LUKA 17:1-17

¹Yesu kawalongela wanahina zake, “Mbuli ziwatendaga wanhu watende vilozo hazilekaga kulawilila, ila kojona ng'hani munhu ija yondayazitende zilawile!

²Vihamnogele munhu ija yafungigwe msingo dibwe kulu da kusiginhila, abaho, yakasigwe m'bahali kubanza kumtenda imwe wa wanhu wano wadodo kuloza.

³Avo teganyeni! “Kamba ndugu yako yahaloza, mkomhokele, yahaleka kuloza, mgele kumgongo.

⁴Kamba yahakutendela vilozo mianza saba mdizua dimwe, na mianza yose saba keza kumwako yolonga, ‘Nileka,’ mgele kumgongo.”

⁵Watumigwa wa Kilisto wamulongela Mndewa Yesu, “Tongezele nhamanila yetu.”

⁶Mndewa kawalongela, “Kamba muhawile na nhamanila ndodo kamba mbeyu ya haladali, muhadahile kuulongela mkuyu uno, ‘Ng'ozoka ukaihande m'bahali!’ Na uhawahulike.

⁷“Tulonge munhu imwe mmwanza wenu kana nyakadala wa kumulimila ama kumchungila ng'hondolo. Yahabwela kulawa kumgunda, komulongela nyakadala wake yatende hima yeze kuja mandia?

⁸Nokona si vivo! Ila komulongela, ‘Nhelekela mandia gangu hima, uisasale unisang'hanile mbaka niheshiliza kuja na kung'wa, kileka na gweye uje mandia gako.’

⁹Avo, komuheweza nyakadala ija avija viyagatendile gaja gayalagizwe?

¹⁰Vivija na mweye! Muhatenda kila kinhu kimulongeligwe mkitende, longeni, ‘Tweye twa nyakadala tulibule maliho, tutenda gaja gatulondigwe kutenda tu.’ ”

¹¹Yesu viyakalile yochola Yelusalemu, kabitila muimbaka ya isi za Samalia na Galilaya.

¹²Viyakalile yokwingila muna ikiwambo kimwe, wanhu longo dimwe wolumwa dikulu wamwizila, wema kutalitali,

¹³wenula dizwi wolonga, “Mndewa, Yesu, utonele bazi!”

¹⁴Yesu viyawawene kawalongela, “Gendeni ha iwakulu wa nhambiko wakawalole goya.” Viwakalile wochola mnzila wahona.

¹⁵Munhu imwe mmwanza wao viyonile kahona, kabwela, kenula dizwi yomuyenzi Mulungu.

¹⁶Kamfugamila mavindi Yesu na kumgwaa hewela. Na munhu ija kakala Msamalia.

¹⁷Ila Yesu kauza, “Hawakalile wanhu longo dimwe wahonyigwe? Wakwahi wayagwe tisa?