Lukasi 17:1-17

¹Pambeli Yesu kavawombela vandundami vaki, “Findu fimugola mundu agoli sambi dafivi, lakini pishu kwa mundu yula mweni chambuja.

²Ingavelili ngiba mweni kumuwopela ligonguweli likomi mungulu na kumudubushila mulihiva, pitu kumuyambusha yumu va vananguta ava vagoli vifyu.

³Muyiloleyi! “Mani mlongu waku pakuvifya, mukayiki, papomela, mjovi.

⁴Mani pakuvifya myanja saba kwa lijuva limu na kuwuya kwa yuwi padeta, ‘Nenga mbomela,’ topi mpomeli.”

⁵Vandundami vamuwombilili Bambu, “Tuyongisheli ujumilwa.”

⁶Bambu ayangulili, “Mani ujumilwa wenu ungavelili mdokwa kucha mbeyu dokwa ya likuyu, mungaweshili kuliwombela libiki ali lya likuyu, ‘Tupuki! Kameli kubahali!’ Na lyeni lingavajumilili.

⁷“Lakini ghani wa yumwi yaveli na ndumindumi yalima awu yadima vasenga, pawuya hela kufuma kufitava, amuwombeli, ‘Lopukeshi, wisi, wikali wulyi filivi?’

⁸Wuli! Damuwombeli ng'odu, kucha undandili filivi, ndilyi, wuyiwopi ungimbanikili, mbaka pandulyili na kulanda, topi na mweni aweshi kulya?

⁹Wuli damulumbi ndumindumi yula kwanongwa kagola kala chichuku chamulayishili?

¹⁰Hata yumwi wuwowu, pamugolili kala fivavalayishili, mudeti, ‘Yufwi tuva vavanda vangajila fwayida, tugola hela fitudayiliwa kugola.’ ”

¹¹Yesu paghaveyi mumwanja kuyenda Yelusalemu apitilili Samaliya na Galilaya.

¹²Payingileyi chijiji chimu, atanganili na vandu lilongu vavelili na ukalava, vawolokili kutali.

¹³Vadetili kwa kulandusha, Yesu, Bambu, tuwoneli lusungu!

¹⁴Pavawonili kavawombela, muyendi mukayilangushi kwa mtambika. Topi pavayendeyi vang'alili.

¹⁵Yumu wa vala pawonili kanana, kawuya kunu pakamjuma Chapanga kwa lishu likomi.

¹⁶Kayiyasilila pasi paulongolu pamawulu va Yesu kunu pakamuwombela Chapanga chikomu Bambu. Ayu avelili Msamaliya.

¹⁷Apa Yesu kadeta, “Wuli vandu vang'alishiwili vavelili lilongu duhu? Vala vamonga tisa vawa koti?