1Iok Iakop pete Epraem iri nai Manase ke het pe iua tutuna mur ke te lange i pe hele lange iri ke teke, “A i at ke e heleia ure nemur nenge lape te lohot nge imo nge he.
2“Imo Iakop tutuna mur, a mes ke nek pe a longo; a longo ke nek nga tememo Israel nena helenga.
3“Rupen, iong tuk nenge tengene ana. E hoe iong nga iau lomele ngak nike. Lape o lohot ke iong non palaungana pe o kerkereng toto nge titim mur.
4Pe lape iong palaungana nenge titim mur ero ol iange o poi ke malaka nga kie nge tele upa. O la ke o ma luluch nge lek hei e pule. Pe o hemei tote iau nga lem poinga nem.
5“Simion pe Liuai titiria mur hel. Iri nai te heporeke totote hehei pe hana nga reria palinga hel ana ure mur.
6Iau lape e longo la nga iri nai leteria tuanin ngana mur ero, pe lemek ero nge e tal teua iau la nga ure nenge te teke te popoia. iange leteria inin pe te hunun hana pe te iech mana nge te pal hoa pulumakau mur aperia.
7Iri nai leteria inin ngana heporeke mule iri iange leteria inin sakilil, pe te oala ngaria heporeke iri iange reria susun tana hali. Pe lape e hekengkenge iri ke te ua rara pe e poia iri ke tu lilis rara luluch nga mata hel nge Israel.
8“Pe Iuta iong titim mur lape te tal heke tote iong. Iange o hekou sue lem ngarang mur pe titim mur lape te tualou sio pe te heto heke iong.
9Iong o poi ke manga ur inolo kerkereng ngana nenge Iuta nge hune ana huros ke ngaua ke het pe la ke ma mule nga munna nenge mama ia. Pe mele pele nakuna ero toto nge hetakinia i.
10Pe o rahite naunga-ala ana non nena tongtong ke o nauele hehei pe hana. Pe mele pele lape mene hote nge iong ero, pe nge matam alona mur ero pule, ke la het nga etue nenge tongtong tokoninga at ia ke nauele hehei pe hana lochloch.
11Pe hechau hite nena tongki la nga uain tana nenge urana toto pe lome nena hengeron nga uain eina, pe nena hengeron sase ngana lomo teua nga uain eina nenge remenmen.
12Pe matana remenmen ia uain in ngana pe ngingina hussu toto ia siu eina in ngana.
13“Pe Sepulon iong lape o tu nga ruach ilina nga kolkolu palaungana nenge imot mur te mana teueu ia. Pe lem ich maole kela het nga tuele tana nge Saiton.
14“Pe Isakar iong o pomalaka nga tongki kerkereng ngana e nge kikina ero nge mes haka ia oroko meena ngana mur nenge te kale heke nge i.
15Pe nga etue nenge naue nena ich nge urana nge tuia pe tah eingana ia, pur kikina toto ke teke ume. Pe nga hoena o lohot ke iong hekuleileinga ana non pe te puoloko teu tote iong nga ume.
16“Pe Tan iong, lape o nauele lem hana pe hehei ke nek. Elle mana ke pomanga kaleu ramana mur hel pule nge Israel.
17Pe lape o poi ke pomanga ilimo nenge ma nga kue tana ilina pe ilimo nenge hunun nenge ma nga kue kinkino ngana ilina pe alatote oriong mur aperia pe te ule hana nenge te songsong ia iri ke te losio.
18“Non Soke, e kulele iong ke o mene mule iau!
19“Pe Kat iong, kemenga kina mur lape te palhel luluch nge iong pe o lope parai ia iri.
20“Pe Asa iong, ngaunga nge halang toto lape te haka nga lem ich. Pe naunga-ala ana hana mur, muteria tau tote ngaunga urana ngana mur nenge o tuntune.
21“Pe Neptali iong, o pomalaka nga meme inolo ngana e nenge i rara pulut mana nga lemene ngana, pe hoe tutuna mur nge nakuria urana manmana.
22“Pe Iosep iong, o pomalaka nga uain tana e nge mes nga ech matana pach haka ngana, nge nganngana halang toto pe perperna mur te au tele nga mapuo.
23Lem ngarang mur te ngira taua iong ke te teke te tue iong nga reria raling pe te poi poreke iong.
24Pe iong o rahit heke lem raling pe o mes ke kerkereng toto iange NeHalang nenge Iakop heto hekeke, tunge kerkerenga lange iong. I NeHalang nenge nauelele hehei pe hana nenge Israel.
25Ke NeHalang Nenge Kerkereng Toto pe halaulaua iong nem, I temem ana soke ia. Pe pete iong pe poi ke urana toto lange iong. Pe lem petenga mur lape sio nga tapa sana ke pomanga pitte pe pomanga ech nge pach haka nga ich. Pe poia lem huros mur ke teha lele pe poia lem tete mur ke iri halang toto.
26Iau temem iau pe e hele talue ure urana ngana mur nenge lape te lohot nge iong. Ure urana ngana nemur iri halang toto ke salala hite hengene papalaungana mur pe te hele haka toto nga nenge lek tete mur te mene nge nike. Ke Iosep, ure lochloch ngana nei lape te lohot nge iong. Iong non nenge o lohot ke iong soke toto nge titim mur.
27“Pe Pensamin, poi ke malaka nga kaone inolo palaungana e. Nga uach ngaungaua huros mur nenge hunune iri. pe nga ulei heronge aluana lala nge pekngana mur.”
28Ke nenge nei kaleu ramana iri analoch pe nai (12) nenge Israel. Temeria ee ia iri pe hele hot pengpeng ia ure nemur nenge lape te lohot nge iri elle pe elle nge he.
29Ke het pe Iakop hele lange iri ke teke: “Ak etue at rochroi toto lo nenge lape e la ke e ma luluch nge lek tete mur nga polo. Ke nga etue nenge e mete, a alohite iau nga metenga ana kileng nenge lek tete mur te maia nga Hitae mur reria ich nge Epron.
30Nga polo nenge tu nga ich nenge Makpela nenge tu rochroi lange Mamre nga kileng nenge Kanan. Ich nenge Epron, i ich nenge Apraham ol hote nge Hitae mur ke teke metenga ana kileng ia.
31Ke Apraham pe nehei Sera pe Isak pe nehei Repeka, ngaria laka te alohite iri nga lamalam. Pe iau e alohite e Lea nga lamau pule.
32Ke ich nem pe polo mur nga ich nem Apraham ol hote nge Hitae mur lo.”
33Iok, Iakop hetoro sue helenga neu lange tutuna mur ke het pe ma haka mule nga nena hete pe mete sapele. Pe te alohite i luluch nge nena tete mur.
