1Ne zutun mid-umew ni Jacob is menge anak din, ne ke sikandin te, “Pen-uvey kew kayi su wey ku sikiyu mekeǥiyi ke hengkey is egkeulaula keniyu keuzemà.
2Sikiyu is menge anak ku, uvey kew wey pemineg kew te menge lalag ku te amey niw.
3“Sikew Reuben, is kinekekayan he anak ku, iyan ka nehuna he veǥas te kegkemaama ku. Edhuna is kegkeventuǥa wey kedtehuza kenikew te menge suled nu.
4Piru iring ka te edìdì he wahig, su kenè nu egkeeǥen is kegkeiveg nu. Umbe mibpekidhilavet ka te esawa ku he suluǥuen, kenè ke en maan lavew te zuma.
5“Sikiyu Simeon wey Levi, ebpeked-iring kew su egemiten niw is gumaan niw te kebpendaagdaag.
6Kenà a edtampu etawa edtelavuk te menge kevurunan niw su tenged te kegkepauk niw ne ebpenhimetayan niw is menge etew, ne emun meupiya is gehinawa niw ne ebpiangan niw is menge vaka.
7Edrewakan ku sikiyu tenged te kegkepauk niw he utew subra. Ebpedsusuwayen ku is menge kevuwazan niw kayi te Israel.
8“Sikew Juda, edeliǥen wey edtehuzen ka te menge suled nu. Ne egkezaag nu is menge kuntada nu.
9Iring ka te nati he erimaung he ebpekaahà te edewiyen din, ne edlikù sikandin diyà te elesè din, ne ziyà sikandin edleku. Ne wazà minsan hentei he ebpekesamuk kandin.
10Pedayun ka he edumala, Juda. Ebpuun te kevuwazan nu is egkehimu he menge sineriǥan. Umbe ebeǥey is menge nasyun te vuhis diyà te kenikew wey ebpevayèbayè dan kenikew.
11Ne utew uuzaran is tanè nu; umbe minsan pa ke idtagkes nu is asnu ziyà te ǥawed he paras he utew merapung, ne kenè din pa egkeamin te edtabtab tenged te kehabet din. Ne minsan pa ke ibpemìpì nu pa is binu ne kenè pa heini egkaamin.
12Umbe te subra he ked-inum nu te vinu, ne ebmeziǥà is mata nu. Ne tenged daan te subra he ked-inum nu te ǥatas, ne ebmeputì is ngipen nu.
13“Sikew Zebulun, ed-ubpè ka ziyà te veyvey te zaǥat. Ne is kenikew he lugar ne egkehimu he zungguan te menge untuzà. Ne is kenikew he tanà ne taman diyà te Sidon.
14“Sikew Isacar, iring ka te utew mezesen he asnu piru edleku ke zà diyà te ubpeey te menge kerehidu.
15Ed-entusen nu is ked-uripena kenikew minsan pa ke ibpetiang ka te meveǥat wey ebpeǥesen ka he edterebahu, asal meupiya wey uuzaran is lugar he egkeubpaan nu.
16“Sikew Dan, ne metazeng he kukuman is ibeǥey nu ziyà te menge sakup nu he sevaha he tribu te menge Israilihanen.
17Egkeiring ka te uled diyà te zalan he ebpemengaǥat te paa te kudà, ne egkeulug is ed-untud dutun.”
18Ne migkaǥi si Jacob te, “He Nengazen, edteǥad a te kedlibri nu.”
19Ne impelaus ni Jacob is egkeǥiyen din, ke sikandin te, “Sikew Gad, edsurungen ka te grupu te menge tulisan, piru edel-asen nu sikandan dutun te kebpelaǥuy zan, ne ebelesan nu sikandan.
20“Sikew Asher, egkehimu ka he uuzaran. Ebpekeraǥun ka te menge keenen he para te menge dungganen he menge etew.
21“Sikew Naftali, iring ka te impelayud he selazeng he utew memekempet is menge nati zin.
22“Sikew Jose, iring ka te meseǥila he asnu he ziyà te kilid te serebseb etawa ziyà te kelendiǥan.
23Edumutan ka te menge mememanà. Ne ebpenaan ke zan tenged te kegkeuringer zan,
24piru edsiguduwan nu zaan sikandan ebpenaa. Ne kenà egkeewaan te zesen is beklawan nu, tenged te tavang te Gemhanan he Megbevayè ku he ebantey wey eputà he vatu te Israel.
25Iyan sikandin kes Mekeǥeǥehem he Megbevayà he ed-ezapen te menge kepuun nu he edtavang wey ebpenuvadtuvad kenikew. Ebeǥayan ke zin te uzan wey wahig diyà te serebseb. Ebeǥayan ke zin daan te mezakel he menge anak wey menge uyaǥen.
26Guntaan, utew pa mezakel is menge ibpenuvadtuvad ku; lavew pa te meupiya he menge vuvungan he utew uuzaran. Berakat he mezawat nu heini he menge penuvadtuvad, Jose–iyan ka lavew te menge suled nu.
27“Sikew Benjamin, iring ka te zumezaas he asu, he maandew wey mezukilem is kebpenhimatey zin wey kegkaan.”
28Iyan heini sikan is 12 he anak ni Jacob he menge tribu te Israel. Ne iyan haazà menge petizaan ni Jacob te kada sevaha kandan.
29Ne zutun duen intelaan ni Jacob diyà te menge anak din, ke sikandin te, “Meǥaan e en ebpekaamur te menge kepuun ku he nemematey en. Ne emun egkehitavù en heini, ne ziyà a keniyu ileveng te surung duma te menge kepuun ku he ziyà te vevesukà ni Efron he Hitihanen.
30Haazà he vevesukà ne ziyà te Macpela, he ebpekesinaru te inged he Mamre, he sakup te Canaan. Mibpemasa ni Abraham haazà is bevesukà diyà te ki Efron he Hitihanen su wey zuen penlevengè din.
31Diyà ileveng si Abraham wey is esawa zin he si Sara, ne ziyà daan ileveng is amey ku he si Isaac wey is iney ku he si Rebeka, ne ziyè ku zaan ileveng si Lea.
32Iyan haazà sikan is surung wey vevesukà he mibpemasa zengan diyà te menge Hitihanen.”
33Ne hein nepasad ni Jacob is menge idtelaan din te menge anak din, mid-ayun sikandin medhizeǥà diyà te hizeǥaan ne minatey sikandin. Ne nekaamur sikandin te menge kepuun din he nemematey en.
