1Kawaa gematanoŋ Jeikobnoŋ merauruta oŋoono kagi qaa kokaeŋ jero: “Oŋo mono horoŋ ajoroogi niinoŋ laaligogianoŋ kanageŋ nomaeŋ koloowaati, iikawaa gejatootoo qaaya iŋisaama jewe mobu:
2“Jeikobwaa merauruta, oŋo mono kaŋ ajorooŋ amagia Israelwaanoŋ qaa geja ama mobu.
3“Oo Ruuben, giinoŋ neenaa mutu meranaga koloojaŋ. Giinoŋ noo ku-usuna ano emba mewe esuŋmumunaa hoŋa mutuya koloona. Qabuŋagaa akadamuya ano ku-usuŋa kanoŋ kouruga yoŋoonoŋ uŋuuguja.
4Haamonoŋ kowe siri qindiiro kalumalu kema kaŋkeji, goo uuganoŋ mono iikawaa so waaro kalugoŋ laŋ kema kaŋkejaŋ. Giinoŋ maŋga noo duŋ eenanoŋ uma qembonanoŋ qeŋ embanawo ena duŋ kanoŋ mono aŋgonjorayawo kolooŋ tilooro. Kawaajoŋ goo qabuŋagaa akadamuyanoŋ mono kouruga mende toroqeŋ uŋuuguŋ ewaa.
5“Simeon ano Liwai yoronoŋ daremuŋwoiga koloojao. Yoroo tiwo wasa gawoŋgaranoŋ mono kike kakasililiŋ kondooŋkeja.
6Yoronoŋ iriŋsooŋsooŋ qaganoŋ eja uŋuri komugi eeŋ totooŋ aiŋaajoŋ bulmakao ejia iyoŋoo kana boro iwoigia laŋ uŋuŋ kotori meendaŋgoya koloogi. Kawaajoŋ yoronoŋ qaa areŋ somoŋgoŋkebaoti, niinoŋ iikawo uumotooŋgo mende amakemaŋa. Ajoajoroo ambaoti, niinoŋ iikanoŋ iyorowo mende toroqeŋ ramaŋa.
7Uukazigaranoŋ geriawo koloojiwaajoŋ ii jeŋ qasuaaŋ oronjeŋ. Uuduuduugaranoŋ kanjaŋawo koloojiwaajoŋ ii jeŋ jororaaŋ oronjeŋ. Niinoŋ kanagesogara kondeema oŋombe yoŋonoŋ Jeikobwaa baloŋ sokoma kembu. Niinoŋ mendeema oŋombe yoŋonoŋ Israel batugianoŋ laŋ gooŋpora ama laligowu.
8“Oo Juuda, goo daremuŋuruganoŋ gii mepeseeŋ goma laligowuya. Goo boroganoŋ mono kereuruga yoŋoo aro kokoŋgianoŋ rabaa. Maŋgaa merauruta yoŋonoŋ mono goojoŋ usugoŋ simiŋ kuma laligowu.
9Oo Juuda, giinoŋ laion gbaworoya kaaŋa laligojaŋ. Oo merana, gii borojaŋ meŋ oro qeŋ neŋ laligoŋ iikanoŋadeeŋ eleema kajaŋ. Iinoŋ laion kaaŋa selia ama qetetereeŋ laion embia kaaŋa kamaaŋ koma eŋkeja. Kuuyanoŋ ii kawali kolooŋ utuŋ mondowombaajoŋ keegia momakeju.
10Ku-usumbaa aiweseya ii moŋnoŋ Juuda yoŋoo borogianoŋga mende uŋuambaa. Eja pombaa gbaruyanoŋ kania batugaranoŋ nano moŋnoŋ ii mende qetegowaa. Qaago! Iyaŋa ano gbiliuruta jiŋkaroŋ duŋanoŋ rama laligoŋ ugi kanageŋ moŋnoŋ asugiro kanageso tuuŋa tuuŋa yoŋonoŋ iwaa jeta teŋ koma laligowu.
11Iinoŋ doŋgia wain apu gere batuyanoŋ somoŋgoro nambaa. Doŋgia meria ii wain apu kasa batugaranoŋ gbadooro ewaa. Iinoŋ opoya ii wain ooyanoŋ soŋgbambaa. Malekuya ii wain kotaa oo sayanoŋ qesaama qejaambaa.
12Wain oo nero jaayanoŋ wain oo apu kaaŋa osaaŋ injaŋ kombaa. Aju tokoya nero jetanoŋ aju ooya kaaŋa taaliwaa.
13“Zebulun kanageso yoŋonoŋ kowe goraayanoŋ laligowu. Yoŋoo gomanoŋ waŋgoya waŋgoya suluŋkebu. Baloŋgiaa jawoya iikanoŋ mono Saidon taoŋ baageŋ kema ewaa.
14“Aiskar ii doŋgi siita koukouya iikawaa so kolooja. Doŋgi qaganoŋ duŋ rarawaa gesoya woi iikawaa batugaranoŋ ama qetetereeŋ lokoliŋ sologoŋ eŋkebaa.
15Lokoliŋ sologoŋ haamo meŋ ero duŋ miria ii saanoŋ sokono gomaŋanoŋ naaŋ totooŋ koloowaa. Ii iima gemata iwoi lombotawo aŋgomambaajoŋ usugoŋ kemero tosianoŋ weleŋqeqe gawoŋ mewaatiwaajoŋ kuuŋ somoŋgoŋ muŋkebuya.
16“Tosianoŋ Dambaa kanagesouruta menduŋgoŋ oŋoŋgi Dan iinoŋ mono aworo (defence) nama qaa dindiŋaajoŋ manja qeŋ laligowaa. Dan tuuŋ yoŋonoŋ Israelwaa tuuŋ tosaaŋa iikaaŋa kolooŋ laligowuya.
