Luka 17:1-17

¹Iesu abo i ribalau ena heaheatayao aridi eai, i ene, “Alabesibesi taba se laoma: ia tauhetubudi mo, kapore!

²I lolo we’u lailai ia gadona eai se au hepatulaei, ia abo se gabadobei gabogabo eai, ata merumeru gagirina esau hinage i healabesibesi.

³Au komakomanimiu: ena em tau i hebaaeam, u guguiai: ena nuana i bui ena baaea u nuatugabaedi.

⁴Ena asubena esau ma haligigi‐labui i hebaaeam, eo asubena esau ma haligigi‐labui i uiowa, i ene, ‘Nuagu ea buiyao,’ ena baaea u nuatugabaei.”

⁵Aposotolo tataodi se ribalau Guiau arinai, si ene, “Guiau e, ema sunuma u hemotulayama.”

⁶Guiau i ene, “Taba emi sunuma doha sinapi tumana esau, omi abo au ribalau teina oeagi wa sukamine arinai au ene, ‘Se laahaim se umaim gabogabo eai’; abo hinage i awaabiemiu.

⁷“Eai arimiu eai, ena heaheari tauna tano i giari, e bulumakau i heaidi, ia oea eai i laoma abo au ribalau ia arinai au ene, ‘U lau, u bawabigabiga, u aiai?’

⁸Omi emi riba doha ina wa, au ene, ‘Agu aiai u pei nonohai, em nogi u lio, u saguigu ea aiai eo ea aiainom; e abotai abo u aiai eo u ainom?’

⁹Heaheari wa riba u lauhesom wa i abiwataidi, ia abo au lautoiei? Nuana nige’e.

¹⁰Omi hinage, ginauri gamagaridi se lauhesommiu au ginauriheohidio, abo au ene ai heaheari baaeamai: meta ama paisoa mo, arinai ai ginauri.”

¹¹Iesu abo i lau Ierusalema, Samaria eo Galilaia i baeawa duaduaridi eai.

¹²Eanua gagirina esau eai ie lage, lepera tataodi saudoudoi ia maedi se hailobai, isi se totoro eda lohaloha eai.

¹³Se arina lailai, si ene, “Iesu e, tanuagamai e, u nuatoatoaemai.”

¹⁴Ia i itadi, abo i ribalau aridi eai, i ene, “Au lau au hemasarahauioimiu kohena aridi eai.” Ma laulaudi eda eai, abo se aa.

¹⁵Esau aridi eai, ie ita i mauri, abo ie uio, i arina lailai arinai Eaubada i aihelahui.

¹⁶Eo i gurisalaoba Iesu aena eai, i lautoi: ia Samaria tauna.

¹⁷Iesu arinana i heuio i ene, “Tatao saudoudoi se heaadi e nige’e? Tatao haligigi‐hasi wa haedi?