San Lucas 17:1-17

¹Rëꞌ bönniꞌ daꞌquëꞌ Lëꞌ Jesús, rnëꞌ: ―Nacuaꞌtecz le tun ga lun dul‑laꞌ bunách, san bicaꞌ bayechiꞌ nu naꞌ run ga nu gun dul‑laꞌ.

²Dxiꞌar gac queëꞌ bönniꞌ naꞌ runëꞌ cni, nu ugal‑laꞌ yag yenëꞌ guiöj ryëtu len tsajchúꞌn lëꞌ lu nis zxön, catiꞌl gunëꞌ ga gun dul‑laꞌ bö́nniꞌdauꞌ náquinëꞌ quiaꞌ.

³Gul‑gún chiꞌi cuinliꞌ. Chquiꞌ guꞌë döꞌ quiuꞌ böchiꞌ lzaꞌu, bzejniꞌ‑nëꞌ, len chquiꞌ ubíꞌi ladxëꞌë, bnit lau lëꞌ.

⁴Zal‑laꞌ gadx lzu tu dza guꞌë döꞌ quiuꞌ, len gadx lzu caꞌ guidëꞌ ga zuꞌ len guiëꞌ liꞌ: “Rubíꞌi ladxaꞌa”, ral‑laꞌ unít lauꞌ lëꞌ.

⁵Niꞌr tëꞌ Xanruꞌ bönniꞌ gbaz queëꞌ, taꞌnë́ꞌ: ―Ben ga tséjlëꞌrtuꞌ‑nëꞌ Dios.

⁶Rëꞌ lequëꞌ Xanruꞌ, rnëꞌ: ―Laꞌnaruꞌ nac cuidiꞌz yöl‑laꞌ rejlëꞌ queëliꞌ Dios, nacz ca xseydauꞌ mostaza, huac guiëliꞌ yag zxön ni: “Bcuit ni, yajsóa lu nis zxön”, atiꞌ gun ca rnaliꞌ yag naꞌ.

⁷Gnëꞌ caꞌ Jesús: ―Chquiꞌ zoëꞌ bönniꞌ ladj lbiꞌiliꞌ, len zoëꞌ queëꞌ bönniꞌ nadaꞌu rugaꞌnëꞌ‑baꞌ bëdx o rlapëꞌ, catiꞌ udx gunëꞌ xchinëꞌ xanëꞌ, ¿naruꞌ huëtsëꞌ lëꞌ xanëꞌ, gnëꞌ: “Gda, gröꞌ gaguꞌ.”?

⁸Cutu. Cni guiëꞌ lëꞌ: “Bpaꞌa le gahuaꞌ. Gzoa sinaꞌ cuꞌu le guiꞌj gahuaꞌ, atiꞌ tödr naꞌ huac guiꞌj gaguꞌ liꞌ.”

⁹¿Naruꞌ huëtsëꞌ bönniꞌ nadaꞌu queëꞌ naꞌ: “Xclenuꞌ”, le benëꞌ ca gna béꞌinëꞌ lëꞌ? Runi nedaꞌ, cutu gunëꞌ cni.

¹⁰Lëzcaꞌ cni gac queëliꞌ. Catiꞌ chnunliꞌ yúguꞌtë le gna béꞌinëꞌ lbiꞌiliꞌ Dios, ral‑laꞌ gnaliꞌ: “Nactuꞌ huen dxin cunactuꞌ lsacaꞌ, le benztuꞌ le run bayúdx guntuꞌ.”

¹¹Tsal niꞌ yuꞌë nöz Jesús, zijëꞌ Jerusalén, rdödëꞌ gap dë yödzdauꞌ nababgac luyú Samaria len luyú Galilea.

¹²Catiꞌ gyaziëꞌ tu yödzdauꞌ, gularujëꞌ dutsagquëꞌ Lëꞌ chiëꞌ bönniꞌ téꞌinëꞌ huëꞌ nudzuꞌ ruzö́d, atiꞌ gulacuꞌë ziꞌtuꞌz,

¹³len tuꞌë zidzj didzaꞌ, taꞌnë́ꞌ: ―Jesús, Bönniꞌ Usëdi, buechiꞌ ladxiꞌ netuꞌ.

¹⁴Catiꞌ bléꞌinëꞌ lequëꞌ Jesús, rëꞌ lequëꞌ: ―Gul‑tséaj, gul‑tsajluíꞌ cuinliꞌ laugac bxuz. Tsal niꞌ zjaquëꞌ, guluhuöaquëꞌ dxiꞌa.

¹⁵Niꞌr tuëꞌ bönniꞌ nutsëꞌë ladjquëꞌ, catiꞌ ráquibeꞌinëꞌ chnuhuöaquëꞌ dxiꞌa, böjëꞌ ga naꞌ zoëꞌ Jesús, ruíꞌteczëꞌ zidzj didzaꞌ, rguꞌë Dios yöl‑laꞌ ba.

¹⁶Byechuëꞌ len butság lahuëꞌ lyu lahuëꞌ Jesús, len rëꞌ Lëꞌ: “Xclenuꞌ.” Nababëꞌ Samaria bönniꞌ ni.

¹⁷Niꞌr Jesús rëꞌ lëꞌ: ―¿Naruꞌ cu guluhuöaquëꞌ dxiꞌa chiëꞌ bönniꞌ? ¿Gazx nacuaꞌtsëꞌ yezícaꞌrëꞌ bönniꞌ naꞌ?