1Zakɔɓe ná-doun zunuiti tolini, é ɠɛ ti ma: «À ɠaalɛ ba, gè faiti bo wo ma, niiti ti ʋaazu ɠɛɛzu ga woye ʋelela ʋelei.»
2À ɠaalɛ ba, wo woilo mà ga pagɔ, Zakɔɓe ná-doun zunuiti! À woilo wo-ɠɛɛ Izelayɛle wooi ma!
3Luɓɛn, ɗa ɠa è ga dòun mɔungi, nà-zɛbɛi ta sùvikɛi ma mɔungiti, è-losuʋɛ wɔɔlɔai ti pɛ ba, è-zɛbɛi wɔɔlɔai ti pɛ ba.
4È yeeɠaaɓaai eɠɛ ziɛvegi, è la mɔ nu ɠitela losuʋɛ zɔlɔɔga, mazɔlɔɔ è lɛɛʋɛ è-ɠɛɛ laa ʋetei zu, è nà-betei ɠɔzɔʋɛ è lɛɛ vai zu ná.
5Simiyɔn ta Leevi ta ga kɛɛɠɛlointi, ta-woɠa zɔkpɔiti ta ga tooma aniiti.
6Zìi mina ʋɔɔpɛɛ ta-yaava vai ʋa ɲɛgɛlɛin, nà-kisiɛi mina ɠili ta-ɠaalɛbai ʋa! Mazɔlɔɔ ti nu ʋaani ta-yiiɠulagi zu, ti nikɛiti kɔɠɔʋolu ɲataiti teʋeni ta-unsuɲɔi zu.
7Ta-yiiɠulagi ɠotoʋɛ, mazɔlɔɔ gola ɲɔuʋɛ, ta-yiiɓadii ɠotoʋɛ! Nà ti ɠaaɠwɛ Zakɔɓe nɔnɔiti saama, nà ti vaza Izelayɛle zaama.
8Zuda, ɗa ɠa è-ɠɛɛlointi ti ʋaazu è maamusɛzu. È-yeei ɠa ɠɛ è zili nuiti kɔ poluʋɛ. È-ɠɛɛ ná-doun zunuiti ta ɠɛ nɔkɔsu è wu.
9Zuda, dòun zunu, ɗa ga zala zinɛ goi, nii é zeɠezu paa wosuʋɛ! É ɲiibiiti pɛɛ su, é ʋɛɛ, eɠɛ zalai, eɠɛ zala zaai, ɓɛ ɠa a zoo é buzeɠe pɛɛzuʋɛ?
10Kundiɠilai ma lukpɔi la ɠulaa Zuda ʋɛlɛyeɠei ʋa pɛ, anɛɛ tɔgi maazuɓaa nui ná-poogi la ɠulaa kɔɠɔ yɔɠɔzuʋɛti, eyɛsu nii tukpɔi ga nɔnɔ naama nui ʋa, nuiti ti ɠolo bɛ.
11Toɠa ná-soovalegi ɠili leezɛn lɔkulugi ʋa, é ná-soovale saai ma yiʋoi ɠili ma lɔkulu pagɔi ʋa. Toɠa ná-seɠei gba dɔɔ ɗɛi wu, é ná-seɠe maazu zeɠei gba leezɛin ma ɲamai wu.
12Gaazuɠɛzɛiti kpɔiʋɛ su ga dɔɔi, nɔnɔi ɲiigaiti koleʋɛ.
13Zaɓulɔn ɠa zei Kpoloɗɛ Wolai ɠobaʋɛ yooiti su, toɠa zei ziɛlaʋɛ, ɓatoiti tosuʋɛ, ná-zou ɠwɛpelemaʋɛti ta zeeli Sidɔn yooi ʋɔ pelei.
14Isakaal ɠa ga soovale sinɛi suɓaai, é laani togani makɛ zasa felegɔiti zɔɠɔzuʋɛ.
15É ɗa ka ga ná-dooɠo bosuʋɛ ʋagɛ, zooi wola ʋagɛ. É ɗa ɓili kasɔi wu, é ɗa ɓɔɠɔ lɔ duɔlai ma wotii zu.
16Dan ɠa ná-nuɓusɛiti tukpɔɠaaleʋe, eɠɛ Izelayɛle ná-bolodai gila.
