1Chene che wyob lni ne la pask ne ru mén gyëtxtil ne nootsdet lebadur,
2rye yra fxuz ne rnebééy lo yra fxuz yra men maxter ley gan pezee yket men Jesus chen gyendeto, porke rdxe men mén.
3Lex wdee Bzelo lextoo Judas, men ne la ke Iscariote. Te ke men ne nak xpén Jesus chibtxup nak Judas.
4Wa Judas lo fxuz ne rnebééy lo yra fxuz no le lo men ne rnebééy lenxeydoo Dëdyuzh, re Judas gan pezee ydekwent Judas Jesus lo men yra men.
5Wzhiilen men ne won meno, lex re men ne ydee men med lo Judas;
6wna Judas, lex wzelo Judas wye Judas gan pezee ydekwent Judas Jesus lo men chene yët ndal mén.
7Chene wdxiin lni pask ne ru mén gyëtxtil ne nootsdet lebadur no ne rket men te mëkzhiil bëën bëënleg ne ru men lo pask,
8wxaal Jesus Bëd no le Xwa, re Ne lo men: ―Gutsa yzhexkwaa de ne guxsëë be lo lniree.
9Lex wnabdiiz men lo Ne, re men: ―¿Pazh rlaan de tsazhexkwaa noo we?
10Wke Ne re Ne: ―Chene tee de lenlgyëz, ytsëlo de te mén ne neey tebree nis. Tsanal de men axtegue ne ydxiin men ruyuu ledne tee men;
11lex gue de lo xpexwaan yuu guin: “Zere na Maxter, ¿go lenyuuzhe guxsëë Maxter lo pask yra Maxter xpén Maxter?”
12Lex yluu men te lenyunzhen ne nak pisgya lo de, che xnëz nak leeno; nga yzhexkwaa de ne guxsëë be.
13Wa yrup mén guin, no yrandxee ne re Ne lo men, wako. Lex wzhexkwaa men ne guxsëë Ne lo pask yra Ne men.
14Chene wdxiin or ne guxsëë Ne, wzob Ne lo mezh yra Ne xpoxter Ne.
15Lex re Ne lo men: ―¡Che penaadese rlaan noo gu noo xsëëree yra noo de lo pask, antes ne guet noo!
16Porke yna noo lo de yra de ne ybereedetre noo guxsëë noo lo pask axtegue ne gak pask zegne ryal gako ledne rnebééy Dëdyuzh.
17Zhich guin wgoob Ne bas ne nuu bin, wdee Ne dexkyizhtee lo Dëdyuzh, lex re Ne: ―Gunëëz neree, gugoo we tebruugue tebruugoo te te de.
18Porke yna noo lo de yra de ne goodetre noo bin ub axtegue ne gak yrandxee ne rkyeen Dëdyuzh.
19Zhich guin wgoob Ne gyëtxtil, wdee Ne dexkyizhtee lo Dëdyuzh, lex wla No wdee No lo men yra men chen gu meno, re Ne: ―Che nan de zeree ke ylaa de chen ynileedx de noo, porke laa neree nak xkwerp noo ne ydekwent noo ne guet por laa de yra de.
20Zenga ke wlaa Ne bas ne nuu bin chene wluzh wuxsëë Ne yra Ne men, lex re Ne: ―Laa binree nak xren noo ne yzhe chene guet noo por laa de yra de, chen gyal te nëzkweb ne gak ydxiin mén lo Dëdyuzh.
21’Per orree le men ne ydekwent noo zob lo mezh ledne zob ke noo.
22Men ne wdxiid wak Mén rap men degne sak men ne che zëëd men ne sak men; per ¡prob mén ne ydekwent men!
23Orguin wzelo men rnabdizlsaa men gan txu nak ne ydekwent Jesus.
24Zhich guin wzelo yra xpén Jesus rdildizlsaa men gan txu men nak men ne mazre nondee lad men yra men.
25Per re Ne lo men yra men: ―Yra rrey ne nuu gyëzlyu, rnebééy men lo menlaz men zegne rlaantee men. Le yra men ne rnebééy, rnii mén men “men ne rlaa ne wen”.
