Luke 17:1-17

¹Jedus tell e ciple dem say, “Fa true, ting gwine happen wa mek people do bad. Bot de poson wa mek dem ting happen gwine hab plenty trouble!

²E mo betta fa dat poson ef dey tie a big grine stone roun e neck an chunk um eenta de sea. E mo betta ef e drown een de wata like dat den ef e mek one ob dem leetle one do bad.

³So den, tek cyah wa ya do! “Ef one ob oona hab a broda wa da sin, ya mus buke um. Ef e change e sinful way, mus paadon um.

⁴Eben ef e do ya bad seben time een one day, ef e ton back ebry time, come tell ya say, ‘A saary an A ain gwine do ya bad no mo,’ mus paadon um.”

⁵Jedus postle dem tell um say, “Lawd, hep we bleebe God mo den we bleebe now.”

⁶De Lawd ansa um say, “Ef oona bleebe een God, eben ef ya fait jes leetle like one leeleetle mustard seed, ya kin tell dis tree, ‘Tek yasef outta de groun an go stanop an grow een de sea!’ Eben dough ya fait ain no bigga den de mustard seed, dat mulberry tree gwine pay ya mind. E gwine do wa ya say.”

⁷“Sposin one ob oona hab wokman wa da plow een de fiel or e da mind ya sheep. Wen de wokman come fom e wok, wa ya gwine tell um? Fa true, ya ain gwine tell um say, ‘Mus hurry op. Come seddown an nyam.’

⁸No! Fa sho ya gwine tell de wokman say, ‘Go cook me suppa. Git yasef ready an pit de food pon de table. Atta A done shru nyam an drink, den ya kin hab sompin fa nyam an drink.’

⁹De massa ain gwine praise de wokman jes cause dat wokman done wa e tell um fa do, ainty?

¹⁰Oona stan jes so. Wen oona done do all wa de massa tell oona fa do, oona mus say, ‘We jes wokman. We ain desaab no praise, cause we jes done wa we spose fa do.’ ”

¹¹Pon e way ta Jerusalem, Jedus gone long shru de arie tween Samaria an Galilee.

¹²Wen Jedus git close ta one settlement, e meet ten man wa been sick een dey skin wid leposy. Dem man beena stan faa way.

¹³Dey holla say, “Jedus! Massa! Hab mussy pon we!”

¹⁴Jedus shim an tell um say, “Oona go ta de Jew priest dem. Leh dem xamine oona.” Wiles dem man beena gwine fa see de priest, dey all been heal. Dey all clean an dey ain been sick no mo.

¹⁵Wen one ob dem see dat e done been heal, e come back ta Jedus. E holla, da praise God.

¹⁶E git down pon de groun een front ob Jedus foot an e tank um. An dat man been fom Samaria.

¹⁷Jedus say, “A done mek ten man clean, ainty? Weh de oda nine dem?