San Lucas 17:1-17

¹Tyehe caa catyí ra Jesús chi ra cachicá noo chihin ra: ―Tyicuan ri iyó cha quiñi caa cha satɨvɨ́ chi ñáyɨvɨ. Soco ndahvi ra ndahvi ra satɨvɨ́ chi ñáyɨvɨ.

²Vaha taxin ca cuhñi ra noo yuu sucun ra. Ta cutuchi ra chi ra nu tyañuhu. Coto satɨvɨ ra chi ñu ni nasama cuhva iyó ihya.

³’Sa̱ha ndo cuenda chi ndo. Tatu noo ra tahan ndo ta sacuvi ra noo cha ña vaha chihin ndo. Ca̱tyi ndo chi ra vatyi ña vaha cha sacuvi ra. Tatu nasama ra cuhva iyó ra, sa̱ha ndo tucahnu iñi chi ra.

⁴Ta nɨ ri maa sacuvi ra cha ña vaha chihin ndo ucha tahan chaha cha noo quɨvɨ. Tatu ndɨ ucha tahan chaha ta catyi ra chi ndo vatyi ndu uvi iñi ra cha sacuví ra chi ndo, ndɨ ucha tahan chaha sa̱ha ndo tucahnu iñi chi ra.

⁵Tyicuan ta quichaha catyí ra cachicá tyiño nuu ra Jesús chi ra: ―Cu̱hva cha chinó ca iñi ndi chuun ―catyí ra.

⁶Tyicuan ta catyí ra Jesús chi ra: ―Tatu chinó iñi ndo chi yuhu vasɨ chiin ri tari cuhva noo chɨtɨ mostaza luhlu, cuví catyí ndo chi yutun sicómoro cha nanyaá ihya nacoyo tun, ta cucuinanyaa tun nu tyañuhu. Ta cucuvi nu cahan ndo ―catyí ra Jesús.

⁷Ta catyí ra Jesús: ―Tatu noo nyoho ta iyó noo musu ndo. Ta nachaa ra cha chaha̱n ra nu chiqui chi sahatyiño ra, o chi saha cumi ra quɨtɨ sana ndo, ¿atu catyí ndo chi ra: “Cu̱nyaa ta cachun”? Ña catyí ndo chi ra tyicuan caa.

⁸Soco tyehe caa catyí ndo chi ra: “Sa̱nduvaha cha cuxiñi. Ta tyi̱hun cha cachi. Cha yaha cha cachi tyicuan ta cachi tucu maun”, catyí ndo chi ra.

⁹Ni ña tuhvá ndo nacuhva ndo tyahvi nyoo chi ra vatyi sacuvi̱ ra ñáá noo tyiño tava̱ ndo chi ra.

¹⁰Tyicuan caa tucu nyoho chihin Nyoo. Quɨvɨ ndɨhɨ sacuvi ndo cha catyí Nyoo chi ndo, tahán chi catyí ndo: “Nyuhu chiin ri cha tachu̱n chi ndi, yucuan ri sacuvi̱ ndi. Ta ña yaha ca.”

¹¹Ityi cuahan ra Jesús ityi ñuu Jerusalén yaha̱ ra nu cuví xahñi Samaria chihin Galilea.

¹²Nu chaa̱ ra noo ñuu, quita̱ coyo uchi tahan ra cuhví chihin cha tyahyu coño ra. Ta chicuitayucu ra nyasava ri.

¹³Ta quichaha cacanachaa ra chi ra Jesús, ta catyí ra: ―Yoho, Maestro Jesús, cu̱ndahvi cuñi chi ndi ―catyí ra.

¹⁴Tyicuan ta nanyehe̱ ra Jesús chi ra ta catyí ra chi ra: ―Cua̱han ndo. Ta cua sa̱ñaha ndo chi ndo chi tata sutu vatyi cha nduvaha̱ ndo. Tyicuan ta cuahan coyo ra cuan. Ta ityi cuahan coyo ra ta cananyehe̱ ra vatyi nduvaha̱ ra.

¹⁵Tyicuan ta cuhva cha nanyehe noo ra cuan vatyi nduvaha̱ ra, cuanuhu chata ra nu nyaá ra Jesús. Ta cana̱ chaa ra, ta sacahnu ra chi Nyoo.

¹⁶Ta chicuɨñɨ̱ chɨtɨ ra. Ta nacañi̱ noo ra xiñi ra nya nu ñuhu nuu ra Jesús. Ta nacuhva̱ ra tyahvi nyoo chi ra. Ta ra cuan, ra Samaria cuví ra.

¹⁷Tyicuan ta catyí ra Jesús chi ra: ―¿Atu ñima uchi tahan ndo nduvaha̱? ¿Nya nyaá inga ɨɨn tahan ca ra?