Luke 17:1-17

¹Meke zama la koari Nana disaepeli se Zisu, “Sari na tiṉitoṉa pu va hoqai pa sinea sari na tie si kaqu kamo mae tugo. Ba mani talotaṉa gana si asa pu va kamo mae i sari na tiṉitoṉa arini.

²Leana hola koasa tie sana si pude sidolo nia keke patu lavata ruana, meke la va lodu pania gana pa lamana peava, hola nia si pude vata luarae ia sa si keke koburu hite pa nana rinaṉeraṉe koa Rau.

³Gua asa, ke mi kopu puleni gamu koari na mia tinavete! Be sea sa tasimu, si mu norea; meke be kekere si asa, si mu taleoso nia.

⁴Be va sea atu si asa koa goi ka zuapa totoso pa keke rane, meke pule atu helahelae si asa koa goi ka zuapa totoso, meke zama, ‘Kekere si rau, mamu taleoso nau,’ gua, si mu taleoso nia,” gua se Zisu.

⁵Meke tepa la koasa Baṉara sari na apositolo, “Baṉara, mu va ṉiṉirai sari na mami rinaṉeraṉe,” gua si arini.

⁶Meke olaṉa la sa Baṉara, “Be hitekena hite gua mo na kiko huda masitadi sa mia rinaṉeraṉe, ba boka zama ia gamu sa huda moloberi hie, ‘Mu ta rabutu toa vagi, mamu ta lete pa lamana,’ gua. Meke kote va tabe igo mo sa.”

⁷“Be keke koa gamu si koa nana keke nana nabulu sapu tavetavete va ṉiṉira pa inuma, babe kopu ni sari na sipi, meke totoso pule atu sa pa vetu, si vegua? Kote zama si goi, ‘Mae, habotu mamu henahena,’ gua?

⁸Lokari, lopu kote zama gua asa si agoi! Ba kote tozi nia tu goi si asa, ‘Mu va namanama poniau sa gequ ginani, mamu va sagei sari na mua poko nabulu, pude turu kopu nau totoso henahena na napo si rau. Beto tu asa, meke kote boka henahena si goi,’ gua.

⁹Lopu kaqu hite ta zama leana tugo sa nabulu, sina sari nana tinavete mo si va gorevura i sa.

¹⁰Kekeṉoṉo puta gua tugo asa si gamu. Pana va hokoti gamu sari doduru gua pu garunu ni gamu sa mia Baṉara, si mi zama gua mo he, ‘Gami si na nabulu tavetavete mo. Na mami tinavete tugo mo si taveti gami,’ mi gua mo,” gua si Asa.

¹¹Koasa Nana inene la pa Zerusalema, si ene lulia Zisu sa vari volosona sa pinaqaha popoa pa Sameria, meke pa Qaleli.

¹²Meke sipu korapa ene nuquru Sa koa ke vasileana, si la tutuvia ri ka manege puta tie popoqudi si Asa. Turu pa seseuna si arini,

¹³meke velavela guahe: “Baṉara Zisu! Mu tataru ni gami, mamu salaṉa gami!” gua si arini.

¹⁴Dogori Zisu si arini, meke zama la i Sa, “La mi vata dogoro koari na hiama pude viliti gamu,” gua si Asa. Sipu korapa ene la rini, si ta salaṉa si arini.

¹⁵Meke sipu gilania keke koari kasa sapu ta salaṉa si asa, si kekere pule la koe Zisu si asa, meke velavela vahesia sa sa Tamasa.

¹⁶Hoqa todoṉo si asa pa nenena Zisu, meke zama leana koa Sa. Na tie Sameria si asa.

¹⁷Meke zama se Zisu, “Ka manege puta tu si ta salaṉa, ba avei sari ka sia?