Luku 20

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Mago zupa ra mono nompi mani'neno, knare musenkea Jisasi'a vea'mokizmi rempi hunezmigeno, prisi vahe'mo'zane, kasegere ugota hu'naza vahe'mo'zane, ranra vahe'mo'zanena eme nege'za,

²anage hu'za Jisasinkura asmi'naze, nankna himamu eri'nenka amazana nehampi tasamio, hifi i'za ama hihamua kaminegenka nehane?

³Jisasi'a kenona anage hu'ne, Nagranena tamagrira tamagenoka hugahuanki nasmiho.

⁴Joni'ma mono ti frezmante'neazana, vahe'mofo eri'zampi, monafinti eri'za eri fore hu'neo?

⁵Huno zamantahigege'za, zamagra zamagra hugantu hugama hu'za, Monareti eriza erifore hu'ne huta hanunkeno'a, nahigeta Jonima hu'neazankura tamentinti osu'naze? Huno hugahie.

⁶Hianagi tagrama huta mopafi vahe'mofo eri'zanema hanunkeno'a, maka vahe'mo'za have knonu tahefrigahaze. Na'ankure zamagra ko keza antahiza Joni'a kasnampa ne' mni'ne hu'naze.

⁷Anage hu'za nehu'za, Jisasi kenona hunte'za, mono tima frentezana igati e'neo tagra ontahi'none hazageno,

⁸anage huno Jisasi'a zamagrira zmasami'ne, nagranena i'za hihamu namigena e'nerufi ontamasmigahue huno hu'ne.

⁹Hagi Jisasi'a veamokizmia amanahu fronka kea agafa huno zamasmine. Mago ne'mo'a waini hoza anteteno, kna'are kna'are mizaseterehu (rent) vahete waini hoza'a netreno, afete zazakna umaninaku vu'ne.

¹⁰Waini ragama tagi knarera kazokzo eri'za ne'a, waini hozama kegva hu'ne'za mizasetere hugahune hu'naza vahete huntegeno vu'ne. Hianagi ana waini hoza kegva hu'naza vahe'mo'za kanonkeve nemiza, huntageno aza avapa vu'ne.

¹¹Ete mago'ane, mago kazokzo eri'za ne'a huntegeno vigeno, zamagra knokeve nemiza azeri agaze hazageno, aza avapa vu'ne.

¹²Anante ana hozamofo nefa'a, ete mago'ane rumofo huntegeno vigeno, anazanke hu'za ahe kuzafa nente'za, ana hozafintira asagfe atre'naze.

¹³Na'a nagra hugahue? huno ana hozamofo nefa'a nehuno, nagrama navesi navesima hunentoa ne' mofavreni'a huntenugeno vanige'za, zamagra antahimigahazafi huno hu'ne.

¹⁴Hianagi waini hozama kegva hu'naza vahe'mo'za nege'za, zamagra zamagra hu'za, amana mofavre'mo nefazana erisanti haregahianki, enketa aheta erisantima haresiazama'a erisune hu'naze.

¹⁵Anage nehu'za azeri'za ana hozafinti mate nevu'za ahageno fri'ne. Hanki e'i anama hanageno'a hoza nfa'amo'a, na'a zamagrira huzmantegahie?

¹⁶Hoza nefa'a Agra eno ana vahera eme zmahe nefrino, ana waini hoza rumokizmi hanare zamigahie. Jisasima ana kema hige'za nentahiza, anahura osugahie hu'za zamagra hu'naze!

¹⁷Hianagi Jisasi'a nezmageno anage hu'ne, na'ante amanage huno avontafepina krentene. Nogi vahe'mo'za zmesra huntaza havemo'a, no renegentete ugagota huno azeri hanaveti have fore hu'ne? (Sam-Zga 118:22)

¹⁸Maka vahe'ma ana have agofetuma takauresamo'za, kori kofagofa hugahaze. Hianagi ana havemoma iza agofetu takauresuno'a, rehapatisigeno kugusopa fore hugahaze.

¹⁹Kasegere ugota hu'naza vahe'mozane, prisi vahe'mo'za Jisasina anante azerinaku hunazanagi, vaheku kore hu'naze. Na'ankure Agrama fronka kema hu'neana zamagrama nehaza zamuzmaku hu'negeze.

²⁰Ana nehu'za zmavu anteza keteza manine'za, afure vahe huzmantege'za, fatgo vahekna huza umnine'za kema hania kere azeriza ugagota vahete (gavana) vnige'za, kva vahete avrenente'za kegaga huntehogu vu'naze.

²¹Zamagra anage hu'za Jisasina agenoka hu'za, tagra antahinone, Rempi hurami nemoka, kema nehunka rempi huzaminana fatgo hunka nehunka, mago vahe aza huzankuke nosunka, rempima huzaminana fatgo hunka Anumzamofo avu'avazankuke nehane.

