Luk 17:1-17

¹Kɔ Yesu oloku acɛpsɛ ɔn darəŋ: «Pəfɔ-tam kəyi ta mes meyi mmɛ mɔsɔŋɛ fum kəciya mɔ. Mba pəlɛc pəyi wəkɔ ɔŋsɔŋɛ ti mɔ.

²Pəfəfərɛnɛ kəkot wəkayi tasar tɔpɔŋ dəkilim pagbal kɔ dəkəba, kɔ pəyɔnɛ wəkayi pəsɔŋɛ wəfəfər wəkin kəloŋɛ-ɛ.

³Nəkɛmbərnɛ bel-bel! Kɔ wɛŋc’əm eŋciya-ɛ, məgbəŋ-gbəŋər kɔ; k’ɛsəkpər amera pəcəmɛ pəlompu darəŋ-ɛ, məŋaŋnɛnɛ kɔ.

⁴Kɔ wɛŋc’əm eŋciy’am camət-mɛrəŋ dɔsɔk din disrɛ-ɛ, a pəluksərnɛ kəder’əm camət-mɛrəŋ pəc-lok’əm: ‹Kəsəkpər k’inder amera few, iŋcəmɛ pəlompu darəŋ-ɛ,› məŋaŋnɛnɛ kɔ.»

⁵Kɔ asom a Yesu darəŋ ŋaloku Wəbɛ: «Məbɛrɛnɛ su kəlaŋ!»

⁶Kɔ wəbɛ oloku ŋa: «Kɔ nəntɔmpər kəlaŋ nkɛ kəyi pəmɔ tɛŋgbɛn tɛfɛt mɔ, nəntam kəloku kətɔk nkɛ: Məgbuktɛ nnɔ məkɔ məcəmɛ nde dəkəba, kətɔk kaŋkɔ kəyɔ tɛfaŋ tonu.»

⁷«Nəna akaŋɛ dacɔ, anɔ ɔyɔ wəcar nwɛ embifti, kɔ pəyɔnɛ fɛ ti wəkayi pəc-kɛk, a pəc-kɔna-yɛfɛ dalɛ, pəloku kɔ: ‹Məder katəna məder məndɛ dɛmɛsa!›

⁸Ntɛ oŋloku kɔ mɔ: ‹Məlompəs’em yeri yem, məbɛrnɛ duma məsɔŋ’im yeri, haŋ ilip kədi yeri imun; k’ilip-ɛ, məna mədi yeri məmun.›

⁹Wəka wəcar kakɔ eŋyek-yekəs kɔ bawo ɔyɔnɛ kɔ mes mɔkɔ ɛfaŋ mɔ ba? Ala!

¹⁰Tin tayi tɔ kɔ nəna, kɔ nəlip k’ɔyɔ mes mɔkɔ afaŋər’un mɔ fəp-ɛ, nəloku: ‹Acar gbəcərəm ŋɔ səyɔnɛ; ntɛ pəmar su kəyɔ mɔ, tɔ səyɔ.›»

¹¹Yesu eyi kəkɔ Yerusalɛm, kɔ Yesu ɛyɛfɛ kəcali atɔf ŋa Samari kɔ ŋa Kalile dacɔ mɔ.

¹²Eyi kəbɛrɛ tadare tɔlɔma, kɔ afum wəco aka sen alɔma ŋander ŋafaynɛ kɔ; kɔ ŋaŋcəmɛ pəbɔlɛ.

¹³Kɔ ŋampɛnɛ sim ŋac-loku: «Yesu, Wəkiriŋ, məyɔnɛ su nɔnɔfɔr!»

¹⁴Ntɛ Yesu ɛnəŋk ŋa mɔ, k’oloku ŋa: «Nəkɔ nəmentərnɛ aloŋnɛ nde kəlɔ kəpɔŋ ka Kanu.» Afum aŋɛ ŋayi kəkɔ, kɔ pəyɔnɛ fɔ ŋasɔk a kɔ ŋandebɛrɛ di.

¹⁵Ntɛ wəkin ɛnəŋk fɔ ɛntamnɛ mɔ, k’oluksərnɛ pəc-cam debeki da Kanu dim dɔpɔŋ.

¹⁶K’ɛfəntərɛ dəntɔf, k’osumpər Yesu wɛcək, k’eyek-yekəs kɔ. Fum wəkakɔ, wəSamari ɛnayi.

¹⁷Kɔ Yesu eyif kɔ: «Bafɔ asɔkəs afum aŋɛ wəco? Deke aləpəs aŋɛ camət-maŋkəlɛ ŋayi-ɛ?