San Lucas 17:1-17

¹Räjp Jesús loj rexpejṉpacni: ―Siäädpac recos ni gun jiajb bejṉ lo dojḻ. Proobza bejṉ ni rujn riajb bejṉ lo dojḻ.

²Maaz guliibni te guij xten molin guejnni, gusäḻ bejṉni lo nisdoo cadro jiätro quela gunni jiajb rexi'nä ni ahuililajz xtidxä.

³¡Coḻsusiṉ! ’Palga gun bejtzlu dojḻ lojlu, balijdxni. Palga gusiechlajzni, basiäjḻ diidx con laani.

⁴Masque gajdz huält neṉ teb dxej gunni dojḻ lojlu, palga jiädniini lojlu gajdz huält, naani: “Xhet laadi benä, basiäjḻ lajzlu”, basiäjḻ lajz con laani.

⁵Gunii rexpejṉpacni lo Jesús, räjpreni: ―Dad, baniidxru yäḻrililajz loonu.

⁶Dxejc räjp Jesús lojreni: ―Palga rajptu yäḻrililajz, mase najcni si'cti te bedzbäz xten muxhtas, sajc gäbtu lo yagro rec: “Biliädxa' ro'c, guzuj galäii nisdoo”, susobdiajg yajgga xtiidxtu.

⁷Räjpzani: ―¿Chu tejtu ni rajp te mos ni riga'n o ni rigajp rexquidxaani ni gäbni lojni che guibi'ni lo niaa: “Biu'ga, gurej lo mex te gaulu”?

⁸Dini gäb si'c. Niluxh säjpni lojni: “Bachaa xhajblu. Bejn xhi gauä, gudanäni loä. Che luux gauä, yä'ä, dxejc sajc gauzalu, yäzalu.”

⁹Dini gudeed xquixtios lo mosga sa'csi rujnni recos ni gunibeeni sa'csi si'c riäjḻ gunni.

¹⁰Sigajcza la'tu, che luux guntu guiraa redzuun ni guniä guntu, riäjḻ guiniitu lo Dios: “Najcnu mos ni xhet sajcdi, nani riäjḻ jiennu, ni'ctis biennu.”

¹¹Laḻ ni sasaj Jesús nez guedx Jerusalén, gudejdni loj región Samaria näjza región Galilee.

¹²Che biu'ni tej reguejdxga, huichagloj Jesús tzuu bejṉ ni rajc te yäḻguijdx ni raḻ tiejxhreni, niluxh zijtru guzujreni.

¹³Dxejc rbedxa'reni räjpreni: ―Jesús, Dad, Mastr, balaslajz nuurnu.

¹⁴Che bahuii Jesús lojreni, räjpni lojreni: ―Coḻchäj, te fii rebixhojz abiajctu. Laḻ ni sääreni, bia tiejxhreni.

¹⁵Dxejc tejreni, che bahuiini abiajcni, gubiguxuṉni, cabedxa'ni calä'pni xpala'n Dios.

¹⁶Bazuxhijbni nez loj Jesús, basajbni lojni lo yuj cagudeedni xquixtios loj Jesús. Luxh bejṉre najc te beṉzijt, te beṉ Samaria.

¹⁷Dxejcti räjp Jesús lojni: ―¿La et tzuudi najc reni biajc, ä? ¿Con sgaareni?