Luku 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Jisasi'a Jeriko rankumapi ufreno nevigeno,

²mago nera Sakiasi'e nehaza nera, takesi zgo eneriza vahe'mokizmi kva nekino, afufeno ne' mani'ne.

³Nankna ne' Jisasi'a mni'ne huno Sakiasi'a kenaku hianagi, tusi'a vahe'mo'za rehiza huntazageno onke'ne. Na'ankure agra upa ne' mni'ne.

⁴Ana higeno agareno vugoteno, vunaku'ma hiakante me'nea sikamo zafare umrerino kenigu mni'ne. Na'ankure Jisasi'a ana kante enaku higeno'e.

⁵Jisasi'a anama maninere ne-eno, kenagamuteno negeno anage huno asami'ne, Sakiasiga ame hunka eramio, na'ankure menina kagri nompi umanigahue.

⁶Higeno Sakias'a ame huno eramino, muse nehuno avreno noma'arega vu'ne.

⁷Ana'ma hige'za maka vahe'mo'za nege'za, ke hakare hunte'za, kumi vahe'mofo nompina nantura antenente hu'naze.

⁸Hanki Sakiasi'a otino amanage huno Ramofona asmi'ne. Ramoka antahio, fenoni'a amu'nompinti refko hu'na zmunte omne vahe nezamina, nagrama rezmatga hu'na eri'noazana refko hu'na 4'a zupa zamigahue.

⁹Jisasi'a amanage huno asami'ne, menina ama nompi mni'naza vahetera, Anumzamo'a zmahokeno zmavre'neazamo ko ene. Na'ankure agranena Abrahamu mofavre mni'ne.

¹⁰Na'ankure vahe'mofo Mofavremo'a, fanane hu'naza vahe hakeno zmavarenaku e'ne.

¹¹Ana nenekema nentahizageno, Jisasi'a mago'ane fronka kea zmasami'ne, na'ankure mago'a vahe'mo'za antahizana, Anumzamofo kumara ame huno egahie hu'za nentahizageno, Jisasi'a Jerusale tvaonte mni'neno zmasamino,

¹²mago ne'mo'a mago kumatega vuno anantega kva umniteno ete enaku nehuno,

¹³10ni'a kazokzo eri'za vahe kehuno, 10ni'a zgo nezamino, anage huno zmasami'ne, eri'za kante erinenteta mago'a zgoa retro nehinkena etena henka egahue.

¹⁴Hianagi ana kumapi nemaniza vahe'mo'za zmasivazinte'za, mago'amokizmi huzmantage'za vu'za anage hu'naze. Tagra ama ne'moma kvagri rante'zankura tave'osie hu'naze.

¹⁵Ana kumama omeriteno ete eno, kazokzo eri'za naga'a koma zami'nea zagoretira, nankna huza mago'a zagoa retrora hu'naze keno antahino hunaku zamagi hu'ne.

¹⁶Ese ne'mo eno anage hu'ne, Ramoka tare zotama zago nami'nantetira, mago'ane ana zagoretira eri'za erina 200ti zgoa retro hune, higeno,

¹⁷ana ne'mo'a anage huno asami'ne, so'e hunka eri'za erinane, knare eri'za nemoka, na'ankure osi'zante knare hunka kegva hu'nanku, menina 10ni'a rankuma kegva hugahane higeno,

¹⁸anante'mo eno anage hu'ne, Ra'moka tare zotama zgoma nami'nantetira eriza erina 100ti zgoa retro hu'noe higeno,

¹⁹Ana ra nemo'a anage agri enenkura huno asami'ne, kagranena 5fu'a kuma kegva hugahane huno asmi'ne.

²⁰Mago'mo anante eno anage hu'ne, Ramoka, zgoma nami'nana hankasipifi ante'novzitena ante'noankina ama erina oe.

²¹Na'ankure kagra kema hunka hugahue hanazana nehunka (hihamu ne' mni'nenka), kagra rumo'za kri'nazaza enerinka, onkrinanazana negafinka nehanku kore hu'na fraki'noane.

²²Ana ne'mo'a anage huno asmi'ne, Kagrama hana kere, kefo kazokzo nemoka kagrira refko hugahue. Kagra ontahinane, nagra himamu ne' mni'nena, nagra ontenoazana enerina, okri'noazana e'nerugenka antahinane?

²³Na'a higenka zgoni'a zgoma nentaza nompi antenankeno, ruguheno mago'a erifore nehigena ehanatina e'orue?

²⁴Anage huteno, anante otinaza vaheku anage huno zmasami'ne, tare zota'a zgo eritma 200ti zgoma erifore hu'nea nemofo amiho.

²⁵Ana vahe'mo'za anage hu'za ana nekura hu'naze. Ramoka, agra 10ni'a zgoa ko eri'ne hu'za hu'naze.

