Lucas 17:1-17

¹Jesúsbe nui kusrenanøb pera uniilan trenchibig køn: —Chine chinetø iløsrkøb kegørrøsrkøb attrabigwane arrumønrrai chincha katamgaig køn cha. Inchendø ¡møg waacha! tru kaigwan nø pera mara kebenøsrkøbigweimbe ¡kan maig kuaasamørra! cha.

²Trembe kan tirigu kitsig nu srugwan naashigu iløsrka, mar umbusrø kegutsig kuinguen søl købsruinrrun cha, i shushmeran kaig mara kegørrøsrkøbgunrriibe.

³Inchawei ñimdøwei ashiptø kuy cha. Ñui nuneg ñun chigøben kaig marene: “Ñi øyeeg marmumbala” cha, alegau, chibig køn. Inchen nø nui kaig mariilan isua møra, Tiusweimay llirabene, ñibe trunun yandø mas ulø paymønrrab, pesannau cha.

⁴Mawawan nøbe katøle, katøle siete nebumnegatig ñun kaig mara, tru kaig marimørig ñun: “Øyeeg maramgaigwan marar” chib arrubene, ñibe trunun mas ulø paymønrrab, yandø pesannamig køn— cha, trenchibig køn Jesúsbe.

⁵Jesús nøashib karua øriiløbe nun trenchibelø køn: —Namui isubigwan ñuinug mas tøga melaigwan nemartra— cha.

⁶Inchen Señorbe trencha løtabig køn: —Ñim kan murtasa yellburaptiitøguen isubigwan nainug pasra tøgar kuimbe, i sicomoro tusrwan: “Yugurri ucha, maryu ellgwawa pasrambu” chibene, tusrbe maig chiben mørøbsruinrrun cha.

⁷’Ñimma møikkøben, kan karuindiig megabig tøgagua arab uña, traugurrin kui, kabe ubisha ashib uña kui pubene: “¿Puraarrua, kabe yusrø manrrab wamisr” chinrraitirru? cha.

⁸Treeg chimøtø: “Nai mamigwanmerrig nena, pala itøgueigwan kewa, pørønawa, na chab mab, chab mutsamnegatig chi palain kuindø purørtrab ashib pasrau cha, treebe chinrrun cha. Incha trugurrimbe si, ñigucha mab, muchib inchig” chinrrun cha.

⁹Kabe nui karuindiig megabigwanma nø maig karuigwan maren, ¿truburø ‘ungwa’ chibelø kuitarru? cha.

¹⁰Ñimgucha treetøwei Tius maig karuigwan kerrigu marabe, trenchinrrigay chibig køn: “Nambe mendig melabelø chiguen trengatig marmeelø ker cha. Kaguende ke maig karuizhigwandø nebua marer”— cha.

¹¹Jesús Jerusalénsrømay ippe, Samaria pirøwanba, Galilea pirøwanba pureb maywan pureb ya,

¹²kan yamera tsitsø pønrrabnug pubene, møguelø diezelø lepra kwanrrø asr ørø trerabig tøgar katønrrab werruppe, werrubendø, yaptø pønrramisra,

¹³trashibelø køn: —¡Jesús, ñi Kusrennøbig, namun lastima ashcha!— chib.

¹⁴Inchen Jesús ashabe, trenchibig køn: —Judíosmerai sacerdotesmeran eshkanrrab ambay— cha. Inchen nøm ambub pønrramnetø nømui kwanrrøbe tammisra, chishmisrikken kørrømisrøbig køn.

¹⁵Inchen møikkøsrøn nun chishmisrin kui ashabe, truba mur trashib Tiuswan truba tabig waminchib katø arruabe,

¹⁶Jesúswei merrab tømbønsra ‘ungwa, ungwa’ chib maløwan piraugatig utsøbasrøbig køn. Tru møøbe judíoguen kømøtø, samariasriig købig køn.

¹⁷Inchene Jesúsbe trenchibig køn: —¿Kwanrrøwan chishmariilø kørrømisrøbeløbe yamba diez kømmørgøppeh? cha. ¿Nueveeløbe chu ambah? cha.