LUKA 17:1-17

¹Iesu ese ena hahediba e hamaorodia, eto, Hekwakwanai ḡaudia na do bae vara, to ihavaradia tauna madi ihabaina.

²Namo huro badana ta aiona ai bema mataia, davara ai bema negea dobi; dika ini maraḡimaraḡidia tamona bema hahekwakwanaia.

³Nahuamui ba toho: tadikakamu baine hadikamu, ba sisiba henia, bena baine helalo kerehai negana ai na ena dika ba gwaua tao.

⁴Dina tamona ai nega hahitu baine hadikamu, bena nega hahitu baine lou henimu, baineto “Vada name helalo”, ena dika vada ba gwau tao.

⁵Aposetolo taudia ese Lohiabada e noia, eto, Emai abidadama ame habadaia.

⁶Lohiabada ese e haere henidia, eto, Emui abidadama bema sinapi nadinadina na heto, umui ese ina budoa boma haḡania, boma toma “Ba heraḡa, davara ai ba hehado”, bena bema kamonai henimui.

⁷A umui daika ena hesiai tauna tano iruana eiava mamoe ireḡudia amo baine lasi negana ai baine hamaoroa, baineto “Ame ege diho haraḡa, bavaniani”?

⁸Lasi, ia na baineto “Agu a nadu, emu rami ba rioa, isiaigu ba lao heni ela bona baina aniani vaitani baina inuinu vaitani, murinai oi ma bavaniani bona ba inuinu” ani?

⁹Ia ese hesiai tauna e hanamoaunu, e hahedua karadia e kara dainai, a?

¹⁰Benaini, umui danu, e haduamui karadia iboudiai ba kara, bena baoto “Ai na hesiai taumai dia nanamo, badina be e haduamai karadia mo vada a karamu”.

¹¹Ia na Ierusalem e lao heniava negana ai, Samaria bona Galilea tanodia amo e raka hanai.

¹²Hanua maraḡina ta ai e lasi, bena lepra taudia gwauta ia ida e hedavari, to dauhai e gini,

¹³Iesu e boi henia eto, Iesu, biagumai e, ame bogamai hisi.

¹⁴Ia ese e raraidia, bena e hereva henidia, eto, Hahelaḡa taudia dekedia hari aola, bae itamui. Bena vada ela. Dala amo e laova ai kopidia vada e ḡoeva.

¹⁵Bena tamona mo kopina e itaia vada e ḡoeva, e lou ela, mai moale badana ida Dirava e imodaia,

¹⁶bona Iesu aena badinai e goru diho, e hanamoa. A ia na Samaria tauna.

¹⁷Bena Iesu eto, Gwautaosi asie ḡoeva a? Taurahani-ta be edeseni ai?