Lucas 17:1-17

¹Jesusratu acuare tura mepehua cuanaque: —Majuma jari tuputu ecuita cuana cajuchaticara jujacaya ama. Dyaque nerecadatu jubuque ejeque cajuchatishayaque.

²Dyaque jidatu majutaqui juhua ebacua cuana bucha cuanaque cajuchatishaquique. Dyaque jidatu tumu erieri ishuque epituju risitsu bei dyaque dedaju ijehuetaqui juhua, ejeque cajuchatishamaque maju ishu.

³Necanaruticue eje bucha juyaque. “Micuana tsehuequi buchique ni cajuchatiya, nereda neacue. Tuque ni inime cacuaretiya, nenerecabacue; nenime aputacue tura eje bucha ahuaque.

⁴Ita taa nebacue. Ejera micuana jidama ajacama eau, jadya apidya jadya ama, tura micuana jidama juatsu eau, ‘Inime cacuaretihua. Cahuaitishanucacarama mique anucaya’ jadya anajacama eau. Jadya tura ayaju, nenerecabacue; nenime aputacue tura eje bucha jidama ahuaque, —jadya tuna Jesúsra acuare.

⁵Jesúsra mepehua cuanaratu Jesús isaracuare. (“Ecuadishata cuanaque” bacani tuna jucuare.) —Tsahuacue ecuana miaqueja dyaque nimee juaje ishu, —jadya tunajatu acuare.

⁶—Micuanara ni ejenequena juhua, paju era micuanaja ataquimaque aishu casa tyayaque, ni aidya jutidya tuque micuana ataquima ama ebau. Jeeque acui morera bacani ni micuana eau: “Mutsautanacue rehuaque. Netisicuacue ena cuanaja ecuaque patya”, micuanaja yana equedyatu ejuu acui, era casa tyahuaque ejenehuaque juatsu.

⁷“Jadya micuana cuejaya. Ecuitaja eaniu tuja mere puji tuja tee cuanaju, jadya ama juatsu, huaca cuana naruquique. Tuja mere puji chinequeja piji tuja mere juque juetiyaju, ¿tuja patronratu canajara ishu emajaca yume tyatsadya eau? ‘Anibutecue. Canajarabaca, araara jadya juatsu canajaracue’ jadya tujatu eau?

⁸¡Aijama! Jadya eauque, ‘Nahui caticati jadya juatsu ique araarayaju merenacue. Ique amena juhuaju piisi mique araaracue’ jadya tujatu eau.

⁹Patronratu yusurupai aya ama tuja mere puji, tura cuatsashahuaque camadya ahua tibu.

¹⁰Tumebaedya micuana, Yusura amereyaque atillatsu muita ishuque bucha necabacatiume. ‘Ecuanaratu ecuanaja ai ataquique camadya ahua’ jadya necuejacue Yusu, —jadya tuna Jesúsra acuare.

¹¹Jesústu Jerusalénju cuayaque cueticuare Samaria, Galilea jadya eque.

¹²Peadya epu achaacha equetu cueticuare. Cuetiyajutu peadya tunca ecuita pusesera ririshaya cuanaque tuque tsurutsa ishu cuinanacuare. Japajapa piji tuna netinaticuare.

¹³Netinatitsu tuna quiquecuare: —Nerecabacue taa ecuana, Jesús. Chachanecue ecuana, Ebahuityaquique, —jadya tunajatu acuare quique eque.

¹⁴Jesúsra tuna baatsu isaracuare: —Pae queja necabameretiticue, micuana chacha juhuaque tuna bahue juishu, —jadya tuna Jesúsra acuare. Tume cuayaquedya jutidya tuna chacha jucuare Jesúsja casa eque.

¹⁵Peadya camadyatu yudijidya cuanuca jucuare Jesús queja, chacha juhua cabatitsu. Cuanucayaquetu juajecuare: —¡Dyaque jida taa Yusu! —jadyatu quique eque juajecuare.

¹⁶Jesúsja yacuajutu nuyunaticuare. Ebutsequini tsehue yahua tseraya tuputu huipuchitanacuare. —Yusurupai mique aya, mira chachanehua tibu, —jadya tujatu Jesús aticuare. Jadya yusurupai atietu ecuitara cuanucatsu acuare, arepa tuque samaritano juya ama bucha. Puscurucu israelita cuana bacue yudijidya cuanuca jucuare ama Jesús yusurupai ara.

¹⁷—Peadya tunca ecuita taa tuque chachanehua. ¿Are peya cuana? ¿Puscurucu taa tu bataqui ama?