Daalɛa 49 - Bibeli Luayãtaalá

¹Yakↄbu a nɛ́ↄ sìsi, ↄ̃ à mɛ̀: À kãaamazi, mí yã́ pↄ́ a á le gbɛzã oɛ́.

²À kↄ̃ kãaa ma nɛ́ↄ, à swã́kpa, í á mae Isaili yãma.

³Lubɛni ma yoa, ma gbãa, ma gↄ̃sakɛ nɛ́ sɛ̃́ia, n gawi ń n ikoo dɛ ń gbɛ̃́ↄla.

⁴Ń pãsĩ lán ísↄ̃wa, kási ńyↄ̃ↄ dɛńlao, asa n dɛdɛ n da n mae wúlɛkĩia, n gbadà ma nↄↄ dowaɛ.

⁵Simɛↄ ń Leviio mɛ́ kↄ̃gbɛ̃ↄ ũ, aa pãsĩ ń fɛ̃ndao.

⁶Ma lɛ́ kú an lɛkpaaĩ guuo, ma bàa kúńnↄo. Asa aa gbɛ̃́ↄ dɛ̀dɛ ń pↄkũmao, aa zuↄ kĩzã zↄ̃̀zↄ̃ lán kↄ̃̀ↄ yã́wa.

⁷Lua láaikɛmá ń pↄkũma zↄ̃ↄ yã́i, aà lɛkɛnɛ́ ń pↄfɛ̃ pãsĩ yã́i. Má ń kɛ̃kↄ̃wa Yakↄbu buiↄ guuɛ, mí ń buiↄ fãaa Isailiↄ guu.

⁸Yuda, n gbɛ̃́ↄ n sáaukpa. Ńyↄ̃ n ibɛɛↄ kṹ ń nↄ̀ɛ, n mae nɛ́ↄ kúlɛnɛ.

⁹Yuda dɛ lán nↄ̀ↄmusuwa. Ma nɛ́pi ì su ń toekao, ì gaɛ ì wúlɛ a tòou. Démɛ a fↄ̃ aà vui?

¹⁰Kpala a go Yudalao, aà buiↄ mɛ́ aaↄ lípana kũa e kpalade àↄ mↄ́, bui píi i misiilɛɛ̀.

¹¹A a zàa'ĩna dↄ vɛ̃ɛliwa, a a zàa'ĩn nɛ́ ye vɛ̃ɛli maawa. Vɛ̃ɛ aↄ diaàziɛ, iↄ pↄ́ píò, iↄ a ula pí ń vɛ̃ɛbɛ'io.

¹²Vɛ̃ɛ a aà wɛ́ tɛ̃akũ, vĩ i aà swaa puakũ.

¹³Zabulↄni aↄ ku ísia saɛ, aà bùsu aↄ dɛ gó'ilɛnadↄdↄkĩi ũ. Aà buiↄ bùsu lɛ́n Sidↄ̃ lɛ́u.

¹⁴Isakaa dɛ lán zàa'ĩn gbãawa, ìↄ wúlɛa asoↄ zãnguo.

¹⁵Tó aà buiↄ è an kã́mabokĩi maa, mɛ́ an bùsu na, aa koo ń aso zíɛɛ, aai zↄzĩkɛnɛ́.

¹⁶Dã a a gbɛ̃́ↄ yã́gↄ̃gↄ̃ a zɛ́wa, aↄ dɛ Isaili buiↄ do ũ.

¹⁷Dã buiↄ aaↄ dɛ lán mlɛ̃ pↄ́ kú zɛ́ lɛ́wa, lán sↄ̀gbalawa zɛ́wɛwɛna saɛ. Aa sↄ̃́ só a koewa, sↄ̃de i bↄlɛlɛ kpaanla.

¹⁸Dii, ma wɛ́ dↄnzi ǹ ma suaba.

¹⁹Gada buiↄ sↄ̃, zĩgↄ̃ↄ ãnamá, kási aali pɛ́lɛńziɛ.

²⁰Asɛɛ buiↄ blɛá blɛ nísideɛ, blɛ pↄ́ dɛ kía blɛ maa ũ ↄ̃ aali kɛ ń bùsuu.

²¹Nɛfatali buiↄ dɛ lán banawa sɛ̃u, aa nɛ́ kɛfɛnaↄ i.

²²Yosɛfu buiↄ dɛ lán lí nɛ'ina pↄ́ kú nibↄna saɛwa, aà gↄ̃naↄ fɛlɛ da gĩa fↄ̀ↄↄ.

²³Kàzunaↄ íbɛlɛsɛńnↄ, aa ń yá ń kao.

²⁴Aaↄ ń sá kũa deesai Yakↄbu Lua Gbãade sabai, an ↄ gbãa mɛ́ a gↄ̃i vĩ Isailiↄ Gbɛ pↄ́ ì dↄaanɛ́ yã́i.

²⁵N mae Luapi mɛ́ a dↄnlɛ, Gbãapiidepi mɛ́ a báaadangu ń lou'i pↄ́ ì bↄ musuo, ń ɛ̀fãai pↄ́ kálɛa tↄↄlɛ zíɛo. N nↄↄ ń n pↄ́ↄ aaↄ dɛ nɛadeↄ ũɛ.

²⁶Sa'olɛ pↄ́ n mae n gba zↄ̃ↄ dɛ ma deziↄ pↄ́a, a zↄ̃ↄ dɛ gbɛ̀sĩsĩ ziↄla. Lua to pↄmaaↄ su Yosɛfu miwa, asa ↄ̃mɛ bɛɛɛ vĩ a gbɛ̃́ↄ guu.

²⁷Bɛ̃yãmɛɛ buiↄ aaↄ dɛ lán àwalɛwan pãsĩwa, aa lɛ́lɛ gbɛ̃́ↄwa kↄↄ, aai ń pↄ́ↄ naaa oosi.

²⁸Isaili bui mɛ̀n kuɛplaↄn we píi. Sa'olɛ pↄ́ an mae ń gbán we, baade ń a pↄ́o.

²⁹Ɔ̃ a ònɛ́: Tó ma ã́nuatò, à ma vĩ ma deziↄ gbɛ̀'ɛ pↄ́ kú Iti bui Ɛfↄ̃nↄ bua guu.

³⁰Gbɛ̀'ɛpi ku Mapelaɛ, Mamale gukpɛ oi Kanaa bùsuu, bua pↄ́ Ablahaũ lù Iti bui Ɛfↄ̃nↄwa gɛvĩkĩi ũ.

³¹We wà Ablahaũ vĩ̀u ń a na Salao. We wà Izaaki vĩ̀u ń a na Lɛbɛkao. We ma Lea vĩ̀u.

³²Wà búpi ń a gbɛ̀'ɛo lù Itiↄwaɛ.

³³Kɛ́ Yakↄbu lɛ́pi dìlɛ a nɛ́ↄnɛ a làa, à ɛ̀a wùlɛ, ↄ̃ à gà.

Daalɛa 491234567891011121314151617181920212223242526272829303132333435363738394041424344454647484950

Daalɛa 49
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40
41
42
43
44
45
46
47
48
49
50