San Lucas 17:1-17

¹Jesús guzre̱' benne' ca' dxusé̱dene̱': ―Welezúaqueze da xelún na xelebaga bénneache dul-la, na' edxugúa bénnea' gune̱' da gun na xebaga benne' xula dul-la.

²Gácadxa chawe' chee̱ bénnea' che nu guchéaj xiaj xiche lbe̱', na' chu'e̱ lu nísadau' naga gátete̱' quézcala gune̱' da gun na xebaga bidu caní dul-la.

³Le guxúe xanne' cuínale. ’Che le sa' ljwezru' gune̱' chiu' da cale̱la, bzéajni'ine̱', na' che xebí'i lazre̱', bnite lau chee̱'.

⁴Lácala gune̱' chiu' da cale̱la gazre lasa tu zra, na' gazre lasa xide̱' xe̱'e̱ lue': “Dxexebí'i lazra'”, dxal-la' gunite lau' chee̱'.

⁵Benne' gubáz ca' chee̱ Xránadxu gulé̱'e̱ Le̱': ―Be̱n ga cheajlí lázredxantu' Dios.

⁶Nadxa gunná Xránadxu: ―Che le'e zrué'ele xel-la dxeajlí lazre', lácala naca na láteze ca tu bínnedu chee̱ mostaza, waca xe̱le xaga zrente̱ nigá: “Gucuasa nigá, ne xeajsúa lu nísadau',” na' xaga na' guzúa na dizra' chee̱le.

⁷’Che tu benne' ládujla le'e zua tu benne' we̱n zrin chee̱', na' xelé̱'e̱ le̱'e̱ xixre' gate te gudée̱' be̱zre u guxúe̱' béadu ca', ¿we̱'e̱ benne' we̱n zrin na': “Gudé nigala, gudxé'e gagu'?”

⁸Cabí, san nne̱': “Bcueza da gawa', ne gusí' chawe' le̱'u chee̱ gaca ca'u chia' da xi'aj gawa'. Te na' waca xi'aj gagu' lue'.”

⁹¿We̱'e̱ benne' we̱n zrin na': “Xcalenu'”, lawe' da be̱ne̱' da gunná be'e xrane̱' le̱'? Cabí.

¹⁰Cá'anqueze le'e, gate xuzre gunle xúgute̱ da gunná be'e Dios le'e, dxal-la' nnale: “Nácantu' benne' we̱n zrin quebe bi zaj zaca, lawe' da quebe bi ne guntu' da zréndxala ca naca da nabágantu'.”

¹¹Ca zexíaj Jesús zéaje̱' Jerusalén, gudée̱' lu xe̱zr la xu chee̱ xe̱zre ca' zaj nababa Samaria, ne xe̱zre ca' zaj nababa Galilea.

¹²Gate bzrine̱' tu xé̱zredau', bedajlechaga Le̱' chi benne' zaj de̱'e̱ we̱' guzru', na' belezé̱' zítu'la,

¹³ne gulebezre xe̱'e̱, dxelenné̱': ―Jesús, Benne' Wese̱de, bexache lazre' netu'.

¹⁴Gate ble'e Jesús le̱', na' gunné̱': ―Le chjaca le cheajlué'e cuínale lau bxruze ca'. Dxácate̱ zjaque̱' na', na' belexexaque̱' chee̱ xízrawe̱' chee̱'.

¹⁵Nadxa tu benne' ca', gate guque bé'ene̱' ba bexaque̱', na' bebi'e̱, dxue lá'ane̱' Dios du lazre̱'.

¹⁶Bzu zribe̱' lau Jesús, ne gudíxrujte̱' lawe̱' lu xu, dxe̱'e̱ Le̱': “Xcalenu'.” Benne' nigá naque̱' tu benne' Samaria.

¹⁷Nadxa gunná Jesús: ―¿Quegá chie̱' na' belexexaque̱' lu xízrawe̱' na'? ¿Gazra na' xegué̱'?