Text copied!
CopyCompare
Nuevo Testamento en mixteco - SAN LUCAS

SAN LUCAS 22

Help us?
Click on verse(s) to share them!
1Yūcuán na te ni cuyajni vico pascua jeē cáyeji ñayuu hebreo pan jeē tú na levadura yɨ́hɨ.
2Te sutū cácujéhnu jíín tée cástéén tutu ley, ni canducú yuhu de modo cahni de Jesús, chi cáyūhú de jeē quɨtɨ̄ ni ñayuu.
3Te ni quɨ̄vɨ Satanás ini anuá Judas jeē nastúu de ya. Te suni nání de Iscariote, te cúu de ɨɨn jnáhan jeē ndɨhúxí uū tēe apóstol.
4Te ni jehēn de ni candajnūhún de jíín táca sútū cácujéhnu jíín tée cándiso jníñu ini templo, núu ndese nastúu de ya nuū tée un jíjnáhan.
5Te tēe un ní cacusɨɨ̄ ni de, te ni cajejnūhun de jeē cuáha de xūhun núū Judas.
6Te ni jetáhú Judas, te ni nducú de modo ndese nastúu yuhu de ya hora jeē tú na ñayuu iyó.
7Te ni quee maá quɨ́vɨ̄ víco jeē cáyeji ñayuu pan jeē tú na levadura yɨ́hɨ, te suni quɨvɨ̄ un cájehni i londe nájnūhun ni ndacu Yaā Dios jniñu jeē sáha i vico pascua un.
8Te Jesús ni tají yá Pedro jiín Juan quingoo de, te áchí yá jiín de: Cuángoo te sátūhva ró jéē cuxíni yó vico pascua, achí yá.
9Te ni cacajnūhún de ya: ¿Ndé nuū cuní ni jéē quísátūhva ná? áchí de.
10Te ni cahān yā jiín de: Cuángoo ñuu yūcuán, te núu ni quɨ̄vɨcoo ró te najnáhan ró jíín ɨɨn tēe ndíso quɨ̄yɨ ndute. Te condiquīn rō de quihīn rō jiín de nde vehe nuū ndɨ́vɨ de.
11Te cahān rō jiín tée chíí vehe ún: Achí máá Maestro: ¿Ndé ɨɨn cúu cuarto vehe ní cuāha núú ní núū cuxíni ya vico pascua jiín tée cáscuáha jíín yá, achi rō.
12Yūcuán na te stéén de ɨɨn cuarto cáhnu nde xinī véhe jeē je íyó túhva, te yūcuan sátūhva ró jéē cuxíni yó, áchí yá.
13Te cuangoo de, te ni canihīn de nájnūhun ni cahān yā. Te ni casátūhva de jeē cuxíni ya vico pascua.
14Yūcuán na te ni jinū hora jeē cuxíni, te ni quee Jesús, te ni cucōo ya mesa jiín tée cácuu apóstol.
15Te ni cahān yā jiín de: Yōhyo ni cuu ni rī cuxíni ri jiín ró jijnáhan ró vico pascua yáha, vijna nde ná tu cuu rī.
16Chi cáhán rī jiín ró jeē ma cáji cuɨtɨ gā rī vico pascua, chi nde quiji quɨvɨ̄ ndacu Yaā Dios jniñu nɨ́ɨ́ ñayɨ̄vɨ́, te sáá te caji tucu ri, achí yá.
17Te ni quihin ya ɨɨn copa ndūxi uva, te ni nacuatáhú yá, te ni cahān yā: Quihin copa yáha, te coho ró jíín jnáhan ró.
18Chi cáhán rī jiín ró jeē ndé vijna te ma cóho ga rī ndūxi uva, chi nde quiji quɨvɨ̄ ndacu Yaā Dios jniñu nɨ́ɨ́ ñayɨ̄vɨ́, te sáá te coho tucu ri. Achí yá.

19Te ni quihin ya pan, te ni nacuatáhú yá, te ni tahú cuéchí yá, te ni jēhe ya nuū de jíjnáhan de. Te ni cahān yā: Yāha cúu yɨquɨ cúñu rī jeē socō rī jeē chunaa rī cuēchi ró jíjnáhan ró. Te níní caji rō súcuan jeē cáñuhun ni rō ruhū jeē ni jíhī rī jehē rō. Achí yá.
