Luk 17:1-17

¹Te Jisasgo aga wali asobo bagebolo te po wali, “Te haniani dwai sę ebo kolesaga mu elalubo. Tiali goli, dwai sę ebo sunumi dayabo bidi nosali moni dene mu saibao.

²Aga te tobage sę eidali weyu, augwaligo aga magede moni masigi bonogo kęyu, te bidi te tamu ąį tomoba sąyu, aga tede isigi sogo da, teda te usu igi dao. Aga te tiwai isibaso, tama dwasianu dene saibao. Me ma, te bidi bidiyu, agai e nogi meni yai we bidi me deli te dwai sę ebo kolesaga tomoba gegeyu egi sogo da, teda agai te dwai sę mu egi dao. Te dwai sę eyu da, tama nosali Godigo agabolo moni dene mu mawaibao. Duga digi tobade te koneama, tonaluiąo, dwai sę edugio menio, bugagia bidiąo,” wali.

³“Te kisalubo bidi agai nagede dwai sę ebaso da, teda nago agabolo ‘Te dwai sę igio’ wao. Tama olama, te dwai sę yali bidi aga homu begelebaso, agai yali dwai sę nago sela sąyao.

⁴Tama agai nagede dwai sę elama, tama nosali ‘Te ena nagede dwai sę yalide, te ena hobede ebao’ nageba wagasu da, teda nago aga yali dwai sę sela sąyao. Te bidi deli sogode te tiwai sę me badu nogo a naga olama, me badu nogo si ebaso da, teda nago aga yali dwai sę tigidali sela sąyao, wei ponogio,” Jisasgo te po wali.

⁵Te po sela pabo bidi augwaligo Genuai Bidi Jisasbolo te po wali, “Dena homu kolesaga nageba muani digi, da usube. Da tau sao, dena homu kolesaga tigidali nageba mumainu. Te tiwai munama, te usu yaibao,” te po wali.

⁶Tama te Genuai Bidi Jisas agai augwalibolo te po wali, “Edao. Dagego kolesaga enaba mu dąų wabo sę te dwasianunu kemeni ge tiwai dwasianu elalugi sogo da, teda e gasa nigo dagego wabo po odigi da. Dagego e gasa niba ‘Nage naga pedali dabe tǫdu gudama, tama te tamu ąįba pelama, naga digi teba buligi pao’ obaso da, teda te nigo te po odaibao, teba buligi paibao,” wali.

⁷Jisasgo te po me wali, “Dage tomode bidi me deli agai sę ebo bidi elaluyu, tama te sę ebo bidi agai te gi tǫ elebo sę ebo da, ma te kibu sipsip tonalubo dao. Tama te sę ebo bidi te sę silama, tama beba asobo si, nago agabolo ‘Naga nai polo tuao’ wabo dawe? Menio.

⁸Me ma, nago agabolo te po waibao, ‘Eno tubo nai nogeao. Nai nogeama, tama tubo nai mabo ugwa gulama, tama eno nai ena magasu, tau siyu, tiao. Tama nosali naga nai tuagameo,’ te po waibao.

⁹Te sę ebo bidi agai genuai bidigo nage te sę yao wabo po odoyu, te sę ebaso da, te genuai bidi agai nage usu da wabowe? Meni.

¹⁰Te dage dali yaligiama, ‘Te sę yao’ po olama, tama te sę dagego silibo si, te po wao, ‘Da da, sę ebo bage naga dao. Dabolo dage usu da po olamuo. Dago nogode muani sę naga dago yalio,’ te po wao,” Jisasgo te po wali.

¹¹Te Jisas te moni taun Jerusalemba pabo ma gagalama, te Samaria tǫ me, Galili tǫ me te bulu si tomo te dąįba pali.

¹²Tama aga dwasianu be nani tomoba pai hagede, te oiyabe gasi sai bidi nogo sigo aga sunumide suali. Tama te oiyabe gasi sai bage digibulu gana dolaluali.

¹³Tede dolalubadi, augwaligo i wali, “Jisas, Genuai Bidi, nago da homu dene eyu, da tau mao,” wali.

¹⁴Tama Jisasgo augwali sulama, tama agai augwalibolo te po wali, “Dage piąo, te pris bidi dabe pageba piąo. Te bageba pelama, duga tigi augwalibolo waseligi piąo,” te po wali. Tama odama, te oiyabe gasi sai bidi dabe pabo gagalali. Augwali pebelayu subadi, augwa tigi sese ma yali suali, tomode.

¹⁵Tama augwa tigi sese ma yali sulama, tama bidi me deli aga geasa pelama, i bomona wali, aga Godigo nogi ugwaba siyu, Jisas pageba ma asali.

¹⁶Tama Jisasgo sągą pagede aga kidu pogulama, nage usu da weyu, “Nage dwagi yai bidi mu dao,” wali. Te gasi meni yani, sese ma yali bidi da, te Samaria bulu bidi dao, Juda hani isąwai bidi.

¹⁷Te Jisas agai te we bidi dabebolo te po hanalu wali, “Eno te oiyabe gasi sai bage nogo si sese ma ilali. Tama te bidi me badu menadewe?