Lukas 17:1-17

¹Muri e Isu i taki e huriki a muri­muri vona, i ta maea, “A maka nitoni na rabu hale bara ri bele. Pali a Vure bara i ratapile e huriki ri vaka­boru a viri.

²E rei a viri i vakaboru e huriki, bara i kamumu vona ni gi topi na lohona a kedo dagi, ni gi voro purua na utu, nahea ge vakaboru e huriki a bakovi tavula nga.

³I mavonga, mu matadoko! “Ioe bara o masia e turamu ge rata a naro hale mai ioe, o tahatea. Ia ge pulo a vilona, o lohopile a maki hale i rata virihi ioe vona.

⁴Ia ge rata hale ioe balaka polorua na parava i taku, pali ge hamule valai vomu balaka polorua, ge taki tala, o lohopile a naro hale vona.”

⁵Muri e huriki a apostolo ri takia e Bakovi Dagi, ri ta maea, “O vakatora a niluhoi ne mia!”

⁶Pali e Bakovi Dagi i koli i ta maea, “Mua bara mu tahoka a niluhoi kiroko i manga a vutuna mastad, bara mu takia a kai iea ge malipu rike, ge vano ge pesi na dari, lakea bara i longototo.

⁷“E rei tara ne mua i tahoka a vora i varo a maki na hania, o a vora i matakari a sipsip, pali na tahuna i hamule valai na ruma ge takia, ge ta maea, ‘O valai malaviriri, o made turagu tu gu kani.’

⁸“I uka. A hini bara o takia vona, bara o ta maea, ‘O hilolo, o gutu a maki ni kani nau, o bole valai, ga kani, ga ninu taro iau. Muri bara o kani o ninu ke.’

⁹Na tahuna a vora i muri mai a ngavana bakovi dagi vona, i uka ma ni gi kavurike.

¹⁰Pali mua ranga, na tahuna mu rata lobo a leho ni taki mua vona mu gu rata, a ngaru mu gu ta maea kunana, ‘Mia a vora kunana. I uka ma ni gi kavurike mia, a vuhuna mi rata kunana a leho ni habi ne mia mi gi ratea.’”

¹¹E Isu i tabana ni laho sike o Ierusalem. I laho polo na nagi ne Samaria e Galili.

¹²Na tahuna i laho dili na tanga tara, i matai a bakovi ala ravulu. Re huriki a bakovi nga, ri pesi basi, a vuhuna i tuvu ne ria a patala.

¹³Ri gale dagi ri ta maea, “Isu, ioe a Bakovi Dagi. O dodo mia!”

¹⁴Na tahuna i matai ria, i ta maea, “Mu vano mu vakasiri mua ne huriki a prister.” Na tahuna ri laho lokovonga i malaharuri ne ria a patala.

¹⁵A viri tara ne ria i masia i malaharuri vona patala, lakea i hamule i gale dagi i kavurikea a Vure.

¹⁶I tabuli puru tabukoi na vahane Isu, i kavurikea. Ra viri iea a bakovi o Samaria.

¹⁷Lakea e Isu i nanea, “A viri ala ravulu ri matapado. Pali a vai a viri ala polova?