1Jekopu'a amanage huno ne'mofavre amokizmi zamasmi'ne, Eme atru hinke'na henkama tamagrite fore haniazamofo naneke tamasmi'neno hige'za ageno, amanage huno zamasmi'ne,
2Eme atru huta Jekopuna mofavre nagara tamagesa antahiho. Israeli'na nfatimi'mo'na hanua nanekeni'a antahiho.
3Rubeniga nagonesa mofavre moka, ese hihamu ni'afinti ksegante'nogenka zamagterenka mreri vahe mani'nanku, hanve kamo asga hu'ne.
4Hianagi ti hageno evia kna hunka, nagakafina ran kagia omnegahie. Na'ankure, negfa sipare mrerinka haviza hunka mago a'ni'a avazu nehunka sipani'a eri hi'mna vu'nane, mase sipa ni'are mreri'ne.
5Simioni ene Livaikea kogna mani'na'e. Ha' kazikno zanimo'a, mago'a vahe zamazeri haviza hugahie.
6Nagri knare antahi antahimo'a, tanagri antahi antahifina omnegahie. Nagra kema anakisapina omanigahue. Na'ankure znarimpa ahenke'ne vahera akafrigaha'e, Znagra musezampi vu'ne, buli Bulimaka agia agruna nofi akafrina'e.
7Tanarimpa he'zantera tusi huneranantoe, na'ankure tnarimpa hezamo'a arava ohegahie. Tanarimpa nehena, hazenke vahe manigaha'e. Jekopu'na nagri'pintira znatufe atra'nena, Israeli mopafi arure arure hu'za manigahaze.
8Judaga kafu kagnaza kagi erisga hugahaze, Kagri kzamo ha' vahe ka'amokizmi zamanankempi megahie. Kagri negfa ne'mofavremo'za kepri hu'za zamarena regahaze.
9Judaga laioni anenta kna hu'nane. Kagra nenamofoga ne'zga laionimo aheno nenaku kva hiankna hu'nane. Kagrikura vahe'mo'za kagoro hugahaze. Mago vahe'mo'a kvako osugahie.
10Judaga kva vahe'mokizmi azompa kagripi mevava hugahie. Kva vahe azompamo agiarere amunompi me'nesigeno, Nafa'amo henka Sailo ehnatigahie, Hanige'za hakare ranra kumate veamo'za agri ke erizafa hugahaze.
11Donki anentara krepire nofi rentesnankeno manigahie. Agaho donkima avesi'nesia krepi nofitema arentesigura antahi muhara osugahie. Kukena'a waini timpi sese hu'ne, na'ankure, ne'zamo'a amporegeno nehna huga osu'ne.
12Agra rama'a waini tina nenegu huno tare avurgamo'a koranke hu'ne, agra rama'a afumofo amirina nenegu huno ave'mo efetfa hu'ne.
13Zebuluniga hageri ankenare umanigahane. Umani'nesanke'za vente'mo'za efre'za vu'za hugahaze. Mopa kamofo agemo'a Saidon kuma atupare uhanatigahie.
14Isakaga hanve donkie, Tare fenonku'mofo amunompi manigsa hugahane.
15Agrama kegeno knare manigsa kuma me'negeno, ana kumamo knare zantfa hu'negeno, hanave'a erigoteno eri'za eri'ne, ana hu'neanagi henka'a kna'ane kazo kzo eri'za erigahie.
16Daniga kva (jas) vahe tro hunka vaheka'a kva hugahane. Mago naga Israeli kevufi mani'gahaze.
17Ha' osifavemo kamofo ankenare mani'neno, hosimofo aga'me rumpafi amprigeno, agumpi vu'nea ne'mo amefigati asga hurami'ne.
18Ra Anumzamoka nahoke ahesnanegu, kvega mani'noe.
19Gatiga kumza vahe'mo'za kahegahaze. Hianagi rukrahe hunka, zamagumpi zamarotgo hugahane.
20Asaga, hentofa neza eri fore hugahane, Rankva vahe zamenesia neza, hankre'gahane.
21Naftaliga, afi a' afu dia atregeno agareno viankna nehunka, knare so'e naneke'age hugahane.
22Josefega zafa azankunamo rga rente'nea kna hugahane, azankunamo ti ankenare me'neno rga reno, pagagi huno kegina refitean kna hugahane.
23Ha' vahekamo'za atireti hanveti'za hara hunegante'za, kevea negahe'za, kazeri haviza hugahaze.
24Hianagi Josefena azamo'a oragesigeno, ati amo'a hanve tinkeno, keve ahesiana hantaga osugahie. Hanve nentake Jekopu Anumza'mofo azampintira evu oramigahie, ana Anumzamo Israeli vahe afu kva hiankna nehuno, zamagu'vazi havegna hu'ne.
25Na'ankure Jekopu'na, negfana Anumzamo kza nehuno, hihamu'ane Anumzamo asomu huneganteno, anagamu monafinkati asomu huneganteno, mopa agu'afinti tina hnatinigenka asomura enerinka, aminte karimpafinti fore hnaza mofavre'mo'zane asomura erigahaze.
26Kagri negfa'na asomumo'a, nagri nagehe'i asomura agatereno mevava agonagna huno mreri'ne, ana asomumo'a, Josefega kokovite me'nenige'za, kafuhe'za kage anagamute'za kagegahaze.
27Benjameniga tusi'a ha' kragna (wolf) hugahane. Nanterampi freno zga aheno traga hiankna nehunka, kinga'afina refko huno erino ome'mi eme'mi hiankna hugahane.
28Ama ana maka 12fu'a Israeli nagare, nezmafa asomu hunezmanteno zamasmi'nea naneke. Asomu huzmanteno, mago'mago mofona agri'a avamente asomu huzmantetere hu'ne.
29Jekopu amanage huno mofavre naga'amokizmi zamasmi'ne, Nagra fri'na vahe'ni'ane umani knanimo'a kofta nehie. Hagi nafahe'ima ase zamante'naza mopare, havegampi ome asenanteho. Hiti ne' Efroni mopama mizama se'nefi ome asenanteho.
30Makapela mopamofo havegampi Mamre kuma tvaonte Kenani mopa agu'afi, Abrahamu ana mopane havegane vahe asente'zane huno, Efroni'pinti mizama se'nea mopafi ome asenanteho.
31E'i anampina Abrahamune nenaro Serane ase'znante'naze, Aisakine nenaro Rebeka giznia anampi ase znantenafi, anampinke a'nia Liana asente'noe.
32Ana mopane havegane Hiti ne' mofavre'finti miza se'neane.
33Mofavre naga'amokizmi zamasmi vga reteno, agiarere sipare asuteno vgare asimu atrete'no (frino) naga'ane umani'ne.
