Luka 17:1-17

¹Yesu iwete pang di galiunu nen, “So matana matana la be pompombe, ngan ole igarung di tooltool le tikapsap ye dada dook tiap ke noonoo nga. Bong atoo, tool yo be iyei dada dook tiap moonoo nen a pombe pang ye di tooltool le be tikapsap ye noonoo i, in ole Maro iyemenaii le dook tiap yege.

²Ngan kumata le tool tani in be isokkara di kakase yo maimai tiap ngan atu lono, le be ikapsap ye noonoo nga, ngan tool tani in ole isolo urata moonoo dook tiap. Le moolmool, kumata be tituku pat somai yo ke raunganingi dingding patunu ngan atu lo gurini, inbe tikatte du tiek lono a be nen ngan idadup a imata nga, ngan ben dook kasin, yesoo bong urata moonoo dook tiap yo be isola ye dada dook tiap ki tani yo iyeii i, in ole dook tiap le dook tiap ki taunu.

³Le be nen ngan ang tapmim lapau, kin kakamatang dook leu. “Ngan kumata em atu be iyei dada dook tiap ke noonoo pong nga, ngan kula ye la kuwete panga a kupassonga ye dada. Kumata le be ilongo betanga kiong le be iportaka lono nga, ngan lom panga a kugiri noonoo ki.

⁴Le kumata be em tani in iyei dada dook tiap ke noonoo pong a iman iwete pong be iportaka lono oo, lo ngan be iyei dawa ben yo muku nga, ngan mulu le lo limi be ru ye ke atu nga, ngan be nen ngan lom panga a kugiri noonoo ki.”

⁵Di aposol ke Yesu tiwete panga nen, “Tool Mai, am nga lomam be kuyeie lo medana kiam yo amtaru pong i, in le lo mai.”

⁶Motong la Tool Mai tani in iwete pang di nen, “Ngan dook mata, bong kumata be lo medana kiang yo kataru pang Maro, in mai tiap le dawa ben kai mastet patunu leu nga, ngan ke be kawete pang kai somai i nen, ‘Kugamong le kupa ye ramim, inbe du kupe ong meneng tiek pono ni,’ ngan ole ilongo betanga kiang a itoo.”

⁷Motong la Yesu iwete mulu nen, “Be ang tina nga atu be iwete pang kapraingi ki la itara tana ye kumu ki, too be la matan kala di sipsip ki nga, ngan ye kene yo be kapraingi ki tani in imulu a iman pang rumu ki nga, ngan ole iwete panga belei? Ole iyei ne, ‘Kupa tarai se kuwur, a nen ngan kon so,’ too?

⁸Tiap! Ole iwete pang kapraingi ki tani in nen, ‘Kudawai kaningi kiau nga, lo ngan be kukaratong le dook, inbe kuso kaningi kiau tina a kop man akan. Ole akan be ayin muku le kapok sung ngan, lo ngan be ong kon be kuyin mur kooti.’

⁹Ngan lom belei, ole iwete lo ponana ki sa pang kapraingi ki tani yo iwete panga ye soo urata ngan le ilongo koonoo a iyeii, in lapau, too tiap? Tiap!

¹⁰Ngan nen le ang lapau be kayei porai urata yo Maro iwete pang ye be kayei ngan le imot nga, ngan kawete panga nen. Kayei ne, ‘Am nga ben di kapraingi kiong sokorai leu, le soo urata kiong yo kop pam be amyei nga, ngan ampas le amyei leu.’ ”

¹¹Motong la Yesu itoo dada a be ilo pang Yerusalem. Ngan le ipa kataunu ye ker ke malala mai ru yo Samaria inbe Galili nga.

¹²Le nga ipa a ilo be lo pombe ye malala kase atu, ngan di tooltool sangaul atu yo botoboto medana ikan di nga, ngan man titauaraii dada mai. Le nga la tikodo manga mooloo ye kasin,

¹³inbe koodi le mai. Tiyei ne, “Atoo, Yesu! Tool mai, lom pam a kulonam!”

¹⁴Motong la Yesu ikamata di le iwete pang di nen, “Kamulu a kalo, ngan le lo ang tapmim kapatnai tinimim pang di tooltool ke paroranga so pang Maro nga.” Le nga be tipa a timulu a tilo, ngan botoboto kidi tina ngan imapmap le tinidi dook mata mulu.

¹⁵Motong la di tooltool tina ngan atu in ikamata tinini ngan dook mata mulu nga, le nga imulu tak pang ye Yesu a idu, ngan lon ponana le koonoo le mai, inbe iyitmaka Maro ene.

¹⁶Ngan ipa le idu potai ye Yesu, motong igun turunu le du damon toko tana kene punu, inbe iwete lo ponana ki panga. Ngan tool tani in tool ke Samaria.

¹⁷Yesu ikamata le nga iyei ne, “Ai, ayeisa ang tooltool tina yo sangaul nga, ngan la akaratang le imot a tinimim dook mata mulu nga. Bong ngan di diem yo limi be pai nga, ngan tila ngai?