²²Hanki Roma kva ne' Sisama takisi zgo nemunazamo'a knare hunefi, haviza hu'ne?

²³Hianagi Jisasi'a revatga hunaku'ma hazana ko negeno, amanage huno zamasmi'ne,

²⁴Naveri hinkena mago zgoa kaneno, iza amema'a megeno, na'ane hu'za anantera krente'naze? Higeno, zamagra Sisa amema'e hu'za hu'naze.

²⁵Jisasi'a anage huno zmasamine, Sisa zama me'neniana Sisa amiho. Hagi Anumzamofo zama me'neniana Anumzamofo amiho.

²⁶Hige'za rama'a vahe zamavufi manineno kea nehige'za, zamagra revatga hu'za ke'afintira magore hu'za azerigara nosu'za, kenona zmima hiankegura antri hu'za kea osu'naze.

²⁷Anante mago'a Sadusi vahe'mo'za, fripintira o'otigahaze nehaza vahe'mo'za, Jisasinte e'za,

²⁸anage hu'za antahige'naze. Rempi hurami ne'moka, Mose'a anage huno avontafema kreraminefina hu'ne, Nempuamo a' erino manineno, mofavre kaseonteno frinigeno, negna ana ara erino, nefu mofavre erifore hino huno hu'ne. (Diu-Kas 25:5-6)

²⁹Hanki 7ni'a kogna mani'nazankino nempuzmimo ara erino mofavre onte manineno frigeno,

³⁰negna ana ara eri'ne. Eriteno mofavre onte manineno fri'ne.

³¹Anantemo'a anazanke huno ana ara erinteno, mofavre onteno frine. Anahukna hu'za ana maka'mo'za ana ara eri'za mofavre kaseonte manine'za fri'naze.

³²Fri vgaretazageno henkarfana ana ara fri'ne.

³³Hanki fri'nafinti oti snaza knazupa, inamofo a' manigahie? Na'ankure ana maka 7ni'amo'za ana ara erintenaze, hu'za hzageno,

³⁴Jisasi amanage huno zamasmi'ne, ama knafi mani'naza vahe'mo'za ara e'neriza, ara masi ome ami nehaze.

³⁵Hianagi Anumzamo'ma huno, veamo'za fri'nenafintima oti'za henka manigahaze hu'nea veamo'za, arave osu'za, ara masi omi ami osugahaze.

³⁶Na'ankure zamagra mago'ane ofrigahaze. Na'ankure zamagra ankero vahekna hu'za, Anumzamofo Mofavre nemniza, kerifinti oti'nea mofavregna hu'za manigahaze.

³⁷Hianagi frite'za oti'naza zankura, Mose'enena osi zafafinti teve anefa nehigeno ke'neazamofo naneke krenefina eriama huno, Abrahamuma, Jekopuma, Aisaki Ra mni'noe huno hu'ne. (Ekso-Uti 3:6)

³⁸Hagi Agra fri vahe'mofo Aumzana omnine. Hianagi zmasimu eri'za nemniza vahe'mofo Anumza mni'ne. Na'ankure mikamo'za agriteti zmasimu eriza mni'naze.

³⁹Mago'a kasegere ugota hu'naza vahe'mo'za kenona'a hu'za, Rempi Hurami Ne'moka knare ke hane hu'za hu'naze.

⁴⁰Na'ankure mago'ene Jisasi'ma mago'azankuma agenoka hugara osu'za, antahionke'naze.

⁴¹Anante Jisasi'a amanage huno zamantahige'ne, inankna hu'negu zamagra Kraisinkura Deviti nemofo'e hu'naze?

⁴²Na'ankure Deviti'a zgame avontafepina huno, Ramo'a nagri Ramofonku huno, nazantmaga kaziga mani'negena,

⁴³ha' vaheka'a kagiafi zmare antanena zmagofetu otio hu'ne. (Sam-Zga 110:1)

⁴⁴E'ina hu'negu Deviti'ma Ranimo'e hu'neana, inankna huno Deviti mofavrea Ramo'a manigahie?

⁴⁵Hakare veamo'za ana naneke nentahizageno, Jisasi'a amage'ma nentaza disaipol nagakura anage huno zmasami'ne,

⁴⁶kasegere ugota hu'naza vahekura kva hiho. Zaza kukena hu'za vahe zmavuga vu'zankuke nehu'za, maketi kumapi vahe'mo'za antahinezmiza hu frufra huzmantesaza zanku nehu'za, osi mono nompi ugota trate manisaza zanku nehu'za, ra nezama nezupa, knare trate mni'zankuke nentahize.

⁴⁷Kento a'nemokizmi fenozantami havige hu'za eneriza, anaza nosaza vahekna hu'za, vahe'mo'za antahiramisazegu zaza nunamu nehaze. E'inahukna zmavuzmava nehaza vahera, refkoma hania zupa tusi'a knaza zamigahie.