Lukaj 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹KADEKADEO murin mepukat a kotin kakan jili nan kanim laud o me tikitik kan, padapadak o kaloki ronamau en wein Kot, o ekriamen ian i.

²O pil li akai, me a kotin kakelailada jan nen jued o jomau kan, iet akan: Maria, me pil adaneki men Makdala, me tewil ijimen koiei jan.

³O Ioana iei likond en Kujaj en Erodej a jaunkoa men, o Jujana, o me toto, me papaki i ar kapwa kan.

⁴A aramaj totoia lao pokon don i jan nan kanim akan, karoj, ap kotin karajeraj majani:

⁵Jaunkamor kolan kamor a war akan. Ni a kamokamorok akai ap moredi on pon kailan al ap tiatidi o manpir en pan lan nam ir ala.

⁶A akai moredi on pon paip. A lao wojada, a monedi, pweki a jota lamelamur.

⁷Akai moredi nan tuka teketek, a tuka teketek wojada, kajokä ir ala.

⁸A akai moredi nan pwel mau, ap wojada o wada pan me epuki. Ni a kotin majanier mepukat, ap majan laudeda: Me jalon a mia, men ron, i en ron!

⁹A japwilim a tounpadak kan ap kalelapok re a: Ia wewe en karajeraj wet?

¹⁰I ari kotin majani: A muei on komail er, en aja me rir en wein Kot, a met akan en aja ni karajeraj akan pwe ren kilan, ap jota kilan, o ron, ap jota weweki.

¹¹A iet wewe en karajeraj o: Majan en Kot iei war akan.

¹²A me mi pon kailan al o, iei ir, me ronadar, a muri tewil pwarada katia jan majan en Kot nan monion arail, pwe ren der pojon, rap maurela.

¹³A me mi pon paip, iei ir, me kin ron majan o ap pereperen ale, a jota kalau re ’rail. Anjau kij re kin pojon, a ni anjaun jonejon, irail kin pupe jan.

¹⁴A me moredi nan tuka teketek, iei irail me kin ron, ap koieila tiropeki anan o pai, o inon jued en maur et, rap jokekila, ap jota wa.

¹⁵A nan jap mau, iei irail, me kin ron majan o, ap nekinek nan monion ar inen o mau, o wada nin tiak en kanonama.

¹⁶Jota me kin ijikeda lamp, ap pwainekidi kopa eu, de ki on pan men wendi a pon deu a, pwe me pan pedelon on en kilan marain o.

¹⁷Pwe jota me rir kot, me jo pan janjaleta, pil jota me okiok kot, me jo pan kalok jili.

¹⁸Komail ari kalaka duen omail kin roneron, pwe me a mia, ekij pan ko on; a me jota a mia, i, me a kiki on, me a, pan katia jan.

¹⁹In a o ri a kan ap ko don i, a re jota kak kaion impa pweki pokon o.

²⁰A ap loki on i: In ar o ri ar akan poto liki, re men udial ir.

²¹A kotin japen majani on irail: In ai o ri ai mepukat, me kin roneron majan en Kot o apapwali.

²²Kadekadeo ni eu ran a kotilan pon apot jop, a japwilim a tounpadak kan ian i. A kotin majani on irail: Kitail en kotela le en: Irail ari tanetan koieila.

²³O ni ar tanetan kokowei, a kotin jaimokela; melimel ap koda nan jed. A jop o pwilipwil, a pan mauidi.

²⁴Irail ap kai don i, kaopada i, potoan on: Main, Main, kit pan mela! I ari kipada majani on an o iluk en jed akan, rap tikitikala o molelar.

²⁵I ap kotin majani on irail: Ia omail pojon? A irail majakada inda nan pun ar: Daduen, ij men et, pwe a kin majani on an o jed, ir ari duki on.

²⁶Irail ap lele don jap en Kadara, me jal on Kaliläa.

²⁷I lao kotidi jan, ol amen tu on i, me kodo jan kanim o, me tanwar en tewil jan maj kokodo, o me kilijo, o a jota kin kaujon nan im, pwe a kin mimi nan joujou kan.

²⁸I lao kilan Iejuj, ap werida, poridi jan mo a indaki nil laud: Menda re omui nai, Iejuj Japwilim en Kot lapalap? I men poeki re omui, kom der kalok ia la!

