Lucas 17:1-17

¹Tegin Jesús aga e-chapinganga chogalbal: “Imi tulega keg-chulgu wilub-takleged nonida iskuedgin arkwangal. Tenal tule-walgwen iskuedgin tule-pid-egwannonikil, we tule peyedzhe-oturdalenoniko. Tenal we tule ampi peyedzhe wilesmalma.

²Tenal tukalgin-akwa-mu-edinal-nai termalzhe tule-walgwen metel, wedin pul iwen-akalzhul, pul tule-walgwen iskuedgin Pabgin-ibzheed-mimmi-egwangal.

³“Al pemal nue aga takermal, melle iskuedgin tule-pid-egwangal. Imi pe takel, pe-kwenad iskuedgin kudii, pe kwenadga chogo: ‘Pe melle iskuedgin nane.’ Tenal pe-kwenad aga iskuedgin pukib-itononikil, pe kwenadga chogo: ‘Pe-iskueddin pato pelgus.’

⁴“Tenal pe-kwenad ibagwengin ilakugle pegin walmajal, tenal pe-kwenad ilakugle pega chognonikil: ‘Antin pegin-walmajadbal pukib-itononi,’ pedin ilakugle pe kwenadga chogenabmo: ‘Pe-iskueddin pato pelgus.’ ”

⁵Tegin Jesús-nuggin-palmilegalmalad Tummad-Jesúsga chogalmal: —¿Ibiga pe keg anmal-okannode, anmal pegin pul penzhulgal?

⁶Tegin Jesús e-nuggin-palmilegalmaladga chogalzhun: —Imi pemal mostaza-kwaun ankin penzhulil, pemal chunna we morera-chapiga chogo: ‘We-akar pe nao, tegin pe termalzhe kwisgunao.’ Tenal we chapi keg-chulgu pe-choged-pallí kuenab.

⁷Tegin Jesús chogalbal: “Imi pemal-walgwen mos-nikal, tegin pe-mos oveja-takap-dewa, o nagnugin arpajad-akar nonikil-dewa, ¿pe mosga chogo pe ebinzhe: ‘Imisgin pe chigwelo mas kunkal?’ Chulá.

⁸¿Tenal pe pul-kigma mosga chogdagojulzhí? ‘Pe anka mas tuenab, tegin pe mol ogwaenab. Tegin pe anka mas-kunned tegin kobed chedabalo. Tegin pe anka-pél-immal-imajad-cholbal kep pe mas-kunchunmogo.’

⁹“¿Tegin mos pe-chogzhad-pallí immal imajadbal, pe mosga chogo pe ebinzhe: ‘Tog-nued pe anka immal-imajadbal?’ Chulá.

¹⁰Tenal pemal ampamo. Imi pemal an-chogzhad-pallí pél immal imajal, pe melle aga tukin otummogo. Tenal pemal choged-wilubmal: ‘Antin twagdar mos-nued-chul. Tenal antin pinche an-tummad-chogzhad-pallí immal imas.’ ” Teob Jesús chogzhagus.

¹¹Tegin Jesús Jerusalén-neg-kweburzhe natapidgin Provincia-Samaria tegin Provincia-Galilea-abingujiidgin natapmal.

¹²Tegin Jesús neg-kwebur-totoje togdanikidgin tule-walambe-lepra-poni-nikmalad Jesús-iktual pukmal.

¹³Tenal tule-lepra-poni-nikmalad panna igal-pial sapejul Jesúszhe kolalmal chogalmal: —¡Jesús tule-tummadye, imi pe wilejakwa anmal-takelen, nabirinye!

¹⁴Tegin Jesús tule-lepra-poni-nikmalad-takchagu, ka chogal: —Imi pemal ilgwen tule-irwal-Pabzhe-kolmaladzhe nemalo, pemal aga chan oyomalgal, pedin nugusmal. Tegin tule-lepra-poni-nikmalad Jesús-ka-chogzhadyob ilgwen tule-irwal-Pabzhe-kolmaladzhe nadmalzhun. Tenal tule-lepra-poni-nikmalad ampa igalbal-natapidgin aga takalmal e-ponidin pato pelgus.

¹⁵Tegidgin tule-lepra-poni-nika-nad-walgwen aga takchagu ede nugus, kolmakal-kolmakal Pab-Tummad-otummoe Jesúszhe kannan al.

¹⁶Tegin we tule Jesúszhe nonigu, Jesús-abir askun chimtinoni. Tenal tule-nonikid tog-nuedi Jesúsga chognoni. Tenal takalgu, tule-tog-nuedi-chognonikiddin, Samaritano-tule.

¹⁷Tenal Jesús tulemalga chogal: —¿Imi tulemal-nugujadde walambejulzhí? ¿Imi tule-walabakebakkwaddé, pia nadzhun?