1Ma Iakob i ga oro pa ra umana natuna, ma i ga biti: Avat a vana varurung, upi ina ve avat ta ra magit ba na tadav avat ta ra umana bung namur:
2Avat a ki rangup ma avat a valongore, avat a umana natu i Iakob; Ma avat a nuk pa ra tinata kai Israel tama i vavat.
3Ruben, u kaugu luaina, kaugu niongor, ma ra turpai kaugu dekdek; I boina tuna kaum kini, ma i ngala kakit ra dekdekim.
4U varogop ma ra tava i buabuai, ma pa una vatur vake ra kini lua; Tago u tar ko rikai ta ra vava kai tamam Ma u vadur pa ia; i ga tutua ta kaugu vava.
5Simeon ma Levi dir turana, Kadir pakat i da ra vargal na vinarubu.
6A tulungeagu, koko una ruk ta kadir kivung, Ma koko dital a ki varurung ma kaugu variru; Tago ta kadir kulot dir ga ubu doko ra tarai, Ma ta ra dekdek na nuknuk i dir, dir ga kita vakaina ra umana bulumakau.
7Na kaina kadir kankan, tago i ga ngangal, Ma kadir kulot, tago i ga bilak; Ina tibe varbaiane dir ta ra gunan kai Iakob, Ma ina vue imimire dir ta ra gunan kai Israel.
8Iuda, a tara na turam diat a pite pa u, A limam na va ta ra inoa i kaum lavur ebar; A lavur natu i tamam diat a va timtibum piram.
9Iuda ia ra nat na leon; Natugu, u tar ko rikai, ma u kap ra magit u ga ub ia; I tar ki bul keke, ma i tar diop da ra leon, Ma da ra kon, a tana; to ia na vangun ia?
10A buka na king pa na takari kan Iuda, Ma ra buka na varkurai pa na takari kan ra ura kauna, Tuk tar ta nam ra bung ba Silo na pot, Ma ra umana vuna tarai diat a toratorom tana.
11Na veve kana nat na os ta ra davai na vain, Ma kana nat na as ta ra davai na vain i ngatngat; I tar puk vagomgom kana kolot ta ra polo na vain, Ma kana mal na minong ta ra gapu i ra vuai ra vain.
12A kiau na matana na meme ma ra tava na vain, Ma ra pal a ngiene na pua ta ra polo na u.
13Sebulun na ki ra valvalian, Ma ra umana parau diat a pukapukai tana, Ma kana langun na tuk tar uro Sidon.
14Isakar a ongor na as, I va livuan ta ra umana kikil na sip.
15Ma i gire ra vava i boina, ma ra gunan i vakak; Ma i tul tar ra ul a varana upi na pupuak, Ma i ki na vilavilau ma ra papalum.
16Dan na kure ra taraina da tikai ta ra umana vuna tarai Israel.
17Dan na da ra vui ta ra nga, a kaina vui ta ra pal a nga, Nina i karat ra inabut i ra umana os; Upi nina i ki tana na bura murmur.
18Luluai, iau tar ki ung upi kaum valavalaun.
19Gad, a loko na tarai na vinarubu dia varkamkamir pirana, Ma ia iat na rua kamkamir ra inabut na kau i diat.
20Aser, ana gem na bira, Ma na vuai ra kalami na magit na nian ba na topa ra king.
21Naptali i da ra me di tar pala vue. I vakak kana tinata.
22Iosep a nat na davai i manga vuai, A nat na davai i tur pire ra kivu na tava, Ma ra ingaingarina dia ko lake ra liplip.
23A umana tena panak dia tar manga vakaina, Dia tut ia, ma dia korot mur ia;
24Ma kana panak i ongor vatikai, Ma di ga vadekdek ra limana, Ta ra lima i ra Tena Ongor kai Iakob; Ta ra iang i ra tena balabalaure, ra vat ki kai Israel;
25Maia, ta ra God kai tamam, nina ba na maravut u, Ma tai ra Dekdek Muka, nina ba na vadoane u; Ma ra nidoan marama ra bala na bakut, A lavur nidoan mara ra tung ta ra bala na pia, A labur nidoan ta ra u na vavina ma ra tatal na bul,
26A umana nidoan kai tamam Dia tar lia ta ra umana nidoan kai kaugu umana lualua, Di tuk tar ta ra langun aro iat kai ra umana lualuana i tur tukum; Diat a ki ta ra ulu i Iosep, Ma ta ra tunurot na ulu i nina i luluai pire ra tara na turana.
27Beniamin, a leing na pap, a tena varkarat; Ta ra malana na konakonom ra magit i ga ub ia, Ma ta ra ravian na tibe ra magit i ga ra pa ia.
28Diat par go a vinun ma a ivu vuna tarai Israel, ma go ra tinata tama i diat i ga tatike ta diat ma i ga tata vadoane diat me, tikatikai varogop ma kana varvadoan iat.
29Ma i ga tul tar ia ta diat ma i ga biti ta diat: Iau ina ki varurung boko ma ra umana tamagu; avat a punang iau pire ra umana tamagu ta ra niiga nina ta ra pia na uma kai Epron a te Ket;
30ta ra niiga ta ra pia na uma kai Makpela, maravai Mamre ta ra gunan Kanaan, nina Abaraam i ga kul kapi ia varurung ma ra pia na uma tai Epron a te Ket, upi na vatur vake ta pia na pupunang tana;
31di ga punang Abaraam tana, dir ma Sara kana taulai, ma di ga punang Isak tana, dir ma Rebeka kana taulai, ma iau ga punang Lea tana;
32a pia na uma ma ra niiga tana, nina di ga kul kapi ia ta ra umana natu i Ket.
33Ma ba Iakob i ga ngo ma ra vartuluai pire ra umana natuna, i ga vung ra kauna mulai ta ra vava, ma i ga vung vue ra tulungeana, ma i ga ki varurung ma ra umana tamana.
