Lucas 17:1-17

¹Minikagi si Jesus diyà te menge tinoledaan din, “Doen gayed mekebaet te pegpemenal te kedita te otaw, meneng mekelelayò se otaw eg-inang kenyan, so ontò sikandin ipelumun.

²Labi pa mèpiya aw iketan se lieg din te dakel bato aw idagdag doton te lawod, amon eked din kebàti se pegpemenal te mengisù migpesakop diyà kanak, pengkey sebad.

³Keilangan megpekeimanday kaw. “Na, aw doen otaw meg-inang te salà diyà kenyo, ikagi kaw diyà kandin tepad te salà ininang din. Aw megselsel sikandin, pegwedadi niyo se salà ininang din.

⁴Pengkey mekepito sikandin peg-inang te medaet diyà kenyo dalem te sebad olò se aldaw, kelikit te pegselsel din kenyan, keilangan pegwedaden niyo se kedita te salà din.”

⁵Minikagi se menge sogounun i Cristo, “Lobosi se pegsalig day diyà kamno.”

⁶Minikagi se Pengolo, “Mikagi a den diyà kenyo te pengkey deitek pa se pegsalig niyo diyà kanak iling te kedeitek te benì te mostasa, mekebatog kaw mikagi diyà te dakel kayo te pispisen din se lawa din aw malin doton te dagat, aw tomolò iyan kenyo.”

⁷“Simpana doen sineligan egdaro aw egtonggò te karniro te amo din. Aw mepenga se pegterbaho din doton te pawà, aw domoton te balay, eked kepakay aw sikandin se monà ipekaen te eked pa kaen se amo din.

⁸Meneng onà megpunù se amo te keilangan meg-inang se sineligan te kànen aw meglamak kenyan. Penga te pegkaen te amo, yan mepakay aw komaen se sineligan.

⁹Mepakay heman aw eked pesiontongi te amo se sineligan timolò te punù din, so yan se terbaho din.

¹⁰Iling kaw heman te sineligan sìyan, so penga te pegtolò niyo te kedita te punù te Timanem diyà kenyo, eked kaw pesiontongi, meneng keilangan mikagi kaw diyà kandin, ‘Eked kay nikaw duyuni, so olò day ininang se keilangan toloen day.’”

¹¹Pegpesalo i Jesus doton te Jerusalem, minokit sikandin diyà te pigkitaan te probinsya te Samarya aw Galiliya.

¹²Pegdateng din doton te sebad baryo, nesongonan sikandin te sempolò otaw tompigun. Pengkey mediyò dan pa,

¹³meneng timawal dan, “Jesus, Pengolo, keidowi kay bag.”

¹⁴Pegkità din kandan, minikagi sikandin, “Doton kaw te menge pengolo te simbahan aw pegpekità kaw diyà kandan te lawa niyo.” Pegdoton dan, negolian se kedita dan te wedà dan pa dateng.

¹⁵Doen sebad otaw kidoen kandan, pegkità din te negolian den, dimuyun sikandin te Timanem te dakel se kagi din, aw limikò sebad din diyà ki Jesus.

¹⁶Limongken diyà ki Jesus, aw migpesiontong heman sikandin. Tege Samarya se otaw sìyan.

¹⁷Penga niyan, minikagi si Jesus, “Pengkey sempolò se kedita dan pinegolian ko, meneng sidebok se otaw limikò amon domuyun te Timanem, aw kenà sikandin Judiyo. Nepela a, so wedà heman likò se siyam Judiyo doma din.”