17Dan iinoŋ qato mokoleŋ kaaŋa kananoŋ eŋ hooswaa gbakotanoŋ kiro aaruŋ lalaŋaniŋ giliro qaganoŋ rabaati, iinoŋ mono tama gemagema namonoŋ kemebaa.
18“Oo Poŋ, giinoŋ nii kasa gbadonoŋga metogoŋ aŋgoŋ koma nombaatiwaajoŋ jaa riŋ mambomakemaŋa.
19Kike kakasililiŋ tuuŋ yoŋonoŋ Gad kanageso uŋuŋ oŋooŋ laligowuto, Gad yoŋonoŋ mono meleema kanagianoŋ oŋotaaŋ iyaŋgia uŋuŋ oŋooŋ laligowuya.
20“Aserwaa balonoŋ nene moriaŋ mamaga asugiŋkebaa. Kiŋ yoŋonoŋ nene naaŋgiawo neŋkejuti, iinoŋ mono nene kaaŋa ii baloŋanoŋ komoro seiŋ iikanoŋ tosaaŋa ilaaŋ oŋoma laligowaa.
21“Nembaronoŋ aŋaa jaajaa naaŋaajoŋ uulaŋawo lansaŋ gooŋpora amakeji, Naftalinoŋ mono iikawaa so kolooŋ meraboraaŋuruta iŋiima-aiŋaiŋgiawo ii oŋoma laligowaa.
22“Wain gere apu jaayaa kosianoŋ komogi kota mamaga kuuŋ boria giliro kema sopa qisigoŋ seleeŋgeŋ kemakeji, Joosefnoŋ mono iikawaa so kolooja.
23Iwaa kereurutanoŋ tiwo jaŋgbeŋgia meŋ uugere qaganoŋ Joosefwaa tuuŋ ii oŋotaaŋ iŋidoŋ uŋuŋ oŋooŋ laligowu.
24Kaeŋ laligowuto, Jeikobwaa beŋa Anutu ku-usuŋawo iwaa borianoŋ mono meŋ kotiiŋ muro iinoŋ tiwo tokoya mende mesaoŋ boro siita sombaŋa qaa qero laligowaa. Anutunoŋ mono uuwaa lama galeŋa kolooŋ Israelwaa aŋgoŋkoŋkoŋ Toya kolooja.
25Maŋgaa Anutuyanoŋ mono ilaaŋ goma laligowaa. Beŋ ku-usuŋ kuuyaa Toyanoŋ mono kokaeŋ kotuegoŋ gono laligowa: Kombaa kotumotueyanoŋ mono kanakeewaŋga goonoŋ kamaaro namo dusiita emuyaa apuyanoŋ mono goonoŋ kouro merabora ano oro mamaga mokolooŋ oŋoma laligowa.
26Baaŋa baaŋa iyoŋoo kotumotuegianoŋ kambaŋa kambaŋa ejemba sokoma oŋono laligoŋ kougi. Baaŋaa soroganoŋ yambu so nene gawoŋgia meŋ laligogi nene moriaŋ asugiro laligoŋ kougito, goo amagaa kotumotueyanoŋ mono ii kuuya uuguwaa. Kotumotue kaaŋa kaaŋanoŋ mono Joosefwaa waŋaa qaganoŋ ubu. Daremuŋ batugianoŋ poŋ qereweŋa jawiŋ tak-kootoya koloojiwaa laaligoyanoŋ ii kuuya mono eŋ ubu.
27“Benjamin ii kasu kawalia kaaŋa kolooja. Gomaamba so tiwojuŋ tigoŋ oro uŋuŋ neŋ gogoŋ oŋomakeja. Weeŋ asaganoŋ iwoi luluuma qeŋkeji, ii gomantiiŋa so mendeemakeja.” Kiaŋ.
28Israelwaa tuuŋ kuuya jaŋgogia 12 ii kiaŋ. Maŋgianoŋ kotuegoŋ oŋoma qaa kaaŋa kaaŋa jero mogi. Kotumotuegia morota morota ii aŋa aŋa mendeema kuuya kotuegoŋ oŋono. Kiaŋ.
29Kotuegoŋ oŋoma nama qaa kokaeŋ jeŋ kotoŋ oŋono: “Anutunoŋ mono nuano niinoŋ isi alauruna komugiti, iyoŋowo toroqemambaa anjeŋ. Noo qamona ii mono maŋuruna yoŋoo kooroŋgianoŋ kobaa Hit eja Efrombaa baloŋ korianoŋ eji, iikanoŋ roŋ koma nombu.
30Kobaa ii Keinan balonoŋ Makpela baloŋ korianoŋ Mamre kosianoŋ eja. Aabrahamnoŋ baloŋ koria kobaayawo ii isinanaa qasiria ewaatiwaajoŋ Hit eja qata Efron iwaanoŋga sewaŋa mero.
31Aabraham ano embia Saara ii kobaa iikanoŋ roŋ koma oroŋgi. Kaaŋagadeeŋ Aisak ano embia Rebeka ii iikanoŋ roŋ koma oroŋgi. Niinoŋ toroqeŋ Lea iikanoŋ roŋ kombe.
32Aabrahamnoŋ namo koria kobaayawo ii wala Hit yoŋoonoŋga sewaŋa merota eja.”
33Jeikobnoŋ merauruta qaa kaeŋ jeŋ kotoŋ oŋono tegoro kanawoita hororo duŋ eeyanoŋ uro goroŋ qeŋ komuro Anutunoŋ wano isi alauruta yoŋoonoŋ toroqero. Kiaŋ.
