ሉቃሳ 17:1-17

¹ዬሱሲ ባሬና ካሊያዋንታ፥ «ኣሳ ባሌꬂያዌ ዬናን ኣቴና፤ ሺን ባሌꬂያዋ ኣሂያ ኡራው ኣው ኣዬ፤

²ሄ ቢታኒ ሃ ጉꬃቱዋፔ ኢቱዋ ባሌꬂያዋፔ፥ ጋጪያ ዎፃ ባሬ ቆꬊያን ቃሼቲዴ ኣባን ሚቴቲያዌ ኣው ሎዓ።

³ሂንቴ ሁጴው ናጌቲቴ። «ኔ ኢሻይ ኔና ናቆፔ፥ ኣ ዞራ። ቃሲ ናጋራፔ ኢ ሲሞፔ፥ ኣው ኣቶ ያጋ።

⁴ኢቲ ጋላሲ ኢ ኔና ላፑ ጌዴ ናቂዴ፥ ላፑ ጌዴካ፥ ‹ኔና ታ ናቃዲ፥ ታና ማራ› ጊዴ ኔኮ ዮፔ፥ ኣው ኣቶ ጋ» ያጌዳ።

⁵ኪቴቴዳዋንቱካ ጎዳ፥ «ኑሲ ኣማኑዋ ጉጃ» ያጊዴ ኦቼዲኖ።

⁶ጎዳይካ፥ «ሂንቴው ሳናፊጪያ ኣይፊያ ኬና ኣማኑ ዴዒንቶ፥ ሂንቴንቱ ሃ ቦዒያ፥ ‹ሃዋፔ ሾዴታዴ፥ ኣባን ቶኬታ› ጊንቶ ሂንቴው ኤኖ ጋና» ያጌዳ።

⁷ቃሲካ ዬሱሲ፥ «ሂንቴፔ ጎሺያዌ ዎይ ሚያ ሄሚያ ቆማይ ዴዒያ ኣሳይ ሃቄት ዴዖፔ፥ ጎሻ ጋዴፔ ዎይ ሚያ ጋዴፔ ሲሞ ዎዴ ኤሌካ፥ ‹ሃያ ሼምፓ ኣካ፥ ቁማ ማናው ኡታ› ያጊያዌ ኦኔ?

⁸ዬዉዋን ቃሲ፥ ‹ታ ማና ካዉዋ ጊጊሳ፤ ታ ማናኔ ኡሻና ጋካናው ሚናዴ ታና ኤቃዴ ሚዛ። ሄዋፔ ጉዬ ኔው ማ፥ ኡሻ› ያጊያዋ ጊዴኔ?

⁹ሄ ቆማይ ኪቴቴዳባ ኦꬄዳ ዲራው፥ ሄ ቢታኒ ጋላታናው ቤሴኔ?

¹⁰ሄዋዳንካ ሂንቴ ቃሲ ኣሳይ ሂንቴና ኪቶ ኦሱዋ ኦꬄዳ ዎዴ፥ ‹ኑኒ ማዴና ቆማቱዋ፤ ኑ ኦሶ ፃላላ ኦꬄዶ› ያጊቴ» ያጌዳ።

¹¹ዬሱሲ ዬሩሳላሜ ቢዴ፥ ጋሊላፔኔ ሳማሪያ ጊያ ጋዳቱዋፔ ጊዱዋና ኣꬌዳ።

¹²ኢ ኢቲ ጉꬃ ካታማቶ ጌሊያ ዎዲያን፥ ሃኩዋን ኤቄዳ ታሙ ኦሉዋን ኦይቄቴዳዋንቱ ኣ ቤዔዲኖ። ኡንቱንቱካ ሃኩዋን ኤቂዴ፥

¹³ባሬንቱ ኮሻ ꬎቁ ኡዲዴ፥ «ዬሱሳ፥ ጎዳው፥ ሃያ ጎዶ ኑና ፓꬃሪኪ!» ያጌዲኖ።

¹⁴ዬሱሲ ኡንቱንታ ቤዒዴ፥ «ቢዴ፥ ሂንቴንቱ ቦላ ቄሳቱዋ ቤሲቴ» ያጌዳ። ኡንቱንቱካ ቄሳቱዋኮ ቢዴዒዴ ኦሉዋፔ ፓፄዲኖ።

¹⁵ኡንቱንቱፔ ኢቱ ባሬ ሃርጊያፔ ፓፄዳዋ ቤዒዴ፥ ባሬ ኮሻ ꬎቁ ኡዲዴ፥ ፆሳ ቦንቺዴ ሲሜዳ።

¹⁶ጋላቲዴካ ዬሱሳ ጌዲያ ማታን ጉልባቴዳ። ሄ ቢታኒ ሳማሪያ ኣሳ።

¹⁷ዬሱሲ ዛሪዴ፥ «ታሙ ፓፂቤይኪኖ? ያቲና ኡዱፑናቱ ሃቃን ዴዒኖ?