1O Iesu i watung a wasiso elelar torom anun a kum nat na ususer sur in ese det lena, det in wararing bolbolos, ma gong a pinindet i ngoro.
2I watungi lena, “Ara tene warkurai i kis una ara tamon, ke ngara sur o God, ma ke nuk pas a taro kai.
3Ara ula tagun a tamon ra, i wan liklik mukut toromi, ma i ser saringi lena, ‘Un ukodos tar iau tomo nama nung a ebar una numir a maut.’
4I sa suano i ma ke mulaot tano, ra numur i nuki lena, ‘A lingmulus, ka ngara sur o God, ma ka ser nuk pas a taro,
5ikut, an tama i sur an ukodos a ula ri, uni i utikidis liklik iau, sako in ungoro iau nama inawan pat liklik nin.’”
6A Labino i watungi tan a kum nat na ususer lena, “Mot in longoro a wasiso anun a tene warkurai ra ke lingmulus una nun a pinapam.
7Pepetlai, o God ken ukodos anun a taro na pipilok, ra det tangis toromi una kum waspi ma una kum mirum kai? Pepetlai, ken warut lakit det?
8A watungi tamot, in ukodos lakit det. Ikut, ra a Nutun a Musano in nanpat, pepetlai, in etorom pas lako taro ut nin upiso ra det nurnur uni o awu?”
9O Iesu i watung a wasiso elelar ri torom det ra det nurnur ut un det lena, det a kum tene tokodos, ma det tama pisopiso a taro rop.
10“Aru musano der wan usapat una rumu na etabor sur der in wararing. Ara pasander a Parisi, ma ara pasander kai a tene los takis.
11A Parisi i tur ma i wararing suri ut lenri, ‘God, a watung wakak torom ui, uni ka elar nam ara taro kai, a kum tene wolong, det ra ka det tokodos, ma det ra det pam a sakino nam tu ino anun taio o nam tu musano anun taio, ma ka elar kai nama tene los takis iri i.
12A ser wewel aru bung un ara wik, ma a ser pitar arara utna tagun ara noino utna ra a pam pat pasi.’
13Ikut a tene los takis i tur gisen taru, ke tatado usapat netes una langit, uni i maimai. I raprapusi kut a romrobono nama tupunuk, ma i watungi lena, ‘God, un maris iau, a tene sakino iau.’
14A watungi tamot, a musano ri, ra i milet melet sur anun a rumu, i sa tokodos umatan o God, ma ara pasander awu. Uni det rop ra det ulabo pas det, din unatino det. Ma osi ra i unatino pasi, din ulabo pasi.”
15A taro det los a kum nat liklik torom o Iesu sur in ubek aru lamano sapat netes un det. Ra a kum nat na ususer det tama i lenra, det turbat det.
16Ikut o Iesu i kabo pas a kum nat liklik toromi, ra i watungi lena, “Mot in madek ru a kum nat liklik sur det in nan torom iau. Gong mot turbat det, uni a matanitu anun o God anundet ra det lenri.
17A inanos mot nama lingmulus, osi ra ken ruk una matanitu anun o God elar nama natlik, ken ruk lar pas.”
18Ara mugumugu i ting o Iesu lena, “Wakak na Tene Ususer, asau ra an pami sur an rakon a nilaun tukum?”
19O Iesu i balu i lena, “Sur asau ra u watung iau a wakak? Katutaio i wakak, o God sot kut.
20U tasman a kum Warkurai: ‘Gong u pam a sakino nam tu ino anun taio o nam tu musano anun taio, gong u um doko taio, gong u wolong, gong u etakun torotoro, un ru o tamam ma o nam.’”
21A musano ra i balu i lena, “Turpasi ra a natlik utmakai tuk uniri, a ser mur a kum Warkurai rop ri.”
22Ra o Iesu i longoro i, i watungi tano lena, “Ara utna mukut ra kabaut u pami. Un siuru ru anum a kum utna rop, ra a mani taguni, un tabor a kum sibo na taro nami. Ra un pami lenra, anum a wakak na ululeng kusapat una langit. Numur un nan urin ma un mur iau.”
23Ra i longoro a wasiso ri i tupunuk doko, uni i a tene gongon sakit.
24O Iesu i tama i, ra i watungi lena, “I ngangitin doko torom a kum tene gongon sur det in ruk una matanitu anun o God.
25In ngangitin sur a kamel in ruk una mato na sur na susuk, ikut, i ngangitin doko ut, sur a tene gongon in ruk una matanitu anun o God.”
26Ra det longoro a wasiso ri, det iting lena, “Ra i lenra, osi mo ra din ulauni?”
27O Iesu i balu det lena, “Asau ra a taro ka det pet lar pasi, o God in pet lar pasi.”
28O Pita i watungi tano lena, “Tama i, met sa wan gusun anumet a kum utna rop, ra met mur ui.”
29O Iesu i watungi tandet lena, “A inanos mot nama lingmulus: Ra taio in nan gusun anun a rumu, o gusun anun a ino, o a kum tistisino, o gusun o nano, o gusun o tamano, o a kum nutnutunu, kibino una matanitu anun o God,
30una nilaun ri, din tabori nama susut na utna lenri ra i sa wan pas gusuni. Ma una nilaun numur din tabori nama nilaun tukum.”
31O Iesu i ben gisen pas anun a noino ma aru nat na ususer, ra i watungi tandet lena, “Tama i, iri dat wan nanan usapat o Jerusalem, ma din pam sot pas a kum utna rop ra a kum poropet det sa tumus tari una Nutun a Musano.
32Uni din pitar tari torom det ra awu sur a taro Juda. Det in urongon laulau uni, det in ban laulau i, det in ibisi, det in mirasi, ma det in um doko i.
33Ra a tulu bung in rop, in katutur melet.”
34A kum nat na ususer ka det talapor una kum utna rop ri. A kukuraino kura i parau, ma ka det tasman asau ra o Iesu i wasiso uni.
35Ra o Iesu i wan milau o Jeriko, ara musano a pulu i kis taru una papor ina kisapi, i ser saring utna.
36I longoro a kunur na taro det wan nanan milau, ra i iting lena, “Asau ra?”
37Ra det inanosi lena, “O Iesu a te Nasaret ri i wan sakit dat.”
38Ra i kakabo sapat lena, “Iesu, a Nutun o Dewid, un maris iau.”
39Det ra det mugu, det turbati sur in kis wowowon. Ikut i kakabo dekdek makai usapat lena, “Nutun o Dewid, un maris iau.”
40O Iesu i tur sikot, ra i itula sur din ben pasi toromi. Ra a pulu i sa wan milau i, i tingi lena,
41“Asau ra u nemi sur an pami un ui?” I balu i lena, “Labino, a nemi sur an tamtama.”
42Ra o Iesu i watungi tano lena, “Un tamtama! Anum a nurnur i sa utamtama pas ui.”
43Uniutra i tamtama, i mur o Iesu, ra i watung ulabo pas o God. Ma a taro rop kai ra det tama i, det watung ulabo pas o God.
