LUUKA 17:1-17

¹Dhali a’di ki o imanciḵ a’di gwo gwo mo ki: Mompalu gom miinthus ka jiŋ gana/ mini p̱u’du/ mo. Hili wayyi e a’di jin mina uni ip̱u’du/ mo be.

²A’di midi ’bor ki ’bor gana/ mo waḵka yo minu ’taki deḵ a’di m’bam piti mo dhali a’di minu biṯ mo e ḵumma/ yi’de/ mo jin mina a’di ’taki diki raḵ jan ’de/ ’peni uni gwansan is mo kun gwa’dan mo mmomii miinthus mo.

³Yip̱i ’kup̱ ’kup̱ ki is bum ki ’bore/ mo ma. Waḵka kam pini mii miinthus mo tani ḵucuri a’di ki gwo mo ma, dhali waḵki/ a’di ri’cki’da du is mo tani dhalki a’di miinthus piti ’pen mo.

⁴Dhali waḵki/ a’di mii miinthus ap̱o/ /e me’di pesu/ ka tee mo tani dhali a’di ki ṯu’k mo me’di pesu/ dhali o /e gwo mo ki: aha/ ri’ckina adu is mo tani /e mini mii dhal a’di miinthus piti ’pen mo be.

⁵Dhali uni gun dhunu ki she/ mo ki o Tap̱a gwo mo ki: Mari aman moŋgam gwo is bam is mo ma.

⁶Dhali Tap̱a ki o gwo mo ki: Waḵki/ um ta gi moŋgam gwo is mo me’d emen to jin miinuwa ’tash mo tani um mini mish o cwa yansan jin wana e ka ’kum’dii gwo mo ki: Dhalki a’di yu’du/ mo dhali dhalki a’di c̱udhu/ mo e yi’deŋ ḵumma/ mo dhali a’di midi ha um gwo e mo be.

⁷Mina ṯal ’deŋ kamu/ ’peni um, a’di jin ta gi c̱iŋkina/ jin goro’da ’cesh walla jin ur ḵa’bal mo mmo/o a’di gwo mo ki a’di p̱u’dki’d mo ’peni bwam bunto mo ki: Yayu/ ki jahanne/ mo dhali c̱a’ba ’cesha tharabeesa mowa?

⁸Walla mina a’di diki dhal gwo e i is mo mmo/o gwo mo ki: Thosonaa/ tonṯe/ mo ma dhali deḵi is pini ki burrinye/ mo dhali mii aha/ to mo ma, ntagi aha/ mina shwa to mo dhali p̱i to mo dhali yan’ko’d /e mini shwa to mo dhali p̱i to mo?

⁹A’di ’bori c̱iŋkinam piti bwa i is mo ’taa? haali/ a’di miiki to jin ḵankina a’di a’di gwo mo mmomii mo ’taa?

¹⁰Wakan um si’da/ ki um miiki to gwansani ’baar mo kun ḵankunu um mo tani oyi gwo mo ki: Am tana c̱iŋkina/ kun ’koki ha me’d mo. Aman miikina jasi a’din ’deŋ gana/ mo jin ta’da ṯu’c bam mo be.

¹¹E bway gi Pa Urushaliim mo tani a’di yaki’d e bway bampa/ gi bwaman gi Pan Saamira mo dhali Pany Jaliil mo be.

¹²Dhali ki a’di cic̱ki bampa/ mo tani a’di gamkina ’kwani kun ’kosha monthus ’kup̱ mo uni kun ’koni ’kume’d mo, uni kun doshkin isa dhana/ mo.

¹³Dhali uni ki ’de’k ’twam buni ki mis mo dhali o gwo mo ki: Yesus jin ta Tap̱a, miiyi mii ap̱o/ aman mo ma.

¹⁴Dhali ki a’di mishki uni mo tani a’di ki o uni gwo mo ki: Iiku/ mo ma, dhali ṯor is bum eya tente/ e igasiis mo. Dhali ki uni iikin mo tani uni dhelelkina is mo be.

¹⁵Dhali yan’ko’d jan ṯal ’deŋ kamu/ ’peni uni mo tani ki a’di p̱arki is piti e ki a’di wac̱u/ mo tani doḵki’d ka nyaŋ’ko’d mo mmomaŋa Arumgimis mo ki dhan ’twa/ jin caaca mo be.

¹⁶Dhali a’di ki biṯ bwam/em piti a’cesh mo e sho’k ma Yesus mo mmoc̱i a’di mom’bor bwa i is mo be. Hili a’di ta wathi/ gi Pan Saamira mo be.

¹⁷Yan’ko’d Yesus ki o a’di gwo mo ki: ’Kona uni ki ’ko ’kume’d uni kun dhelelkin mo ’taa? Mane uni gun ’koni pedoŋon mane?