Jenesese 49

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Jekope banya wane dupwa epena lapala, Epo reperepe pyuo kararaminyipa nakama keta apa pyuo para lao langirowale.

²Nakama Jekopena ikinyingi dupwa malu palyuo rakane Isaraelena pii dokowarombo soo karalapape.

³Urupene emba nambana wane kyawa lengya lao pepo kareta dokome mandeyo. Nambana wane doloma karaminyipape emba yapo poraiyuo kaenge wane dokome moŋo kyaŋe soo karenge.

⁴Emba akali mee langa rolarapu ipwame kama pyao penge dopaleingyuo papilini. Dokona emba mupwa ingyuo kara nare. Renge doko emba nambana enda doko nyuo rate nambana dokona paleyambisa kwaeyo pelyamo.

⁵Simione Lipaepa anelapo yangongepa dolapo mendare pelyambinyi. Nakamba pundu nyuo karambinyi.

⁶Yanda pipu lao karambinyi dokona see naro. Wato lao karambinyi dupwana rekya lao kararo. Renge doko nakamba mee ingi napala wambu pyao kareyambi. Mee male male lao bulamakaona kimbu retapu yandanyi nembeyambi.

⁷Kuli kuli palyuo imbu singi nyuo karenge. Kale mangu mangu lao pyalanako suu pingi dokona kwao parambi leto. Nambame nakambana ree palu doko Isaraele rara dokona minyuo sukusa rayanga lena laro. Jekopena yuu dokona ralo bolombalo lao pena lakamiru.

⁸Dee Juta rakane, embena yangongemoo embalakandarami. Embena nyisu petenge dupwa mata minyinyi palyare. Embena rakanena ikinyingi dupwa emba kando mona joo pangu soo kararami.

⁹Juta emba mena laene ene andanda wambu pyalena pingi dopale ingilyamo. Doko embena kuli dupwa sisiki soo rolapala palyuo serenepa mendeme lyapu lao pii narami.

¹⁰Juta embena rombelyame kaikwasi dokoisa paa nara. Embena rara doko kiŋinya rara ingyuo karalu kararami. Kamongonge bange dupwa reto karo pao range eparamo dokopa baa keta pyamalyarami. Wambu peparae baako kando warombo soo banya pii minyaraminyi karara.

¹¹Ipwa guunya girapo isa ando karenge dokona mena donge dupwa rae maiyuo anjara. Girapo jingi kingyuo waene wasingi. Kana malu penge ipwange kone pingi dokome komau dupwa nyuo wate pira.

¹²Banya lenge doko waene ipwange nao kararasa kone pyuo banya nenge doko susu nao kararasa kyewa lao pira.

¹³Sepyulane embena rara kota pete mare dokona palirami. Nakamana panda dokona sipu dupwa epo kararami. Nakamana yuu doko pao yuu Saitone lili pira.

¹⁴Isaka baa mena donge porai manda manjo karamo. Doko nyuu komonali kenda pingi silyamo raka dokona palenge.

¹⁵Baa paliramo panda doko keyange ingyuo seramopa yuu doko elyape ingyuo paramo kando nyepala dokome banya kingi yongope porainyi pyambwapala kendemande ingyuo yulu andake doko soo nembo pira.

¹⁶Isaraelena rara lapo dupwa pingi doko suu pyao Daneme banya wambu dupwana baame mupwa ingyuo iso karara.

¹⁷Danena rara kata nemba nembasa kau kyalende isaro sera dopale kau doko katasa isaro sepala dokome mena osena kimbu yukuna doko narasa mango pao palira dokopa akali ketae pisira doko palepale rukimaki lao pao palira.

¹⁸O Kamongo namba mata kyakao nyerene dokonaiso karo.

¹⁹Gatena rara dokona waa nyingi lapome epo pyaraminyipa baa sipurapala isingi peteta pyao para.

²⁰Asana yuu dokona nenge yapasi dupwa andara nenge doko kiŋinya napengele dokome kiŋi dupwa mokwa soo maira.

²¹Napatalai baa mena diya anja nangende mee dupwana makando karenge dopale yakane au koo pingi dupwa para pyao nyingi.

²²Josepe baa mena donge rae lenge dopale baa ipwa guu lao epenge dupwana nao palenge. Yuukyaunya mena ose yakane rae lenge dopale

²³Nuli nala penge dupwame baa pyalana pyuo yanda nyepala baa peteta peyami.

²⁴Pyalana peyaminyipape yanda ipyuo pyalana saka nayami. Rakane Jekopena Anatu Porai Wakasa dokome nyisiyasa piya. Isaraelena Rapu Pingi Kanana Porai dokome baa nyisiyasa piya.

²⁵Embena rakanena Anatu dokomeko emba nyisara. Anatu Porai Wakasa dokome emba elyape keta pyambwaramopa Yakena apu epo karamo dokope isa yuu donorena ipwa palamo dokope endana kurapu pau lao anju ipwange palyuope

²⁶Eena nenge lokwasoo kapa simbu palyuope yuu kyau ketae pilyamo ota nalu nange dupwape yuu kyaukuki keyange sulu singi dupwape renge keyange dusipa Josepe baapa epo palenale baa iki wane yapasi dokona suu pyao baa keta sinyale.

²⁷Benjamene yana suwa kararope nuli nalana lee minyuo papingi dopale yangama sipurapala pyao nao karenge. Pyao nyuo serelyamo dupwa mokwasoo maiyuo karelyamopa yuu kwuange, leya.

²⁸Nakamana rakange kyawa Jekopeme Isaraelena rara akalisa mendaki ipisu lama dusipa karo dokopa dopa pyuo lamaiya. Baame banya wane dupwa mendaki mendaki range dokona manda manjo ketae pyambuo kareya.

²⁹Dokopa Jekopeme lamaiyuokondali pyuo lao, Nambana wambu kumuo peyami kata dokonakumuo panya. Iti range Eparone lenge dokona kana anda nambana rakange kyawa dupwa malu piyami dokonako malu pipwape.

³⁰Yuu andake Kenane dokona yuu Mamare neta pyakaenge dorena yuu kuki Makepela dokona singi kandale. Aporakameme yuu Iti akali Eparone lenge dokona yuu kananda paletape ropo pyao nyepala yanyanda ingyuo wasiya.

³¹Aporakame etenge Serapa dee Aisake etenge Orepekapape nakama dokonako malu pingipya. Dokona nambame Liya malu piyuko lyakande.

³²Yuu kananda paletape Iti wambunyande ropo piyapya, leya.

³³Dopa pyuo pinya lao lao lumwa pipala dokopa Jekope baa kimbu lalyuo nyepala banya wambu kumuo penge kata dokona peya.