Lucas 17:1-17

¹Jesús ie llófuegamacɨna daɨde: —Jaca nágarui comɨnɨ fɨénidɨfuemo baɨítafue íteza. Jɨáɨmana fɨénidɨfuemo baɨítatɨmɨe ¡nɨɨ dúerena!

²Trigo llaiéra áillue nofɨ́cɨna afémɨe cɨmoɨmo ɨ́coɨnota monáillaimo dotácana baɨmo ñuera; úrue izói como ɨ́ɨnotɨnomona dáamɨe fɨénidɨfuemo báɨitañelleza.

³Afe izóidemona abɨ́ omoɨ rairuiri. O ama omo fɨénidɨfue fɨnóadɨ, afémɨena lletari. Afemona afémɨe illafue ie méidoia, caɨmare íena uáidori.

⁴Mei dáaruido afémɨe siete dɨ́gacaiño o fɨeni fɨnóadɨ, íemo siete dɨ́gacaiño ona “Ja daɨí omo íñeitɨcue” afémɨe daɨízaɨbiadɨ, jaca nɨnomo íena caɨmare uáidoitɨo, —daɨde.

⁵Jesús orécano íaɨoɨ Ocuíraɨmana daɨde: —Jamánomo caɨ ɨ́ɨnotari, —daɨde.

⁶Mei jira afe Ocuíraɨma íaɨoɨna daɨde: —Due uáfuena o ɨ́ɨnoiadɨ rɨírede raana fɨnóredɨo. O ɨ́ɨnogafue dɨójɨna eroide mostaza íjɨaɨ jéenina izoide íadɨ, bie sicómoro daɨna aménana bie izói daɨíredɨo: “Caifo áijicaillano monáillajimo zójozai,” daɨdɨ́onia afe amena o uaina ɨ́ɨnoite.

⁷Omoɨmona daa cómemo ie táɨjɨtagamɨe íadɨ, afe táɨjɨtagamɨe jacáfaɨmona táɨjɨano meine bíadɨ ¿Meita “Mai ráɨizaɨbi, o écaitɨcue” dáɨitɨo?

⁸Daɨínide. Mei jɨáɨfodo afémɨena ñue dáɨitɨo: “Mai cue güille fɨnori. Güillano cue jirolle llezica nana cue jitailla raa dɨga baɨ atɨ́llena, mamériri. Afe méifomo güillano jíroitɨoza.”

⁹¿Meita nana afémɨemo ocuíllana fɨ́nuana ocuídɨmɨe íena “Fɨgora” daɨírede? Daɨíñede.

¹⁰Afe daje izói, nana Juzíñamui ómoɨmo ocuica omoɨ fɨ́nua fuilla mei, bie izói daɨíredɨomoɨ: “Ñue táɨjɨraɨmacɨñedɨcaɨ. ‘Ɨere fɨ́gomacɨ’ caɨna daɨínide. Mei danɨ caɨmo duide raa fɨnódɨcaɨza. Baɨmo jɨáɨe fɨnóñedɨcaɨ.”

¹¹Jesús Jerusalemo jailla llezica, Galilea énɨe fuédamo ite duera jófuemo dúcɨde. Afe jofue daje izói Samaria énɨe fuédamo ite.

¹²Afe jófuemo dúcɨacana llezica, diez dɨga chíinaitɨno jino baɨ Jesús dɨné bitíaɨoɨ. Mei íadɨ afémacɨ Jesúmona baɨ jɨca fɨébidiaɨoɨ.

¹³Afénomona rɨire íena daɨdíaɨoɨ: —Llófueraɨma Jesús, caɨmo dúecai, —daɨdíaɨoɨ.

¹⁴Jesús afémacɨna cɨ́oillano daɨde: —Batɨ́ lletáriraɨnɨmo omoɨ abɨ ácataji, —daɨde. Afénomo íaɨoɨ jailla llezica íaɨoɨmo ite duícuaɨ jacáibicaide.

¹⁵Iemo afémacɨmona dáamɨe ie abɨmo ite duico jacáillana cɨ́oillano, Jesús dɨné abɨdo bite. Billa llezica Juzíñamuimo rɨire cáɨmadote.

¹⁶Jesumo dúcɨillano afémɨe ana énɨemo fueco dɨné bɨ́jɨcaide, Jesuna fɨgora daɨíllena. Afe bie izói daɨdɨ́mɨe Samaria ímɨe.

¹⁷Jira Jesús daɨde: —¿Afe duícomona jíllotaga diez dɨ́gamɨeñede? ¿Néemei jɨáɨe nueve dɨ́gamɨe?