Ruk 17:1-17

¹Jisas oh orhe pinggit pisapat han ihirnong Gur mohnong dahenmur. Er nahatin da oh ti da ti da er nahatinmat apripat orhor gure tei ohri tarpama ihirnongsi apriprio. Ihirnongsi apriyahan ama apriya han gure ihapti ohe pe oh ruumsup oh guragure boknong hatipra ohoh ihan gur kamahara hinhinsi hat pati han bap gurmur.

²Ihama norhe nita brer ihsen hatin hat pati maihirnong er nang pinggitperhan ihir er hat sayahanoh ama er da pinggit pisa han go ama ohe pe oh ruumsan batbet datipramur. Go kwei gon tit gorhe manbi dah moh nang nadumama tom hru dahnong tahe napotperhan was hapurhanoh ama ohe batbet oh garpokmur. Ihirnong ma er da pinggi ohe batbet oh isipmur.

³Ihtin ohoh ihan gur ihirnong er nang pinggit pisapririm guragurnong da ongeng mat paptenmur. Gin tit mohnong dahenmur. Guragure taptem ihir tit er da hat ushanhe ohnong Mihat na saptimur por imtinmur. Imtiperhan oh ama er hat sapat da oh Noh er hat sapat sa daham ohe er hat ma sapat da oh mandahanoh gur it orhe er hat sapat danong oh na dahama eimat hanhan amar mandanmur.

⁴Ihir tit han tit gonong er nahapat komdapat apris gonong Noh gonong na inahahnengo daham noh da er hahmur naporhanoh go it yansi na mara eimat hanhan mar mandanmur. Mandatporhan oh susa it gorhornong er nahapat it apris gorhornong tap meng orhorwi napot napisapatin beshei dah hahhanoh go tit tit mat orhorwi it yansi na mar hanhan mar eimat amdat pisonmur pongopri.

⁵Jisas oh ameng oh potporhan orhe mengtei meng pot pisapti han ihir ohnong Hanipyaha. Nure gonong Ohwi inahatin hatin hanwa dahapti da oh gar hat pat ohoh ihan go isip mat napisonmur potpari.

⁶Potperhan Hanipyah oh Es. Gure Hanipyah oh inahatin hatin hanwa ma dahapti da oh mastet gwe gar hatin hat ma pati da ohsi orhor Gin mama irat gwe san go gorhap kakersi tapera sus tom sor hru tei ohom it tonggonom maronmur poriyahanhe guragure ma daham poriya meng orhor arpin dam tarpatiprohmur pongopri.

⁷Jisas oh ameng oh porpat Gin gur tit han tit gwe natamreipat han ohe meng oh dahatinmur. Gwe natamreipat han oh mong sur teidapatdo da imah papter teidapatdo apriporhan Go gin kapkap apris tongnom den dinmur potiprohda.

⁸Basra. Ohnong na gipotiprohmur. Gorhe natamreipat han ohoh ihan ohnong Norhe denri natemtinmur. Natemara mamen tahama norhe den oh kan mat natinmur. Kan mat napriso tom yohot napriso hapatin noh den damo tom damo hatiprohmur potiprohmur. Pora den damo tom damo hapat Ginra gorhe den dinmur potiprohmur.

⁹Papat han ohdapat orhe atamreipat han ohnong Han moh orhe da orhor apris tamreipatda ihan weso potiproh. Norhe mengtei tamreipat ohoh ihan noh weso na potiprohmur dahapatmur.

¹⁰Amaru hat orhor Hanipyah orhe meng dimar pomar ma atamrein saptinong oh orhe mengtei ihat tamrein sapti ohoh ihan wes ihat natamrein saptio na napotin inasi hat patim atamrein saptimur dahenmur pongopri.

¹¹Gahan Jisas oh Jerusarem apteinong saporim susa Samaria mongsi; Gariri mong ite mong en tei oh kora mong en mutuh oh pipari.

¹²Mong en mutuh oh susa tit aptei tit kora ama apteinong oh saper riptin ina mong mong moh tohohet saptisi kathei han ihir apris ina mong mong moh tohohet saptisi hano rim meihdapat orhor

¹³Jisas napapat han go nuhurnong kamahara naham yah nahatino por kasip mengtei pongopari.

¹⁴Potperhan Jisas oh ihirnong wamara Ei. Gur gure ina mong mong oh tohohet sapti oh gin yah hayado rim gur susa Got orhe ap yawar ohe hanat bok han ihirnong pinggitinmur pongopri. Potporhan ihir arpin amrama sangopari. Saptin orhor ire ina mong mong tohohet ma sapti oh timbas ham ama yah hatpa oh.

¹⁵Yah hapti wamar am hapti tit han oh pokwi Nohe bisei nahat napapat ina moh gin nayah dei ma hapat daham it aprisa kasip mengtei Weso por Got ohnong armi mat apingopri.

¹⁶Aprisa Jisas ohe duup oh bos hamnong mar timama Wes yah nahaho pongopri. Juda ihirsi mahaw ham tap hat na pati han Samaria ihir oh pokwi apris wes yah nahaho pongopri.

¹⁷Potporhan Jisas oh orhe han ihirnong Wa. Kathei han gonsi ihirnong ire ina mong mong moh tohohet saptisi ham bisei hat pati ina oh nohe ma ayah dei oh gin towathei han ihir apris nohnong weso na naporiyada.