Luk 17:1-17

¹Jisösnöŋ gwarekurupŋi keu kewö jii mötket, “Bölöŋaŋgö supatitikŋan mönö awamŋanök asuhumakza. Kunöŋ supatitik aŋgön kölmamgö osimakzapmö, kun daŋön tosatŋi kölgorom ak eŋgiiga siŋgisöndok akŋei, yaŋgöra mönö wölziköba ‘Yei!’ jizal. Sihimbölö öŋgöŋgöŋan mönö yaŋgö qakŋe öŋgöma.

²Yaŋön ambazip moröŋi yeŋgöreŋök kun kölgorom ak waŋgiiga siŋgisöndok akŋawi, azi miaŋön mönö lömböt öŋgöŋgöŋi miwikŋaima. Anutunöŋ lömböt miaŋgö likepŋi denöwö waŋgiiga dopŋe akawak? Kemuŋ jamönjiŋ jölŋe jöhöba köwet röndumnöŋ gilget mulumgöi gebawak, miaŋön mönö awamŋi ahum waŋgii tandök akawak.

³“Miaŋgöra mönö nanŋini galömŋini mem aŋguba malme. Alagi kunŋan siŋgisöndok akzawi, i mönö jim mindiŋ ak waŋgiman. Jim mindiŋ ak waŋginöŋga möt bölim aŋguba wösöŋi mötma ewö, gi mönö siŋgisöndokŋi mosöt waŋgiman.

⁴Wehön kungö uruŋe siŋgisöndok 7 ak bölim gihiba indimŋi 7 göhöreŋ liliŋgöba kewö jima, ‘Alani, ni siŋgisöndok akzalaŋgöra möt bölim aŋguzal.’ Mewö jima ewö, gi mönö siŋgisöndokŋi mosöt waŋgiman.” Mewö.

⁵Aposol yeŋön Kembugöra jiget, “Mötnaripnini mönö toroqeba mem köhöiman.”

⁶Mewö jigetka Kembunöŋ meleŋnök, “Mötnaripŋinaŋgö ölŋi mi nejoŋ kötŋaŋgö dop ahöbawak ewö, eŋön ölöp nömözup ip kiaŋgöra kewö jim kutubeak, ‘Gi mönö jöla jalögabuk wahöta luhuba köwetnöŋ geba nangi kömöta kinman.’ Mewö jiba möt narigetka ip miaŋön mönö keuŋini tem kölma.” Mewö.

⁷“Eŋgöreŋök kungö nup azinöŋ bulmakau memba nupnöŋ anda kinoŋ öröi gölme mesiŋma me lama galömŋina malma. Mala mire kaŋgori miaŋgöreŋ toŋan kewö jii mötma me qahöpto, ‘Gi mönö mire kota tata nenegi neman.’

⁸Mewö qahö! Yaŋön mönö kewö jima: ‘Gi mönö o ariba möhamgöm aŋguba suŋgemgö neneŋamni ohoba ala niŋginöŋ nemam. Miaŋgö andöŋe nangi neneŋamgi ohom neman.’

⁹Mewö jim kutum waŋgiiga nup aziŋan jiyöhaŋgö dop nupŋi mem teköi dop köliga galömŋan miaŋgöra möpöseim waŋgima me qahö? Qahö!

¹⁰Eŋgö könaŋini mi mewöŋanök ahöza. Galömŋinan yuai pakpak jim kutum eŋgiyöhi, iŋini mi ak teköba miaŋgöreŋ kewö jime, ‘Nini nup ambazip töhöna maljin. Galömninan yuaigöra jiyöhi, mönö miyök memba kazinaŋgöra möpömöpösei jarubingö osizin.’” Mewö.

¹¹Jisösnöŋ Jerusalem sitinöŋ anmamgöra Galili aka Samaria prowins yahöt mietkö sutŋire köna ahöyöhi, miaŋgöreŋ anök.

¹²Könanöŋ anda miri kunöŋ aŋgoriga azi 10 sileŋini uzikukuŋambuk yeŋön miwikŋaiba eka tikep endu kinget.

¹³Kinda köhöikŋanök qeta jiget, “Ketaŋamnini Jisös, mönö neŋgöra ak kömum gihima!”

¹⁴Qeta jigetka eŋgeka kewö jii mötket, “Iŋini mönö jike nup galöm yeŋgöreŋ anda sileŋini kondel eŋgime.” Mewö jiiga tem köla könanöŋ angetka sileŋinan miaŋgöreŋ solaniba ölöwahök.

¹⁵Ölöwahökmö, 10 yeŋgöreŋök kunŋan sileŋi solanii eka liliŋgöba kaba Anutu köhöikŋanök qeta möpöseiyök.

¹⁶Möpöseiba Jisösgö könaŋe geba sipköba simin köla ‘Saiwap!’ jiyök. Azi mi Samaria azia. Juda yeŋön Samaria prowinsgö ambazip yeŋgöra mötketka eretŋi ahakzapma.

¹⁷Saiwap! jiiga Jisösnöŋ meleŋda jiyök, “Mi ölöp akzanmö, azi pakpak 10 eŋgö sileŋinan lök solanim teköyök me? Azi 9 mieŋön mönö denike malje?