²⁹Pwe a kotin majani on nen jaut o, en koiei jan ren aramaj o, pwe pan pak toto a jaikidi i; i ari kin jali kidi jal mata o jal en nä kai. A i kamueit ir pajan, o tewil paki i lan jap tan.

³⁰Iejuj kotin kainoma re a majani: Ia ad om? A potoan on: Lekion; pwe tewil toto mi re a.

³¹Ir ari poeki re a, ender majani on irail, me ren kodilan pweleko.

³²Ari, pwin pwik kalaimun mi waja o manamana jili nin nana o. Irail ari poeki i, en kotin mueid on irail re en til on irail. I ari kotin mueid on irail.

³³Tewil oko ap kodi jan ren aramaj o, ap tilon nan pwin pwik o. Pwin pwik o ap tanedi wei ni aul on nan jed ap mopila.

³⁴Jilepa ko lao kilaner me wiauier, rap tandaui, kolan kanim laud o tikitik kan, kaireki jili.

³⁵Irail ap koieila, kilan me wiauier, re ap kola ren Iejuj, diarada aramaj o, me tewil oko keredi jan lole, momod ni aluwilu en Iejuj, likauda o lolekonlar; irail karoj majakadar.

³⁶Me ian udialer, ap kaire kin irail duen tanwar en tewil a kakeladar.

³⁷Men Kadara karoj ap poekipoeki i, en koti wei jan re ’rail, pwe re majakadar kaualap. I ari kotida pon jop o, ap kotin purelar.

³⁸A ol o, me tewil oko kodi janer, poeki re a, en ian i; a Iejuj jota kotin mueid on i majani:

³⁹Purelan deu om, kalok jili duen manaman lapalap, me Kot wiai on uk er! I ari kola, kalok jili nan kanim o duen manaman lapalap, me Iejuj kotin wiai on i.

⁴⁰Kadekadeo Iejuj lao kotin puredo, aramaj akan ap kajamo i, pwe irail karoj auiaui i.

⁴¹A kilan, ol amen, ad a Iairuj, jaumaj en jinakoke, kotido poridi ni aluwilu en Iejuj o poeki i, en kotilon on nan im a.

⁴²Pwe na ieroj jeripein amen, me a par naulriau, me koren ion mela. A ni a kotikot kokodo, pokon o koi don i.

⁴³A li amen, me nta pwilipwil par naulriau, me pwaineki on jaunwini kan a dipijou karoj. A jota me kak kakelailada i.

⁴⁴I me apedo mur i, doke ni kailan japwilim a likau. A pwilipwil en nta madan madada.

⁴⁵Iejuj ap kotin majani: Ij i me jair ia? A karoj lao inda me jota, Petruj o me ian i ap potoan on: Main, pokon o kin kapil pena o koi don ir, a iaduen, re kotin majani: Ij i me jair ia?

⁴⁶A Iejuj kotin majani: Nan meamen jair ia, pwe I pam, me kel eu ko jan ia er.

⁴⁷A li o lao ajaer, me a jo kak rirala, ap majapwekada, apedi poridi jan mo a, ap katitiki mon aramaj karoj, karepan a jair i, o duen a kelailada madan.

⁴⁸A ap kotin majani on i: Jeripein popoleta, om pojon me kakel uk ada, kowei popol.

⁴⁹A ni a kotin majaniata, amen potodo jan ren jaumaj en jinakoke o katitiki on i: Japwilim omui jeripein melar. Menda kom kanirieki jaunpadak o.

⁵⁰A Iejuj lao mani mepukat, ap kotin japen i majani: Koe der majak, koe pojon ta, a ap pan maureda.

⁵¹A lao kotilon on nan im o, a jota kotin mueid on amen en ian pedelon on nan pera, Petruj, o Ioanej, o Iakupuj eta, o jam en jeripein o in a.

⁵²A irail karoj janejan o mamaukeki i. A i kotin majani: Komail der janejan! Pwe a jota melar, a mamair eta.

⁵³Rap kaururki, pwe re aja, me a melar.

⁵⁴I ari kotikiiei jan ir nan pera o, a ap kotin ale pa a waron on i majani: Jeripein, paurida!

⁵⁵Nen en jeripein ap pure don i, i ari madan uda. I ap kotin majani, kijin mana en ko on.

⁵⁶A jam a in a puriamui kila. I ari kotin inapwiedi irail ren der indan meamen me wiauier.