Lukas 17:1-17

¹Yesus nafada ana mana tuka dea nara nae, “Kadodou na hapu lahenda tuda rala salaꞌ dale, huu no lahenda fekeꞌ a duduku-papaun. Tehuu lahenda manaduduku-papauꞌ ria riꞌ hapu soe bauinaꞌ.

²Maneniko lahenda ra duduku-papauꞌ, losa ana aanaꞌ ara ta nau ramahere neuꞌ Au, neuꞌ ko Manetualain fee ni huhuku mabera. Heke batu bauinaꞌ esa neuꞌ bolii na, fo tuꞌun leo tasiꞌ daleꞌ neu boe, ria nana bei kafaꞌ a.

³De, manea matalolole ao mara, ela emi bosoꞌ tao ma lahenda tuda leo salaꞌ a neu. Tehuu maneniko o toranoo ma tao nasalaꞌ, sona masaꞌai ni. Maneniko ana saledale-tuꞌetei na, ma ana hule ampon, sona mafarene heni sala na leo.

⁴Maneniko nai faiꞌ esa dalen toranoo ma tao salaꞌ laiꞌ hitu, boe ma saledale-tuꞌetei na, basa de ana mai fo hule ampon laiꞌ hitu, sona o muste mafarene heni ria sala na laiꞌ hitu boe.”

⁵Faiꞌ esa, boe ma Yesus ana mana tuka dea nara mai rasare ran de hule rae, “Papa Mesen! Ami dale namahere ma ta teaꞌ a fa. De, tao matetea tamba ami namahere ma dei.”

⁶Yesus nataa nae, “Maneniko emi namahere ma neuꞌ Manetualain kuasa na, leo mae noi baianaꞌ a, tehuu emi bisa pareta ai huu inaꞌ ia mae, ‘Nanafaꞌu, fo marali tasiꞌ daleꞌ muu!’ Neuꞌ ko ai huuꞌ ria tuka tutiꞌ emi pareta ma.”

⁷Basa boe ma Yesus dedea bali nae, “Hai natutuduꞌ. Hapu ata fo foi dae nai okaꞌ, do nanea bibi-lopo nai mooꞌ a. Basa boe ma, ata ria fali uma neu. Leo mae leoꞌ bea boe, malaka na ta bisa nafada ni nae, ‘Mai fo ita dua taa-tinu sama-sama leo!’

⁸Taꞌa! Naraa na, riꞌ malaka na nae, ‘Peda ma mei a fo au ua dei! Basa, sona besaꞌ ko o mua-minuuꞌ.’

⁹Maneniko ata ria tao tuka malaka na hihii-nanaun, emi bate mae neuꞌ ko malaka ria hule makasi neuꞌ ana, do? Taꞌa!

¹⁰Emi leoꞌ na boe. Maneniko emi moi-tao ma basa-basan fo Manetualain pareta so a, sona emi mafada mae, ‘Ami nana noi lahenda nadedenuꞌ. Ami ta saka iꞌio fa. Ami malalaꞌo noi ami nonoi laka ma.’ ”

¹¹Tepoꞌ fo Yesus asa leo Yerusalem reu, ara losa propinsi Galilea no propinsi Samaria a too na.

¹²Ara sakaꞌ masoꞌ leo koroꞌ esa nai na reu, hapu lahenda kamahedi kusta sanahulu mai, fo nau raneta ro Yesus. Ara rapadei nai dooꞌ a.

¹³Basa boe ma ara raloo belaꞌ a rae, “Yesus! Ramatuaꞌ! Kasian neuꞌ ami dei!”

¹⁴Yesus nita si, boe ma Ana nadenu nae, “Emi meu matudu ao-ina mara nai malaka agama ra dei, fo ela ara parisaꞌ rae, emi hedi kusta mara mopo si so, do beiꞌ.” Ramanene leoꞌ na, boe ma ara reu. Tehuu nai eno taladaꞌ, kekeneu te, basa si ao-ina nara makamoiꞌ tutiꞌ a so.

¹⁵Ara laꞌo raroo no dale namahoꞌo. Tehuu sira esa fali seluꞌ leo Yesus neu. Ana heꞌi-heꞌi mesan nae, “Io-oa neuꞌ Manetualain! Huu fo au ao-ina ka makamoiꞌ a so!”

¹⁶Boe ma ana sundaꞌ undulaka na, fo hule makasi neuꞌ Yesus. (Sekonaa te ria, nana lahenda ta Yahudi fa. Ria lahenda Samaria fo radedea ro lahenda Yahudi ra laꞌo naroo.)

¹⁷Boe ma Yesus dedea no basa lahenda fo tuka Ni a nae, “Bisinaꞌ a Au puli a lahenda sanahulu, hete? Tehuu sio rai bea?