi’. Aphano, weeyo onttela wiiya woohishimiwa venkivene vakatthi wa ananlaleyiwa ooshi.
11Maana wakhula otule anjiwulisaaye ontta opushuwisiwa na otule anjipushuwisaaye ontta owulisiwa.”
12Attaaphale Yinsa khumuuza mwinyi otule anlaleyiyeeyo yoori: “Amana wiiyana etthu-yoojiwa yawo ama njampo lawo ohiwaalaleye attwiizo, ashirikhaawo, ajamaazo ama anamwaattamanani awo oothaajiri, yoori na-yo ahuulaleye wumpuwa nkhama oriphana.
13Ila amana wiiyana njampo owaalaleye asikhini, anamarakala na atthu oohooni.
14Toowo oparikhiyiwa onttela wiiya wawo, maana apo aya khanlawa wiiyana etthu yawuurutisela. Oriphiwa wawo onttela ota siikhu yoosisimuliwa anashariya.”
15Ntthu mmote wa atthaapale aariina vameeza asiiliyeevo mattakhuzi apale khumuuza Yinsa yoori: “Ooshapweyiwa pi apale anttelaaye oja njampo l'oofwalume wa Nnyizinku.”
16Aphano Yinsa khujipu yoori: “Mwinyi mmote aarina njampo lawe khuwaalaleya atthu a waatta.
17N'oofiya wakathi khunruma karumeyaawe olawa owooza anamalaleyiwa yoori: ‘Mwite, zalikana.’
18Ila wakhula mmote khwaaza olupa tafwawuthi zawe, wamwanzo khulupa yoori: ‘Keetta wuuzanya nshapa laka, apha kinttela woona, kinveka nswammaha.’
19Waphiiri khulupa yoori: ‘Keetta wuuzanya mompe khumi zoolima, kintakha kilawe keezelele, kinveka nswammaha.’
20Wattaatthu khuri: ‘Kintta wiisharu oloola, akinwahi olawa.’
21Karumeya otule khuruti khulawa khumuuza mbwanaawe vitthu epile. Mwennyewe njampo khwiiya wa wiiphiiriwa khulupa yoori: ‘Waakuve olawe mmatarikhi na mmamuti wa sitati wawaatiise anamarakala, asikhini na apale oohooni.’
22Karumeya otule n'ooruti khulupa yoori: ‘Mbwana, karetta epile mwaakirumiyeezo, ila nalelo zinsala puuro.’
23Mbwanaawe khumuuza yoori: ‘Olawe mmatarikhi khuulu na mmamiphiitelo, wa waakhanyarele apale onttelaaye owaasikana ate eetaale vaje vaka.
24Kiniwuuzani yoori khaavo khwa apale aalaleyiweeyo anttelaaye oja njampo laka.’”
25Siikhu moote, atthu a waatta eetta onlottelela Yinsa, Ye khuzukuluwa khuwooza yoori:
26“Otule antakhaaye okilotta, ona yookipheta channu zayita papaawe, mamaawe, muukhaawe, aanaawe, attwiize, alupuwe, ama ohaayi awe, n'oohiretti etthiipo khaniiya nakhiyoni aka.
27Wakhula otule ahinthuulaaye nsalapa awe akilotta khaniiya nakhiyoni aka.
28Paani wa mweeyo anraaye atakhaka ojeka korofwa yawe, ahinaazaaye wiikhala khapula attheela hisapu vitthu zintakhaavo oona nkhama onwahi wiishisa?
29Ahirettiru etthiipo, ye ontta waaza ila khaniishisa. Atthu apale anttelaaye omoona antta ontheya alupaka yoori:
30‘Mwinyi otu aaza ojeka ila khanwahi wiishisa.’
31Ama mfwalume-ni anraaye alawaka wuumana viittha na mfwalume nkina khuhaazi wiikhala khapula apheleleza na anajanka awe apale alufu khumi, nkhama anlawa awaakhitiri apale alufu eshiriini anttelaaye wuumanana?
32Amana ahiretti toowo, apale ahinafiye ari peetiwene nalelo, ontta onruma waziri awe olawa owaavekela heeri.
33Khwa nanna etthiipo wakhula mmote wa mweyo ahinlikhaaye epile ariinaazo khansuhi wiiya nakhiyoni aka.
34Mwiinyu ona fwayita, khi mmana olikha onyuunya onrutiseleya toovi onyuunya waya?
35Khunretteliwa etthu wala mmashapa ama shituruumu, ontta wiitthiwa. Otule ariina mashiilo, ti asiile.”
