San Lucas 17:1-17

¹Jesús raipny de xpɨnny: —Nuupac de cos ni cugueegu bniety par gúnbɨ duld. Per, ¡probllɨza ná bniety ni cugueegu stuby bniety par gún duld!

²Par laab güenru su ildiibdeb tuby guia xte mulin guɨnybɨ par chazáalddeb laab lo nisdoo, xlat ni cugueegubɨ tuby de ni teste güeldilaaz nare.

³Gulcualo laat. ’Belati xi tuby mal gún tuby de soo, blɨdxbɨ, ne belati yialaazbɨ pur ni baanbɨ ax baany perdónbɨ.

⁴Masquɨ gadz güelt láani tuby dxi chúu xi iniib o gunnézacbɨ liú, ne belati gadz güeltza guedniib liú: “Baany perdón nare, aquɨtru ibíiti gúna ziy”, ná par gúnu perdónbɨ.

⁵Chiy raipy de apóstol Jesús: —Bguaadrubiu dunnɨ mazru guelreldilaaz.

⁶Chiy cuaby Jesús lodeb: —Belati reldilaaztɨ, masquɨ zeczipac tuby biny xte mostaza ná guelreldilaaz xtentɨ, zelee gaiptɨ yag sicómorore: “Biiax ruc chiy quegüesub lo nisdoo”, ne yagquɨ scuadiagni xtiidxtɨ.

⁷’Izuubzin belati tubytɨ napbɨ tuby mos chiy chi guiaad mosqui belati güegaanbɨ o güegapzacbɨ de ladxaa, ¿tatix zaiptɨb: “Biiu, guri te iquiiniu?”,

⁸sino que zaiptɨb: “Bchu chiy banchuu ni iquiinia ne baany cuend nare lalzi caquiinia ne caguíia chi ldull iquiinia chiyru azelee iquiiniu ne guɨiu.”

⁹Ne niclɨdxa xtiosten quɨt gaiptɨb pur ni cayuntisbɨ ni riáld gúnbɨ.

¹⁰Ziyzaquɨy laat, chi ldull gúntɨ irate ni gunabee Dios laat, chiy gulnii: “Naiznɨ de mos ni quɨt illiú te pur bdxantisnɨ ni riáld idxannɨ.”

¹¹Deni zé Jesús par Jerusalén chiy gudeedny nez rut dxaa Samaria cun Galilea.

¹²Ax chi zeyiiuny láani tuby guɨdxiin, güechalo tsɨ de bniety nguiu ni rac guelguidx ni lá lepra laany. Per zit xquel guzuguaadeb

¹³rbɨxtiadeb: —¡Jesús, Maistrɨ, blaslaazbiu dunnɨ!

¹⁴Chi guná Jesús laadeb ax raipny laadeb: —Gulchaliuu laat lo de bxoz. Ne lalzi deni zédeb, bía tɨɨxdeb xte guelguidx ni racdeb.

¹⁵Chiy tubybɨ deni gucbeeb dec abiacbɨ, ax biecquibɨ rbɨxtiab rniib de diidx zaac lo Dios.

¹⁶Ax guzullibbɨ lo Jesús, guzutec lob lo liu par bdeedbɨ gracyny. Ne bniety Samaria laab.

¹⁷Chiy gunii Jesús: —¿Ta gati tsɨ ná de ni bsiaca? ¿Cúnllɨ dzɨ gaadeb?