20Te suni súcuan ni sáha ya jiín copa ndūxi uva, ná ni cuu ni cuxíni ya. Te ni cahān yā jiín de: Yāha cúu nɨñɨ̄ rī jeē cuáha ri jeē cúu contrato jeé, te catɨ jeē ndundoo cuēchi ró jíjnáhan ró.
21’Te vijna chi tēe nastúu ruhū, néne de jíín rí nuū mesa yáha.
22Chi ruhū, Yaā ní nduu tēe, jendaá cúu jeē quihín rī cuu rī nájnūhun je ni sándaā Yaā Dios jeē súcuan coo. Te nacā xeēn ndoho tēe jeē nastúu ruhū, achí yá.
23Yūcuán na te ni caquejéé de cácajnūhun jnáhan de ndé ɨɨn de cúu jeē nastúu de ya.
24Yūcuán na te yōhyo ni cacahān de sɨquɨ̄ ndé ɨɨn de cújéhnu ga nuū jnáhan de.
25Te ni cahān Jesús jiín de: Rey tācá nación chi cándacu nīhin de jniñu nuū ñáyuu cájnɨɨ de, te cácahān i jeē tée cásáha vāha cúu jeē cácujéhnu nuū i.
26Te róhó jíjnáhan ró, ma cóo ró súcuan. Chi núu ndé ɨɨn ró cújéhnu ga, te sa nasáha lulí ró maá ró. Te núu ndé ɨɨn ró ndácu jniñu, te sa nasáha ró máá ró tēe jéjníñu nuū jnáhan.
27¿Te ndé ɨɨn cúu jeē cujéhnu ga, á tée yéji nuū mesa, chí tée jéni cohō? ¿A násūu tée jeē yéji nuū mesa cúu jeē cujéhnu ga? Te ruhū nasūu súcuan cúu ri, chi ni nasáha ri maá rí nájnūhun tēe jéjníñu nuū rō, chi vēji ri sáha ri jeē nihín tahú rō.
28’Te máá ró cácuu tēe jeē niní cáhīin jíín rí tāca quɨ́vɨ̄ jeē ndóho ri jnūndóho.
29Núu súcuan te nájnūhun ni sáha Tátá rī jeē ndácu ri jniñu, suni súcuan sáha ri jeē ndacu ró jniñu jíjnáhan ró.
30Te caji rō coho ró jíín rí ini ñuu nuū ndacu ri jniñu. Te cucōo ró ɨɨn ɨɨn mesa jeē sándaā rō jniñu ndɨhúxí uū yucūn Israel. Achí yá.
31Te suni ni cahān maá Jítoho yō jiín Simón Pedro: Simón, cuni sōho ró, chi ni jicān Satanás rohó jíjnáhan ró jéē coto ndee rohó nájnūhun jeē síjin trigo, te stúu ndé ɨɨn ró cácuu nájnūhun paja jeē nayūhu ró, te ndé ɨɨn ró cácuu nájnūhun trigo jeē candíje nīhin ró.
32Te ni jicān tahú rī jehē rō návāha ma náyūhu ró jeē ma cándíje ga rō. Te jeē nácandíje tucu ró, te sáha ró jéē íje tāca jnáhan ró jíín jnúhun ri. Achí yá.
33Te ni cahān de jíín yá: Je íyó túhva ná quíhīn na jíín ní vecāa te vēsú na cuu na jíín ní, achí de.
34Te ni cahān yā: Pedro, cáhán rī jiín ró jeē nde ná tu cana líhli vijna, te yūhu ró jeē jnɨɨ ñayuu rohó, te unī jínu cahān rō jeē tu jíní rō ruhū, achí yá.
35Yūcuán na te ni cajnūhun yá de jíjnáhan de: Ná ni tají rí rohó ní jengoo ró jéē tu ní cóndiso ró ñunu ni yɨjnɨ xūhún ni ndijēn, ¿te á ní īyo ɨɨn jeē ní cumanī nuū rō? Achí yá. Te ni cacahān de: Tú ni ɨɨn ní cúmanī.
