1O Iesu i kabo tomo pas a noino ma aru nat na ususer, ra i pitar a dekdek ma a warkurai tandet sur det in lakro ru a kum laulau na nion rop, ma sur det in ulangolango pas a taro gusun a kum misait.
2Ma i tulu ru det sur det in warawai una matanitu anun o God, ma det in ulangolango pas a kum misait.
3Ma i watungi tandet lena, “Gong mot los tu utna una numot a inawan, gong tin nubuku, gong tu rat, gong lako utna na inangon, gong lako mani ma gong kai tin namalu na kelkeles.
4Ra mot in nanpat tiro un tu rumu, mot in kis ut tiro iai tuk una bung ra mot in nan gusun a tamon ra.
5Ra lako taro ka det in gas pas mot, ra mot in nan gusun anundet a tamon, mot in tang ru a kubus gusun a kikimot, sur a ukinalong na utumarong torom det.”
6A kum nat na ususer det wan tuptupukus una kum tamon, det warawai nama Wakak na Wasiso, ma det ulangolango pas a taro una kum tamon rop.
7O Erod a mugumugu tagun a gapman i longoro a kum utna ri i wanpat, ra i talara a nuknukino uni, uni ara taro det watungi lena o Jon i sa laun melet gusun a minat.
8Ma ara taro kai det watungi lena o Elaija i sa wanpat. Ara taro kai det watungi lena ara tagun a kum poropet tagun numugu i sa laun melet.
9Ikut o Erod i watungi lena, “A sa tau kutus ru tar in kabaran o Jon, ma iri, osi na musano melet ri, a longoro a kum utna ri uni?” Ra i nem doko i sur in tama o Iesu.
10A kum aposel det milet melet, ra det inanos o Iesu una kum utna ra det sa pam tari. I ben pas det kut, ra det wan gisen sur a tamon a risano o Betsaida.
11Ikut, a kunur na taro det longoro i, ra det muri. I gas pas det, ra i wasiso torom det una matanitu anun o God, ma i ulangolango pas det ra det misait.
12Ra i sa lirop, a noino ma aru nat na ususer det wan torom o Iesu, ra det inanosi lena, “Un tulu ru a kunur na taro sur det in nan sur a kum lamlabino tamon milau, ma a kum natnat na tamon kai, sur det in nangon ma det in inep iai, uni a nubual ri i bakbak gusun a kum tamon.”
13O Iesu i balu det lena, “Mot ut mot in tabor det.” Ra det balu i lena, “A limanin beret sot kut, ma arin kiripo kuri met losi. Kutiro u nemi sur met in kul pas lako utna sur in elar nama kunur na taro rop ri?”
14A kunur na taro ra, a niluluk ina kum musano kut i elar nama limo na arip. I watungi tan anun a kum nat na ususer lena, “Mot in tulu det sur det in kis tomo a limlimo na noino det.”
15Ra a kum nat na ususer det pami lenutra, ma a taro rop det kis.
16O Iesu i los pas a limanin beret ma arin kiripo, i tamtama usapat una langit, i watung wakak pas torom o God uni, i tibiki ra i pitari tan a kum nat na ususer, sur det in tibo a taro nami.
17Det rop det wangon ma det masur. Numur det song bukus pas a noino ma aru rat nama utna ra det wangon kopos pas uni.
18Ara bung ra o Iesu sot kut i wararing, a kum nat na ususer det kis milau tari, ra i ting det lena, “A taro det watung iau nam osi?”
19Det balu i lena, “Ara taro det watung ui o Jon a Tene Baptaiso. Ara taro det watung ui o Elaija, ma ara taro kai det watung ui, ara tagun a kum poropet tagun numugu, ra i sa laun melet.”
20Ra i ting det lena, “Ma mot, mot watung iau nam osi?” Ra o Pita i balu i lena, “Ui a Karisito ra o God i tulu ru ui.”
21Ra i turbat dekdek det sur gong det inanos tar taio nami.
22O Iesu i watungi lena, “A Nutun a Musano in taramo a susut na mamaut. A kum mugumugu, a kum lamlabino tene etabor torom o God, ma a kum tene ususer tagun a Warkurai det in rosumur gusuni ma din um doko i. Ra a tulu bung in rop, in katutur melet.”
23Ra i watungi tandet rop lena, “Ra taio i nemi sur in mur iau, gong i mur a nuknukino. In los pas anun in nanai kutus una kum bung rop ma in mur iau.
24Uni osi ra i maris bat anun a nilaun in iru, ikut osi ra in iru, uni i tagun iau, in laun.
25Osi ra in utur ukai a kum ututna rop taginin una rakrakon bual, ma in ban laulau anun a nilaun uni, ma in iru tukum, in wakak pepetlai toromi?
26Osi ra in maimai un iau ma una nung a kum wasiso, a Nutun a Musano kai in maimai uni, ra in nanpat tomo nama nun a minamar, ma a minamar anun o Tamano ma anun a kum ensel anun o God.
27A inanos mot nama lingmulus, lako taro tagun mot ri mot tur nin, ka mot in mat utmakai, ra mot in tama a matanitu anun o God.”
28Ra i sa tiwal na bung bat tar a wasiso ri, o Iesu i ben pas o Pita, o Jon ma o Jems, ma det wan toto usapat una tangai sur det in wararing.
29I wararing, ra in masarino i tamtama senene, ma anun a kum malu kai i kabang doko ma i pilpil.
30Ma i wasiso tomo nam aru musano, o Moses der nam o Elaija.