²⁶Hanki amanage hu'na neramasamue, maka vahe'mozama rama'a erinesamokizmia, mago'ane anteaguheno zamigahie. Hianagi e'orinesimofompintira, erineniama'a hanaregahue.

²⁷Hianagi ama ha' vahe'nimo'za, kvama nagra huzmantezankura zmesra hunantaze vahera, zmavreta nagri navure zmaheta rukafritreho huno hu'ne.

²⁸Jisasi anage huno zamasmiteno, ugagota huzmanteno Jerusale kumate vu'naku vu'ne.

²⁹Jisasima Jerusale vunaku Betfakene Betani kumatema nevuno, Olive nehaze agonare erava'o nehuno, amagema nenta'a disaipol ne'trena huznanteno,

³⁰anage huno znasamine, ugota huta antu kumapi ufreta ome kesa'ana, vahe'mo'za agofetura mni'za ovu'nesaza donki afu kinare mni'nesigeta kesuta'a, kazufeta avazu huta amare e'o.

³¹Mago'a vahe'mo'zama tamantahige'za na'a hunaku katunefa'e? Hanigeta anage huta znasamiho, Ramomofona eri'za me'negeno hurantegeta'e hi'o.

³²Jisasima anage huno huznantegeke vu'ne ome ka'ana, kema huzananteneaza hu'negene ome ke fore hu'na'e.

³³Nofi'ma ana donki rentenea ome katu nefakeno, ana donki afumofo nfa'amo'a znantahigeno, Na'a hunaku e'i afura katu nefa'e? huno znantahigege'ne,

³⁴Ramofona eri'za me'negeno hurantegeta eme katu nefo'e hu'na'e.

³⁵Ana hutene avare'ne Jisasinte uhnatikeno, zamagra nakre kuzmi ana donkimofo agofetu zafiza antegeno Jisasi'a agofetu mni'ne.

³⁶Jisasi'ma nevige'za nakrekuzmi zafiza kampi tafe vasinte'nageno ana agofetu vu'ne.

³⁷Ana'ma huno Olive agonare vu kantema umanehnatigeno, maka amagema nentaza disaipol nagamo'za, Anumzamofo agi erisaga hu'naze. Na'ankure maka kaguvazama higeza kenaza zanku ranke hu'za musenkase nehu'za amrara hu'za,

³⁸ranke hu'za, Ramofo agifima ne-emofona ra agi amisune. Monafina rimpa fru menkeno, Anumzamofo hihamu hanavemo'a mrerigateresie. (Sam-Zga 118:26, 148:1)

³⁹Ana veapinti mago'a farisi vahe'mo'za hu'za anage huza asmi'naze, Rempi hurami nemoka, kamagema nentaza disaipol nagaka'a ke zmasuge'za anage osiho huza asmi'naze.

⁴⁰Hianagi Jisasi'a kenona anage hu'ne, zamagrama kema tagnenageno'a hankami havemo'za, Anumzamofo agi'a erisaga hugahaze!

⁴¹Jisasima Jerusale kuma tvaonte vugofa huno, ana ran kuma'ma negeno zavi neteno,

⁴²anage hu'ne, ama knare'ma kagrima krimpa fruma hu'zama fore'ma nehiazana, kagra nonkane! Hianagi kagri kavurera rimpa fruzamo'a frakino me'negenka nonkane.

⁴³Na'ankure mago'a kna ne-eankino, ha' vahe'timimo'za eme tamavazi kagiza, maka asopa eme regagi ramante'za,

⁴⁴makazantmi eritagna vazi atresigeno, mopafi fragu vaziramino mena, tamagri'ene mofavretmine haviza nehanageno, zamagra mago havea atresageno mago havemofo agofetura omnegahie. Na'ankure kagrima Anumzamo'ma kazama hiazana kenka antahinka osu'nane.

⁴⁵Jisasi'a ra mono nonte vuno, miza neseza zgore netraza nagamofona, agafa huno zamahe megi netreno,

⁴⁶amanage huno zamasmi'ne, anage huno avontafepina krentene, Nagri nomo'a nunamu hu no megahie. Hianagi kumzafa vahe'mofo nokna nehaze. (Ais 56:7, Jer 7:11)

⁴⁷Mago mago knarera Jisasi'a ra mono nompi rempi huzami'ne. Hianagi prisi vahe'mo'zane, kasegere ugagota hu'naza vahe'mo'zane, ranra vahe'mo'zanena azeri haviza hanaza kanku hakre'naze.

⁴⁸Jisasima azeri haviza hanaza kana keza eri fore osu'naze. Na'ankure maka vahe'mo'za Jisasima hu'nea ke antahinazageno'e.