36Te ni cahān yā: Nde vijna sa cáhán rī jeē cóndiso ró ñunu ró, te suni yɨjnɨ xūhún. Te tēe jeē tu névāha espada jeē coto de máá de, na xíco de tɨcāchí de te na cuáan de.

37Chi cáhán rī jiín ró jeē quee quɨvɨ̄ ndoho yó jnúndóho, chi cánuú squícu jnūhun yáha jéē cahán nuū tútu sɨquɨ̄ rī: Sáha ñayuu jiín yá nájnūhun cásáha i jíín tée sáha cuēchi xeēn, áchí tutu. Chi tāca jnúhun un jéē yosó cáhán sɨquɨ̄ rī, chi squícu nahín, áchí yá.
38Yūcuán na te ni cacahān de: Yāha íyó úū espada, achí de. Te ni cahān yā jiín de: Jíín jéē yáha‑ni, áchí yá.
39Te ni quenda ya cuahān yā yucu Olivos nájnūhun sáha sáha ya. Te tēe cáscuáha jíín yá ni candiquīn de ya cuangoo de jíín yá.
40Te nuū ni jínū yā yūcuán, te ni cahān yā jiín de: Cacān tahú rō jijnáhan ró jéē chindéé ñáhán yá rohó jéē ma sáha ró cuéchi núu coto ndee jeneé róhó, achí yá.
41Te ni jica ya jecu, cūhva jeē jicá jínú yuū jeē squiín. Te ni jecuɨñɨ̄ yɨtɨ́ yá, te suhva ni jicān tahú yā:
42Tátā, núu cúní ni te tejiyo ní jnúndóho yáha jéē ma quíji sɨquɨ̄ ná. Te nasūu jéē cuní maá ná, chi jeē cuní maá ní na cóo, áchí yá.
43Te ni cane ɨɨn ndajéhé andɨvɨ́ núū yā, te ni jēhe fuerza nuū yā.
44Te cúcuíhyá ndasɨ́ ni yā jeē quiji jnūndóho sɨquɨ̄ yā, te ni nducú ndéyɨ́ gá yā ni jicān tahú yā. Te ni cane jnañū yā, te tóo nuū ñúhun nájnūhun yúyú náhnu nɨñɨ̄.
45Te ná ni ndocuɨñɨ̄ yā jeē ni jícān tahú yā, te ni ndee yā nuū tée cáscuáha jíín yá. Te ni jito ya jeē cáquixī de, chi tuá cáhīyo ndeyɨ́ ni de cacān tahú de jeē cácucuíhyá ndasɨ́ ni de.
46Te ni cahān yā jiín de: ¿Naun cáquixī rō? Ndonda te cacān tahú rō jeē chindéé ñáhán yá rohó jéē ma sáha ró cuéchi jeē cóto ndee jeneé róhó. Achí yá.
47Te sá cáhán gā yā súcuan, te ni quecoo cuehē ñayuu. Te tēe nání Judas, ɨɨn jnáhan jeē uxí uū tēe scuáha jíín yá, yósnúu de nuū ñáyuu un véji de. Te ni quee de nde nuū Jesús, te ni techūhú de ya, te súcuan ni nastúu de ya.
48Te ni cahān Jesús jiín de: Judas, ¿á jíín jéē téchūhu ró ruhū cúu jeē nastúu ró rúhū, Yaā ní nduu tēe? Achí yá.
49Te tēe cáhīin jíín yá, ni cajito de jeē ní quejéé cúu, te ni cacajnūhún de ya: ¿A ndonda ná jíjnáhan ná sɨ́quɨ̄ de jíín espada? áchí de.
50Te ɨɨn de ni stují de mozo sutū cujéhnu ga, chi ni jehnde de sōho lado váha.
51Te ni cahān Jesús: Siáá, na jécuɨñɨ̄, achí yá. Te ni tee ya ndaha ya sōho mozo un, te ni nasávāha ya de.
52Te ni cahān yā jiín sútū cácujéhnu jíín tée cándiso jníñu ini templo jiín táca tée jéhnu jeē ní quecoo de jeē jnɨ́ɨ de ya: ¿Te va tēe cuíhná cúu ri jeē véjicoo ró jíín espada jiín yujnu jeē jnɨɨ ró rúhū jeē súcuan?
