San Lucas 17:1-17

¹Jayave Jesús jei jemimboe reta pe: —Jecuaeño yogüɨrecota oporomboavai vae reta. Erei oporomboavai vae ñavo oiporarata co —jei—.

²Icavita tei co iru vae reta oñapɨti vaera iyayu rupi metei ita tuicha vae ombaeso pɨpe vae jare omombo vaera ɨ guasu pe agüɨye vaera oyapouca tei metei cuae michia pe mbaeyoa —jei—.

³Peñeandu. Nderɨvɨ oyapo yave icavi mbae vae ndeve, neñeengueta chupe. Jare jae ipɨatɨtɨ yave jese, neɨro chupe —jei—.

⁴Jare oyapo yave icavi mbae vae ndeve siete vese metei ara pe, jare jei yave ndeve siete vese jocuae ara pe ipɨatɨtɨ co jese, neɨro chupe —jei.

⁵Jayave ñandeYa jemimondo reta jei chupe: —Emombeu oreve quirai oreporogüɨrovia ipuere oñemoiru.

⁶Jayave ñandeYa jei chupe reta: —Güɨramoi peporogüɨrovia michi yae metei mostaza jaɨgüe michi yae rami. Erei jocuae nunga mborogüɨrovia penoi yave, pepuereta pere cuae ɨvɨra sicómoro jee vae pe: Ecua cuae güi epɨta ɨ guasu pe, jare ɨvɨra oyapota peregüe —jei—.

⁷Güɨramoi metei tembiócuai ojo co pe oara vaera ani omongaru vaera maemɨmba reta. Iparavɨquɨ opa ma oyapo yave, ou ye iya jo pe. Erei iya mbaeti etei jei chupe: Eyu eguapɨ cuae mesa pe ecaru. Mbaeti jocorai jei —jei—.

⁸Echa iya jei chupe: Ecua rani emboyɨ mbae jau vaera. Jayave eipoepɨ neremimonde reru vaera cheve cherembiura. Jare che opa ma acaru yave, ndepuereta recaru —jei, jei—.

⁹Jare iya mbaeti etei omee yasoropai jembiócuai pe jembiócuai oyapo jeigüe rambue —jei—.

¹⁰Jae ramiño vi pe reta peyapo ma yave opaete Tumpa jei peve peyapo vaera vae, pere peyeupe: Mbaeti mbae ayapo añemboeteuca vaera cheYa pe. Echa jaeño ayapo jupi ayapo vaera vae. Jocorai pere —jei.

¹¹Jare Jesús ojoñoi Jerusalén cotɨ. Jayave ojo ovae Samaria jare Galilea ipau pe.

¹²Jare ojo metei tenta pe ovae, jare joco pe yogüeru Jesús cotɨ diez cuimbae ipire ocúi vae reta. Erei jae reta opɨta mombɨrɨ Jesús güi.

¹³Jayave jae reta iñeeata reve jei Jesús pe: —Jesús, oporomboe vae, oreparareco.

¹⁴Jare Jesús oecha reta yave, jei chupe reta: —Pecua sacerdote reta pɨri, jae reta omae vaera peré —jei. Jare yogüɨraja rambueve, güɨramoiño mbaeti ma ocúi ipire.

¹⁵Jare metei cuimbae ou ye iru cuimbae reta ipɨte güi jare iñeeata reve jei: —Tumpa toñemboeteuca. Echa oicuaa ocuera ma co imbaerasɨ güi.

¹⁶Jayave oyeatɨca Jesús jóvai jare omee yasoropai chupe. Jae co Samaria pegua.

¹⁷Jayave Jesús jei: —Ambogüera diez cuimbae reta. Erei nueve mbaeti yogüeru ye —jei—.