SAN LUCAS 17:1-17

¹Ra̱hn Dihvo vo ri ye ihyan apóstol yahn ye: ―A ca̱de no che va dehtenduh che din che cuahtendihco ihyan nunde, ate ¡yah rí ca̱va adecoduhno ihyan che din ye che cuahtendihco ihyan chena̱hn nunde!

²Tahque nda̱hca̱ ca̱va ihyan min che dechiche ihyan a̱ma tu yudo da̱ndo ye, ne cuaconda̱hnun ye ihyan va̱n nuniya̱hn, che co che din ye che condihco a̱ma cha ihyan chuhn che necun ye nunde.

³Cuihco nchuhn cuda̱do. ’Cuahn che din ta̱n a̱ma ihyan nduco nchuhn ne, coya̱hve ne ihyan nduco ndah. Ndete che nto ino ye che tihca̱ din ye ne, cuenchahco ne yahn ye.

⁴Andahre ndache yune che a̱ma ro din ta̱n a̱ma ihyan nduco nchuhn, ate ndete che namin ndache yune rendaconan ye, ne ra̱hn ye: “Yah rí che tihca̱ dín”, tuhme ne, cuenchahco ne yahn ye.

⁵Ihyan apóstol ne, ra̱hn ye ri ye Dihvo vo: ―Cuenan ne nuhn ca̱va che cotahno ndah nuhn.

⁶Tuhme ra̱hn Dihvo vo ri ye ihyan chahn: ―Ndete che ritahno nchuhn amare tah sihn, co ca̱hcantiyon ne ya̱hn tih: “Cuavi ta̱n, cuehn, cuandi va̱n nuniya̱hn”, ne dinahn yahn ne.

⁷’Ndete che va a̱ma mozo yahn nchuhn che ruhn se ya̱hn, o redin se cuda̱do itenine, ura che ndaconan se che chahn se viya̱ta, ¿a ndeta̱hno ca̱hma ne co ne sa̱hn tuhca̱?: “Cuechoh, cuihnde na̱n mesa, cheh.”

⁸¿A ndiyu tahque ndah che ca̱hcantiyon ne sa̱hn tuhca̱?: “Cuedendah comida, cuihqueyan na̱n mesa, cuihque cuda̱do nahmin che cheh vinó. Cuihno cheh vinó, tuhme cheh vine.”

⁹Cuihno din se nducuahn che chihquentiyon ne, ¿a va che neca̱h ne nundihve cuahn sa̱hn ne? Hua.

¹⁰Namin cuahn che a cuihno din nchuhn nducuahn che a va ca̱de che din ne ne, tahque ndah che ca̱hma ne co ne Dihve ne: “Nuhn ne, mozo nuhn. Nde hua nahn che nte ne nundihve cuahn nuhn, te atena̱n ntiyon che chihquentiyon ne ne, a chemin no che din nuhn.”

¹¹Cuahn che cuahn Dihvo vo ya̱n Jerusalén ne, chuh ye na̱n che rivah esta̱do yahn Galilea nduco nación yahn Samaria.

¹²Ura che a nda̱ nino ye a̱ma ya̱n lihn ne, nda̱ ndiche sa̱hn che ndi se cah che recha̱ yute.

¹³Cah se: ―Dihve nuhn, Jesús, ¡conan va̱hino ne nuhn!

¹⁴Cuahn che ndihchero ye sa̱hn chahn ne, ra̱hn ye ri ye sa̱hn: ―Cuahn nchuhn na̱n chidocuya̱n. Dinahn sa̱hn chahn, ne nahmin che cuahn se ne, ndoyahn nducoya̱ca se.

¹⁵Tuhme a̱ma se ne, cade ndihchero se che a ndoyahn se ne, ndaconan se, ne a̱ma rendeva se yavena̱n Dendiohs.

¹⁶Chehntihya se numacuahn vedenecun na̱n Dihvo vo, ne neca̱h se nundihve cuahn ihyan. Sa̱hn min ne, sa̱hn ta̱ma nación se. Samaria nación yahn se.

¹⁷Tuhme tumerune Dihvo vo: ―¿A ndiyu ri ndiche sa̱hn chahn che ndoyahn se? ¿Tiya sa̱hn che nun chahn?