53Tāca quɨ́vɨ̄ ni ine ri jiín ró jijnáhan ró ini templo cáhnu, te tu ní cájnɨɨ ró rúhū. Te vijna te ni quee hora jeē jnɨɨ ró rúhū jiín jéē sáha ró táca jniñu jeē ndácu jeneé jéē ndeé núū néē. Achí yá.
54Te ni cajnɨɨ de ya cuangoo de jíín yá vehe sutū cujéhnu ga. Te Pedro chi jícá‑ni ndíquín de ya.

55Te tācá policía ni cascáyú de ñuhūn ini patio, te ni condúu de yuñúhún un cáyūcú de. Te suni ni cucōo Pedro jiín de.
56Te ɨɨn ñahan jéjníñu ini vehe un, ní jito ña nuū de jeē néne de yuñúhún. Te ni jito vāha ña nuū de, te ni cahān ña: Tēe yáha suni ni jica de jíín tée ún, áchí ña.
57Te máá de tu ní cáchi de, chi ni cahān de: Tu jíní rī tēe ún, áchí de.
58Te ni cunúu jecu gā, te ni jito tucu ɨnga ñayuu nuū Pedro, te ni cahān: Róhó, suni jnáhan tāca tée un cúu ró, áchí. Te ni cahān Pedro: Nasūu cúu ri, hombre, achí de.
59Te ni cuu nájnūhun ɨɨn hora gā, te ni cahān nīhin ɨnga de: Jendaá ndije jeē tée yáha ní jica de jíín tée ún, chi suni tēe región Galilea cúu de, áchí de.
60Te ni cahān Pedro: Hombre, tu jíní rī na jnūhun cáhán rō. Te sá súcuan cáhán gā de, te ni cana‑ni líhli.
61Yūcuán na te ni ndió cóto máá Jítoho yō, te ni jito ya nuū Pedro. Te ni nucūhun ni de jnūhun ni cahān yā jiín de: Nde ná tu cana líhli, te yūhu ró te cahān rō unī jínu jeē tu jíní rō ruhū.
62Te ni quenda de cuahān de, te yōhyo ni ndahyū de jeē ní cachi de jeē tu jíní de ya.
63Te tāca tée cándito Jesús, ni casácatā de nuū yā, te ni cacani de ya.
64Te ni cajesɨ de sahma nuū yā, te ni cacani de nuū yā, te ni cacahān de: Cachi ndé ɨɨn cúu jeē ní cani róhó, áchí de.
65Te cuehē gā jnūhun súcuan ni cacahān neé de jíín yá.
66Te jeē ní cundijin, te ni candutútú táca tée jéhnu cándacu jniñu nuū ñayuu hebreo, jiín sútū cácujéhnu, jíín tée cástéén tutu ley Yaā Dios. Te cuangoo de jíín yá nuū junta tēe cácujéhnu ga, te yūcuan ní cacajnūhún de ya:
67Cachi, ¿á máá ró cúu Cristo jeē ní tají Yaā Dios? Achí de. Te ni cahān yā jiín de: Vēsú na cáhán rī jeē suu ri cúu, te ni ma candíje cuɨtɨ rō.
68Te suni núu cajnūhun máá rí rohó jíjnáhan ró, te suni ma stió cuɨ́ñɨ́ rō nuū rī, ni ma siaá rō ruhū.
69Te ruhū, Yaā ní nduu tēe, tāca quɨ́vɨ jeē quíji conene ri lado váha máá Yaā iyó poder, achí yá.
70Yūcuán na te ndɨhɨ de ni cacajnūhún de ya: ¿A máá ró cúu Sēhe Yaā Dios núu súcuan? Te ni cahān yā jiín de: Suu ri cúu, nájnūhun cácahān rō, achí yá.
71Yūcuán na te ni cacahān de: ¿Na testigo gā jíni ñúhún yó núu súcuan? Chi ni cajini sōho yó jíín yuhu máá de jeē cahán ndevāha de jeē cúu de Sēhe Yaā Dios. Achí de jíjnáhan de.