26Per le laa de yra de ylaadet de zenga. Sinke mén ne mazre nondee lad de yra de, rap men degne gak men zegnak te mén ne beeytee non; le men ne rnebééy lo de yra de, rap men degne gak men lo de zegnak men ne rlaa dxiin.
27¿Txu nak men ne mazre nondee, men ne rzob lo mezh ru u men ne rdxiib nesyaa lo mezh? ¿Pe let men ne zob lo mezh, men guin nak ne nondee? Per noo, nak noo lo de yra de zegnak men ne rdxiib nesyaa lo mezh.
28’Laa de yra de nak ne zulel kon noo lo yrandxee ne kazak noo.
29Por neguin noo yseleedx ne laa de ynebééy zegne wseleedx Xuz noo we lo noo.
30Laa de yra de nak ne sob lo xmezh noo, gu de, goo de ledne rnebééy noo, no sob de lo yagzhil chen ylaa de gyelextis lo yrandxee men ne zëëd xnëz yra chibtxup xpee Israel.
31No re Jesus lo Simon-Bëd: ―Simon, Simon, gukwii gante, le Bzelo wnab de yra de chen ylaa men de zegne rlaa mén chene rbib men zhobxtil;
32per le noo che wnab lo Dëdyuzh por laa de chen ysalzaandet de ne rlaleedx de noo. Per chene che wberee de lo noo ste, guu de lextoo xkompanyer de chen ysalzaandet men ne rlaleedx men noo.
33Lex re Simon lo Ne: ―Dechey, ysalzaandet noo de, por noo nyaalzhe tsuu noo chegyiib yrup noo de no nyaalzhe axtegue guet noo yrup noo de.
34Orguin wke Ne re Ne: ―Bëd, yna noo lo de ne negyëëlkeree, antes ne ykarëz ngyedgol, che wyon tir wkedxnruu de ne rnebeey de noo.
35Zhich guin wnabdiiz Jesus lo men yra men, re Ne: ―Chene wxaal noo de yra de sin bols, sin med, sin gyël, ¿pe nuu ne wak falt lo de? Wke men re men: ―Bettee.
36Lex re Ne lo men: ―Orrenaa, log mén ne rap bols, gweey meno no sen men med; log mén ne yëten spad, ytoo men lër ne rrël men, yka men tebo.
37Porke yna noo lo de yra de ne rap noo degne sak noo ne zëëd lo xgyiich Dëdyuzh ledne re: “Wun mén men kwent lad menmal.” Per yrandxee ne ka lo xgyiich Dëdyuzh ne sak noo, rapo degne gako.
38Orguin re men lo Ne: ―Dechey, nee neey noo txup spad. Wke Ne re Ne: ―Negwaguestee.
39Zhich guin wruu Jesus, za Ne gyey-Olivos zegnak xkoxtumber Ne. Lex zanal yra xpén Ne Ne.
40Chene wdxiin Ne nga, re Ne lo yra xpén Ne: ―Gunab lo Dëdyuzh, chen ysegyeedet Bzelo lextoo de.
41Orguin wrunsu Ne lo men yra men, wa Ne zeg medid ne rtxoon mén te gye. Lex wzuzhib Ne nga, wnab Ne lo Dëdyuzh.
42Re Ne: ―Dëde, belne yna de, guselaa noo lo gyelenlesree; per gakdet zegne rlaan noo, sinke zegne rlaan de.
43Orguin wlalo te angel ne wruu gyeybaa, wdee angel fwers lo Ne.
44Per por tant nles nuu lextoo Ne, mazre rnab Ne lo Dëdyuzh ydebxfwers Ne, no axtegue lyu ryab nis ne rzenisen Ne; nak nis guin zegnak tebgyese tebgyese ren.
45Chene wzuli Ne ne wluzh wnab Ne lo Dëdyuzh, wa Ne ledne ndxin xpén Ne. Wdxiin Ne, le men ndxinguees, tant nles nuu lextoo men.
46Lex re Ne lo men: ―¿Penak ndxinguees de? Gutsaxee, gunab lo Dëdyuzh, chen ysegyeedet Bzelo lextoo de.