31Der wanpat nama minamar, ma detul wasiso una minat anun o Iesu, ra in etoromi sapat o Jerusalem, sur in pam sot pas a nemnem anun o God.
32O Pita detul, detul inep dumun. Ra detul tuangun pat, detul tama a minamar anun o Iesu, ma aru musano kai ra der tur tomo nami.
33Aru musano der nem na wan mo gusun o Iesu, ra o Pita i watungi tano lena, “Tene Ususer, i wakak ra dat in kis nin. Metul in pam lako tulu turturup, ara anumi, ara anun o Moses, ma ara kai anun o Elaija”. Ikut o Pita ke tasman asau ra i watungi.
34Ra i wasiso utmakai, a du bakut i wanpat ma i pulus bat pas det, ra detul ngara ra a bakut i pulus bat det.
35Ma in nalngan ara tagisapat una bakut i watungi lena, “Iri a Nutunglik, ra a sa pilok pasi. Mot in longoro i.”
36Ra i wasiso rop pas, o Iesu sot mukut kura i. Ma ka detul wasiso uni. Ma una kum bung ra, ka detul inanos tar taio una kum utna ra detul sa tama tari.
37Una bung numur, o Iesu ma a tulu nat na ususer det wan pirso tagisapat una tangai, ma a labino kunur na taro det etorom nam o Iesu.
38Ra ara musano tagun det i kakabo lena, “Tene Ususer, a saring ui sur un tama o nutunglik a nat musano, i ara sot kut.
39A laulau na nion i ser solsolongi, ma a nat i ser kisin ma i kukukuk. A laulau na nion i ser gunu dekdeki, ma a wano i ser busu. A laulau na nion ke wan gusuni, ma i ungungut laulau a pinino.
40A saring anum a kum nat na ususer sur det in lakro ru i, ikut ka det pet lar pasi.”
41O Iesu i balu i lena, “Mot a taro tagun uniri, ka mot nurnur ma mot a kum tene sakino. A sa kis suano i tomo nam mot. Nangisin mo mot in nurnur? Un ben a nutumlik urin.”
42Ra a nat i wan nanan utmakai torom o Iesu, a laulau na nion i woro piso tari una piso ma i gunu dekdeki. O Iesu i wasiso dekdek torom a laulau na nion ra i lakro ru i, ra a nat i langolango melet. Numur i pitar melet tari torom o tamano.
43Ma det rop det kisin una dekdekin o God. Ra det kisin utmakai una kum utna ra o Iesu i sa pam tari, i watungi tan anun a kum nat na ususer lena,
44“Mot in longoro wakak a wasiso ri: Din pitar a Nutun a Musano ulaman a taro.”
45Ikut ka det talapor una kukurai ina wasiso ri. Di munu i kut gusun det, sur gong det talapor uni. Ma det ngara sur det in ting o Iesu uni.
46A kum nat na ususer det engaras epotor tandet sur osi tagun det ra in labo taun det.
47O Iesu i sa tasman a nuknukin det, i los pas ara natlik ma i utur tari tiro nisano.
48Ma i watungi tandet lena, “Osi ra in gas pas a natlik ri una risang, i gas pas iau ut. Ma osi ra in gas pas iau, i gas pasi utkai o naro ra i tulu ru iau urin. Uni i ra i natino tamot rop, i ut ra i labo sakit.”
49O Jon i watungi tan o Iesu lena, “Tene Ususer, met tama ara musano i lakro ru a kum laulau na nion nama risam, ra met lari sur met in turbati, uni i awu sur tagun dat.”
50O Iesu i balu i lena, “Gong mot turbati, uni osi ra ke turbat mot, i warut mot.”
51Ra i sa milau a du bung sur din los pas o Iesu usapat una langit, a nuknukino i dekdek sur in nan usapat o Jerusalem, ma i turpas a inawan.
52I tulu ru ara taro, sur det in mugu tano. Det wanpat un ara tamon una papor Samaria, sur det in waninar sur o Iesu.
53Ikut a kum te Samaria ka det nemi sur in ruk una nundet a tamon, uni in nan ut usapat o Jerusalem.
54Ra anun aru nat na ususer, o Jems ma o Jon der tama a petutna ri, der iting lena, “Labino, u nemi sur mir in saring o God sur in pitar ru a sungun sur in nan rop ru det?”
55O Iesu i ger tupukus, ma i turbat der.
56Ra o Iesu tomo nama nun a kum nat na ususer det wan sur ara tamon gisen.
57Ra o Iesu ma anun a kum nat na ususer det wan nanan una kisapi, ara musano i watungi tano lena, “An mur ui una kum nubual rop ra un nan iai.”
58Ra o Iesu i watungi tano lena, “A kum lomlom na pap anundet a kum tung ut, ma a kum piko kai anundet a kum pios ut, ikut a Nutun a Musano katu rumu na ininep.”
59I watungi tan ara musano bulung lena, “Un mur iau.” Ikut i balu i lena, “Labino, un mulaot ru iau munung sur an nan, an por ru tar o tita.”
60Ikut o Iesu i watungi tano, “Un madek ru a kum minat det in por anundet a kum minat. Ikut ui, un nan ma un warawai nama matanitu anun o God.”
61Ara melet i inanos o Iesu lena, “Labino, an mur ui, ikut un mulaot ru iau munung sur an nan, ma an wasiso na itula taru munung torom det una nung a rumu.”
62O Iesu i watungi tano lena, “Osi ra in turpas a pinapam na kilkil piso, ma i ger unago numur, ke topasi a pinapam una matanitu anun o God.”
