1A LAO kotin erela a majan akan karoj on pokon o, a ap kotilan Kapernaum.
2Ladun jenturion amen mia, me kajampwal re a, me jomau, a pan mela.
3A lao ronada duen Iejuj, ap poronelan i jaumaj en Juj akan, poeki re a, en kotido kakelailada a ladu.
4Irail lao pwara don Iejuj, ap nidinideki i potoan on: A war on, ren kotin wiai on i mepukat.
5Pwe a kin pok on toun jap atail o kauadan kit jinakoke o.
6Iejuj ap kotin ian ir ala. A ni jolar non doo jan im o, jenturion ap poronelan i kompok kai, potoan on: Main re der kanere ir kotido, pwe i jowar, ren ketlon on nan im ai.
7Nai ari jota kin aka, me i war on poto don ir. A re kotin majaniata; a ai ladu pan kelailada.
8Pwe nai pil aramaj amen, me mi pan manaman akan, ap kaunda jaunpei kai. A ma i pan, indan amen: Kowei! A pan kola; o on amen: Kodo! A pan kodo; o on ai ladu: Wiada met! A pan wiada.
9Iejuj lao mani mepukat, ap kotin puriamui kila, jaupei don pokon o, me idauendo i, majani: I indai on komail, me I jaik diar pojon lapalap duen met, jota ren men Ijrael.
10A me pakadarala kan lao purelon on nan im o, re ap diarada, me ladu o kelailada.
11Kadekadeo murin mepukat a kotilan kanim eu ad a Nain; japwilim a tounpadak kan toto ian i; o aramaj pil me toto.
12A lao koren ion wanim en kanim o, kilan, melar amen, me re wawei, ieroj en in a, a iei li odi amen; a toun kanim me toto ian i.
13Kaun o lao majani i, ap kotin kupurela, majani on i: Eder janejan.
14I ari koti on, doke kopa o, a me roa kan ap udi. I ap kotin majani: Manakap, I indai on uk, paurida!
15A me melar o ap modada, pikekidi lokaia. Iejuj ap kotiki on i ren in a,
16Majak ap kipa ir edi, o kapikapina Kot indada: Nan jaukop lapalap amen, me pwarado re atail, o Kot me kotier ren japwilim a aramaj akan.
17A kajoi pot et duen i lolok jili nan Iudäa o jap karoj, me mi imp a.
18En Ioanej a tounpadak kan kaire kin i mepukat karoj.
19Ioanej ap molipeido japwilim a tounpadak kan riamen, porone ira lan Iejuj, majanlan i: Ir me pan kotido, de jen auiaui amen?
20Ol oko lao poto don i, ap potoan on: Ioanej jaunpaptaij kadar kit don ir potoan kalelapok: Ir me pan kotido, de jen auiaui amen?
21A ni auer ota a kotin kakelada me toto jan ar jomau, o luet, o nen jued akan, o kotin kapad pajan maj en me majkun toto.
22Iejuj ap kotin japen majani on irail: Koma u kowei, kaireki Ioanej, meakan komail kilaner o roner: Me majkun akan kilanada waja, o me luet akan kin alialu, o me tuketuk kan makelekeleda, o me jalonepon kin ron waja, o me melar akan kin maureda, o ronamau me lolok on me jamama kan.
23O meid pai, me jota pan makar kin ia!
24A men kadar en Ioanej lao purela, Iejuj ap kotin tapiada majani on pokon o duen Ioanej: Da me komail koieila en kilan nan jap tan? Komail men kilan alek pot, me kin dueduälokki an?
25De da me komail koieila en kilan? Komail men kilan aramaj amen, me likau kida likau muterok? Kilan, me kin likau kida likau linan, o kaped en mana, kin mi nan im en nanmarki kan.
26De da me komail koieila en kilan? Jaukop amen? Ei, I indai on komail, a laude jan jaukop amen.
27Pwe iei i me intinidier due: Kilan, I kadarala mo mui nai men kadar amen, me pan koki al mo ’mui.
28Pwe I indai on komail, jota jaukop amen me ipwi jan ren li akan, me laude jan Ioanej jaunpaptaij, ari jo, me tikitik nan wein Kot, iei me laude jan i.
29A aramaj karoj, me roneron i, o jaunopwei kan kapina Kot ni ar ian paptaijeki paptaij en Ioanej.
30A Parijär o jaunkawewe kan japai on pein irail ni ar mamaleki kupur en Kot, ap jota ian paptaij re a.
31A da me I en karajai on aramaj en di wet? O da me irail rajon?
32Irail me rajon jeri kai, me kin momod nan wajan net akan o likelikwir nan pun arail indinda: Kit kajakajan, a komail jota kakalek; kit kamamauke kin komail, a komail jota janejan.
33Pwe Ioanej jaunpaptaij pwarado, ap jota kan prot, o jota nim wain, a komail kin inda: Nan tewil kin di poa.
34Nain aramaj pwarado, mana o nim, a komail kin inda: Kilan, me kaped en mana o kamom jakau, kompoke pan jaunopwei o me dipan akan!
35A lolekon kin diarok kida na jeri kan karoj.
36A Parijär amen poeki i, en konot re a. I ari kotilon on nan im en Parijär o kaipokedi ni tepel.
37A kilan, li amen mi nan kanim o, me dipan amen, a lao aja, me Iejuj kotikot konot nan im en Parijär o, ap wado kokon en alapajta,
38O poridi mur i ni aluwilu a janejan o pikekidi widenki pil en maj a aluwilu a, o limwieki a pwilipeipei, o metik aluwilu a kan o keieki alapajta.
39A Parijär o, me lukedo i lao kilaner, ap monemoneloleki indada: Ma ol men et jaukop amen, a pan aja, ij li o, me jair i, pwe me dipan amen.
40Iejuj ap kotin japen majani on i: Jimon, I men indai on uk meakot. I ari indada: Jaunpadak, majania do!
41Ol amen mia, me aramaj riamen pwaipwand on. Amen ira pwaipwandeki denar limepuki, a amen limeijok,
42A ni ara jota men kapunala, a kijakija kin ira la karoj. Indan ia, ij re ’ra, me pan pok on i laud?
43Jimon japen potoan on: I lamelame i, me a kijakij laud on. A kotin majani on i: Koe meid pun kajauiada.
44I ari jaupei don li o majani on Jimon: Koe kilan li men et, I pedelon on nan im om, a koe jota ki on ia pil men widen nä i kat, a i me widenki pil en maj a nä i kat, o limwieki a pwilipeipei.
45Koe jota metik ia, a i jota tukedi jan metik nä i kat, jan ni a pedelon lao lel met.
46Koe jota ujore kin ia le, a met keiekier nä i kat alapajta.
47Nan i me I indaki on uk: Dip a kan me toto me lapwadar, pwe a kin limpok laud; a me dip a jota non lapwada, nan a kin limpok tikitik.
48I ari majani on li o: Dip om akan me lapwadar.
49A me ian mod ni tepel o ap tapiada inda nan pun ar: Ij men et, me pil kin lapwada dip akan?
50I ap kotin majani on li o: Om pojon me dore uk ala, kowei popol!