47Benak kanii Jesus chene wdxiin ndalyaa mén. Men ne la Judas te ke men ne nak xpén Ne chibtxup zaner lo men yra men, lex wbig Judas lo Ne, woo Judas te bzhid gyedkwes Ne.
48Lex re Ne lo Judas: ―Judas, ¿pe kon te bzhid ydekwent de Men ne wdxiid wak Mén?
49Chene wii yra men ne ndxinno Ne neguin ne kayak, re men lo Ne: ―Dechey, ¿pe skyits noo spad?
50Orguin wkyits te men guin xespad men gyedyagbëë xmos fxuz ne mazre nondee, wtxugnëz meno.
51Per re Ne lo men: ―Zeka men; che we naa. Lex wtee nya Ne gyedyag mén guin, wkyeed ke No zegnako.
52Zhich guin re Ne lo yra fxuz ne rnebééy lo yra fxuz no le lo men ne rnebééy lo men ne rapkwent xeydoo Dëdyuzh no le lo men ne rnebééy lo men-Israel ne zaxii Ne: ―¿Penak zëëd de zëdnëëz de noo kon spad, kon yag, zeg teleg ngbaan nak noo?
53No yzaandxee dxe wzu noo lenxeydoo Dëdyuzh, wnëëzdet de noo; per laa xor de nee yra de ne gun Bzelo gan ynebééy Bzelo lo de.
54Orguin wnëëz men Jesus yra men, lex wano men Ne ruxyuu fxuz ne mazre nondee. Le Bëd zanal Ne nat nat.
55Nga wzuul mén gyi gwrooltee lo leey, lex wzob men kbii gyi, no Bëd wa wzob lad men yra men.
56Chene wii te wnaa ne rlaa dxiin nga ne zob Bëd lo gyi, rwii men lo Bëd, lex re men: ―No ménree nak xpén Jesus.
57Per wkedxnruu Bëd, re Bëd: ―Wnaae, axtegue rnebeeydet noo mén gwa.
58Orsegue wako, wii men ste men ne zob Bëd, lex re men lo Bëd: ―¿No de nak te xpén men gwa ye? Wke Bëd, re Bëd: ―Let nodet noo.
59Wako zeg ste or, re men ste men: ―Nlipee ne no ménree nak te xpén Jesus, porke no men nak men-Galilea.
60Lex re Bëd lo men: ―Nandet noo gan pe rnii de. Orke guin ne benak kanii Bëd, wkarëz te ngyedgol.
61Lex wcheree lo Jesus wii Ne lo Bëd. Orguin wnileedx Bëd ne re Ne lo Bëd: “Negyëëlkeree, antes ne ykarëz ngyedgol, che wyon tir wkedxnruu de ne rnebeey de noo.”
62Lex wruu Bëd nga; baanske woon Bëd.
63Yra mén ne ndxinnap Jesus, wzelo men rzhidxno men Ne no wdee men xkwent Ne.
64Wtsëë men bzalo Ne no rdee men xkwent Ne, lex re men lo Ne: ―¿Txu rniiz xkwent de gan?
65No ndalre ne wninyaan men lo Ne.
66Chene wyenii lyu, wdop yra men ne rnebééy lo men-Israel yra men maxter ley no le yra men fxuz ne rnebééy lo yra fxuz, lex wano men Jesus lo xtis-Israel. Nga wnabdiiz men lo Ne, re men:
67―Guzëët gan pe laa de nak Crist. Wke Ne re Ne: ―Belne yna noo ne noo ne, ylaleedxdet de noo.
68No belne ynabdiiz noo lo de yra de, ykedet de, ni yselaadetzeg de noo.
69Per desde orree sob Men ne wdxiid wak Mén koo Dëdyuzhnzoon ladbëë.
70Orguin re men lo Ne: ―¿Laa de nak XPee Dëdyuzh cheguin? Wke Ne re Ne: ―Zegwa we zeg na de. Noo ne.
71Orguin re men: ―Pe ylar be testig si laa be nak ne won diizree ne na ménree.
