1Ara bung o Iesu i tur nago na usalin una du tasi Genesaret, a taro det tur talilis bat pasi, sur det in longoro a wasiso anun o God.
2Ra i tama pas aru pot tiro iai una usalin, ra a kum tene woro uben det sa wan pas gusun der, kura det gos anundet a kum uben.
3I kas taru un ara tagun der, a pot anun o Saimon, ra i inanosi sur in sugut lilik tar a pot usa utasi. Ra o Iesu i kis taru uni, ma i ususer a kunur na taro.
4Ra i sa wasiso rop, i watungi tan o Saimon lena, “Mot in nan usa una dino ra i lamano, ma mot in woro anumot a kum uben sur lako kiripo.”
5O Saimon i balu i lena, “Labino, met sa tol panai taru una kudulano mirum, ma ka met dat pas tin kiripo, ikut an woro melet tar a kum uben, uni ui u itula.”
6Ra det sa woro tar a kum uben, det dat pas a susut na kiripo, ra anundet a kum uben milau in tararos.
7Det kalu pas a kum paspasan det tagun ara pot kai sur det in warut det. Ra det wan torom det, ma det ubukus pas aru pot rop, ra der ling na murung mo.
8O Saimon ma det ra det wan tomo nami det kisin una kum kiripo ra det dat pasi, lenkutkai ra torom aru paspasano, Jems ma o Jon, aru nutun o Sebedi. Ra o Saimon Pita i tama a utna ri, i puku nama urur tiro na kikin o Iesu ra i watungi tano lena, “Labino, wan gusun iau, iau a tene sakino.” O Iesu i balu i lena, “Gong u ngara. Turpasi uniri, un tene ben taro.”
11Ra det sa dat toto tar aru pot, det wan gusun anundet a kum utna rop, ma det mur o Iesu.
12O Iesu i kis un ara tamon, ma ara musano a pinino rop i bukus nama lepra, i wan toromi. Ra i tama pas o Iesu, i kis butkeke ma in masarino unago upiso, ma i saring dekdeki lena, “Labino, ke ngangitin torom ui. Ra u nemi, un ulangolango pas iau, sur an talapor umatan o God.”
13O Iesu i kodos a lamano, ma i pam a pinino ra i watungi tano lena, “A nemi ut, un langolango.” Uniutra a lepra i rop gusuni.
14Ra o Iesu i wasiso dekdek taru toromi lena, “Gong u inanos tar taio nami. Un nan ma un ese mugu tar ui torom a tene etabor torom o God, ma un pitar a etabor torom o God elar nami ra o Moses i sa watung tari, sur un talapor umatan o God. Ra un pami lenra, a taro det in tasmani lena u sa langolango.”
15Ikut a wasiso un o Iesu i wan sarara makai, ra a susut na taro det wan tomo sur det in longoro i, ma sur in ulangolango pas det gusun anundet a kum misait.
16Ikut a susut na bung o Iesu i ser wan gisen, una nubual kalako taro uni, sur in wararing.
17Ara bung ra o Iesu i ususer a taro, a kum Parisi ma a kum tene ususer tagun a Warkurai, kura det kis tomo nami. Det wanpat tagun a kum tamon rop una papor Galili ma una papor Judia, ma tagisapat o Jerusalem kai. Ma a dekdekin a Labino i kis un o Iesu sur in ulangolango a kum misait.
18A ramano kum musano det los pat ara musano a pinino i mat, i inep taru kut una lu. Det lari sur det in ruk nami, ma det in inep tari numugu nisan o Iesu.
19Ikut ka det ruk lar pas nami, uni a taro det bukus doko. Ra det ka nami usapat netes una rumu, det papok saro pas a nubual sapat netes, ra det unoro pirso tari tomo nama lu epotor nisan a kunur na taro sa numugu tan o Iesu.
20O Iesu i tama anundet a nurnur, ra i inanos a musano a pinino i mat lena, “Pasang, di sa unus ru anum a kum sakino petutna.”
21A kum tene ususer tagun a Warkurai ma a kum Parisi, det nuknuk doko lena, “Osi na ngas na musano ri? I watung laulau o God uni i wasiso lar i o God. Osi i elar sur in unus ru a kum sakino petutna? O God sot kut.”
22O Iesu i tasman a nuknukin det, ra i ting det lena, “Sur asau ra mot nuknuk lenra?
23Osi na wasiso ra ke ngangitin sur an watungi? Pepetlai, an watungi lena, ‘Di sa unus ru anum a kum sakino petutna,’ o, an lena, ‘Un katutur, ma un nan’?
24A wasiso ra an watungi, an watungi sur mot in tasmani lena, o God i pitar a warkurai torom a Nutun a Musano, sur in unus ru a kum sakino petutna nin upiso.” Ra i watungi torom a musano a pinino i mat lena, “A inanos ui, un katutur, un los anum a lu, ra un nan sur anum a rumu.”
25Uniutra i tur umatandet rop, i los pas anun a lu, ra i wan sur anun a rumu. Ra i wan i rakon lekeleke pas o God.
26Det rop det kisin doko, ra det rakon lekeleke pas o God. Det ngara doko, ra det watungi lena, “Uniri, dat tama a kum se utna i wanpat una nundat a tamtama.”
27Numur tan a kum utna ri, o Iesu i wan tagitiro, ra i tama pas ara tene los takis, a risano o Liwai, ra i kis una rumu na los takis. O Iesu i watungi tano lena, “Un mur iau.”
28Ra o Liwai i katutur ma i wan gusun anun a kum utna rop, ra i muri.
29Numur o Liwai i pam a labino inangon un o Iesu una nun a rumu. A susut na tene los takis ma ara taro kai det kis tomo nam o Iesu una inangon ra.
30Ikut a kum Parisi tomo nam anundet a kum tene ususer tagun a Warkurai, det pukus anun a kum nat na ususer ra det watungi lena, “Sur asau ra mot wangon ma mot inum tomo nama kum tene los takis ma a kum tene sakino?”
31O Iesu i balu det lena, “A dokta ke wanpat sur det ra det langolango. Awu! I wanpat sur det kut ra det misait.
32Ka wanpat sur an kabo pas a kum tene tokodos, awu! A wanpat sur an kabo pas a kum tene sakino sur det in nukpukus.”
33Ara taro det watungi tan o Iesu lena, “A kum nat na ususer anun o Jon det ser wewel ma det ser wararing, ma lenkutkai lar a kum nat na ususer anun a kum Parisi. Ikut anum a kum nat na ususer det wangon ma det inum kut.”
34O Iesu i balu det lena, “A kum paspasan a musano ra i nolin matok, det in wewel pepetlai, ra kura utmakai i tomo nam det?
35Ikut tu bung in nanpat, ra din ben ru i gusun det. Una kum bung ra, det in wewel maragom.”
36O Iesu i watungi kai ara wasiso elelar tandet lenri, “Katutaio in raros pas tu du malu tagun in matok na malu, sur in mabon tomo tari namin turai na malu. Ra in pami lenra, in raros laulau ru in matok na malu, ma a du matokino ka der in tamtama elar nama du turaino.
37Ma kataio in titior a matok na wain utiro unin turai na koto, ra di pami namin pino meme, sako a matok na wain in busu ma in mubus ma in purus in nokoto na wain, ra a wain in tilingis, ma in nokoto na wain kai in laulau.
38Din titior a matok na wain ut utiro unin matok na koto na wain.
39Kataio ra in inum pas a turai na wain, in nem melet a matok na wain, in watungi kut lena, ‘A turaino ut i wakak.’”
