Bumpaida 49

1

2

3

4

6

7

8

9

11

12

13

14

15

16

17

18

19

21

22

24

25

26

28

29

30

32

35

37

39

40

41

42

45

46

47

48

49

50

¹Mape Iakob obampa diamono mampe auweieno tauma me wane wanase, “Dima e manlawo ando segalepia umanawa wapo etana.

²Ne obaina, winlene asisuneana! Ne Iakob e mamala asisuneana.

³Ruben, e ipa ne otona tautuwa, ne apana sanaa mukamukaua wainedina walamawe e gamoena. E apana debama ita mukamukaua mai ne obaina isiwa ruau, dia.

⁴Tane e dewaa ipa abaia noseidie leusaituleidia rua, mai mida enabodaepia rua, dia. Tauma e ando mai eboeboua segaita, dia. Ipawa e mamaa manainapa nata ninaiten ita e mala debamaia ne osonawo ituana.

⁵Tane Simion e wana Liwai nata e dewala deawaa. E nata onala puraiwa oteile mampe rebareba onaitilana.

⁶Ne ando mai e manlawo wimpa ba e waninala bedewenteapa, dia. Ipawa e nuala kadileidia walamawe apana bomoilana tane do e waninaitilana walamawe kau wau epawirosimoilana wasi baiwa.

⁷Ita e nata eba nuasigasigaitilana baiwa, God matangelawa osolawolepio kadiwa rebarebaida dewasanuno segalempa. Sa baiwa ne e tanalepo Israel damba waimoia bolau bedewainta deawantana.

⁸Iuda, e sosoa ando ituposiempa ita e mamaa obampa e manawo imimpu emisintompa, ipawa e emalawoa apanawa gadompau osowe wadadomone aimona.

⁹Iuda ne otona, e ipa pue onawa laion rua, pue sa moiawa adediboe nadie aupe aleidie bubualeidia rua. Mida wisepie e sinsiepi?

¹⁰Ita warere koinawa Iuda witape winepi ita e nosinosia warerentompe waimompo koina sa apanawaida wisepi. Ita dan uwa daitada apanawa me aiawa ruawantompa.

¹¹Tane e manawo wain eubu iawa uarakadilepi ita e donkia wadone aitone wain iawa osowe taunadoe ena, ita e donki otopa sanaa wadone aitone wain iawa euda osowe taunadoe ena. Ita wain ipawa naumpatewampo nampalewae moawa winompo mampe garawa mitamompa.

¹²Me emawa osinakadilempa wain rua ita moawa nepa sapusapuaida ama sogapa rua segalepi.

¹³Tane Sebulun, e ando owa tampe bolaa dewasae wana ita e bolaawo waa wimompe odompe obasa euwa bedewe enompa, ita e tawoa alepia makawa bola debama Saidoniwa enepitudepi.

¹⁴Ita Isaka, e ipa donki dea mukamukauaida puraiwa saiwa do obasa di ituitona.

¹⁵Tane e aitone bola euda ewone wanempe bubuaitona, tane apana da nolau dewasaa baiwa dieempe sai debama osoawo itumpo nolaitona.

¹⁶Tane Dan, e ionoite wane apanaa oniamona Israel damba isiwa ruau.

¹⁷Tane do e ipa mota kadiwa onawa rua inta waiwe anuitone wanempe ita oas wimompe antompa e rowoitone wau adona. Ita mo poka etompe apana osouwo waimoia epaubamompo nomompa.

¹⁸O Iawe God ne sumanaiantedine intaewaewantedina inanea baiwa.

¹⁹Tane Gad, e poi apanawa wadeepue kadiepua baiwantompo e mo onau enee tanamowo antopu.

²⁰Ita Asea, e ando iraitona bedewe nanaa eubu daitada inintompa ita nana sa wadone laulaitona ewaewa eudida warere ewompe nanawa menasampa.

²¹Tane Napitali, e ipa pue ebowa waia dia, taudosia di leidia rua wanempe sedaa eubu os gamoitona.

²²Tane Iosep, e ipa wain naunautetela rua, wain naunautetela sa esa aleidia tampe enede ita ragapu gonaa asiasi inintompe odompe antompa.

²³Tane e emalawoa apanawa nuakadintopue ona badowa dewasapue pidu mampe enepue ita kadiwa daitada dewasapu e manawo.

²⁴Ita Iosep, e pidu teinee badowa enakasaitaa mabua mai garigarilepi, dia. Ipawa Iakob Godiwa ipa mukamukaua ita do Israel onioniau Godiwa, me ipa seu e sauepio osowe badowa enakasaitaa.

²⁵Ipawa mamaa Godiwa mida e sauedia ita me mida mukamukauaida sauwa euda osoawosapi, me sauwa euda unu uboe wapiaubepio iepi ita do dogo bedewe esa dewasapio wisepi ita puea otootontompe uarantompa. Ita do e nosinosia uaraia eneepi.

²⁶Tane e mamaa sauwa ipa debamaidalen mai wadi debamau osowe sau iedia rua. Tane e mamaa sauawa ipa debamaidalene wadi uduudu amboiamon. Iosep, tatataa bedeuwoe ionoitaa ita sau euda e osoawolempo wanempa.

²⁷Ita Beniamin, e ipa elo onawaa rua, tadinaida e moia bomone nana tane rawilempo e moia sa kampa odaitona.”

²⁸Tane ema ipa Israel damba 12, ita mo mambu dima insedie ita dewau ewedia rua wane mo deadea osouwo sau euda itun.

²⁹Ita me mo diadewasamone wanase, “Ne bonteape mamamana wawo anteapa baiwantedina. Tane e ne mamamana bontone wineiawo Itai apanawa Epron bolawe guba bedewe dobosaneana.

³⁰Tane guba sa bola Mapela Mamre tampe Kanaan bolawa bedewe winede. Abraam Epron Itai apanawa bolawa uduudu bo teamompa baiwa gimaralene en.

³¹Ita sape Abraam manainapa Sara nata ita Aisak manainapa Rebeka nata dobosamoiena ita do ne Lea sape dobonten.”

³³Tauma Iakob obampa diadewasamono dialeno aupe me wawa nukusamone ita ituwa bolawa oso itulene ita boleno aleupa me nosinosiwa bontone antonawo wawo alen.