17Dan ɠa ɠɛɛzu pelei zu ga kaalii, é ɠɛ ga pɛɛɠaalii pele goi zu, é sooi ɲi kɔɠɔ libiligi ʋa, soo ɠɔma nui loo daazei.
18Ee, Ɠɔoɠɔ GALAGI, kìtogɛ ɗa-ɠizo fai ʋa!
19Toosu nuiti ta ʋa Gade laalɔɠɔma, kɛlɛ toɠa wuzeɠe, é laalɛ ti wu, é ti ziɠa ga ɠɔɠɔi.
20Asɛɛl ná-zooi zu ɠa daamianigi a ɠɛ ná ga bɔɔlɔa. Toɠa masa daamiani pagɔi kpein kula.
21Nɛfetali ɠa ga dopai, é ɓɔɠɔ yeema, é ɗa ʋili, é ɗa ziʋo ʋagɔiti pu.
22Zozɛfe ɠa ga gwaa wulu ʋagɔi ma ʋɔnɔbai, gwaa wulu ʋagɔi ma ʋɔnɔbai, é ziɛungi ɠobaʋɛ. Ma ɓekegiti buzeɠeʋɛ, ti zɛlɛ siɠigi maazu.
23Ti ɓaaɠogɛ ma, ti kilɛgiti pili ma. Kilɛ pili nuiti ti ɠɛni ga tɔun sili nuiti.
24Kɛlɛ é ná-kilɛgi zogɛ kpaan tɔ ɓɔɠɔi, zeeiti sulogɛ ga Zakɔɓe ná-Zɛbɛ-Su-ƓALAGI yeeiti, nii é ga Izelayɛle makɛ nui ta ná-fasai.
25È-ɠɛɛ ná-GALAGI zaalai zu, nii é ga ɗa-ɓɔba nui, GALA Zɛbɛi-Pɛ-Maliɠii, nii a tuya loo è ʋɛ, ɗa tuyaiti sɔlɔɔ, ti zeɠezu maazuʋɛ geeɠɔlɔgi zu, ta tuyaiti ti ɠulazu ziɛ ɓomaʋɛ zooi wu, ta doun mɔinmɔingiti ta togani ɓulugiti.
26È-ɠɛɛ ná-tuyaiti zeeɠaaɓaaʋɛ, ti leʋe sɔ̀lɔɔ nuiti tɔnɔiti ba, eyɛsu é zeeli ɠɔoɠɔ gizeiti kwɛgi. Tuyai naati ti yei Zozɛfe unma, é yei, é la kɛɛɠɛlointi ta-ɠundiɠii losaamaʋɛ!
27Ɓɛnzamɛn ɠa ga zuluɓui, nii é anii ʋalizu ga, sobui é ná-ani zogai mi, kpɔkɔi, é kɔɔzoganii ɠaaɠwɛ.
28Naati kpein ka ti ga Izelayɛle ná-boloda puugɔ maazu felegɔiti (12), pele ɠana ti-ɠɛɛ naama ɓɔɛiti boni la ti ma, é ɗa tuya loo ti ʋɛ. É tuya looni ti ʋɛ, ɛsɛ gilagilagi ta nɔnɔ ma luyai.
29Naa ʋolu é nii ma levei veeni ti ya ga: «Nà ga ʋa liizu kɛ̀ɛni pɔ, ti zaai. Wa màaɠulu mɛ̀mɛwolani kobaʋɛ, pugi zu, é Ɠɛte nui Efelon ná-kpalagi zu,
30Makepeela ɓalagi ma ʋugi zu, Mamelee ɠobaʋɛ, Kanaan yooi zu. Kpalagi naa ɠa Aɓalaame geyani Ɠɛte nui Efelon ma, é ɠɛ bɛ ga maaɠulu bosuʋɛ.
31Ná nɔ ɠa ti Aɓalaame ta anzai Sala maaɠuluni ná. Ná nɔ ɠa ti Izaake ta anzai Eleɓɛka maaɠuluni ná. Ná nɔ ɠa gè Lea maaɠuluni ná.
32Kpalagi ta pugi é ɠɛni su, ti ɠeyaa ɠɛni de Ɠɛte nuiti ma.»
33Siɛgi zu Zakɔɓe ɓeni da ga deveiti fe ná-doun zunuiti zea, é laani ʋolu betei zu, zii looni, é za, é li mɛmɛwolani pɔ ti zaai.
