1Cheguin ke wa tebëd mén lo Jesus, wuu men diiz ne wket Pilato tebëd men-Galilea. Lex wgoots Pilato xren men yra we xren maa ne wseleedx yra mén guin por Dëdyuzh.
2Lex re Jesus lo men: ―¿Pe nuu lextoo de ne por ne ntozdee zeeb mén guin dol ke lo yra men-Galilea, neguin wzak men zenga?
3Yna noo lo de yra de ne let zengadeto. Belne laa de ne ysaandet de xgyelmal de, laake zenga ke sak de.
4¿U nuu lextoo de ne chene wet chimtson men-Jerusalén ne watxee torre ne zob ledne la Siloé led, ntozdee zeeb men dol ke lo yra men ne nuu Jerusalén?
5Yna noo lo de yra de ne let zengadeto. Belne laa de ne ysaandet de xgyelmal de, laake zenga ke sak de.
6Lex wuu Jesus zegnak te kwent lo men, re Ne: ―Rap te mgyeey tebzhaan yag-ig lo xelyu men ledne rap men blag ub, lex wa men wii gan pe ka ig lo we, per bet ig wzëldet.
7Lex re men lo men ne rapkwent lyu guin: “Gukwii gante, che wyon iz zëëd noo zëdye noo ig lo yagree, per bet ig rzëldet lo we. Gutxuugo, porke noze rlanxii we lo lyu.”
8Wke mén guin ne rapkwent lyu guin, re men: “Dechey, zeguezobleso ste izree, ne yseyul noo yu zhiino, lex guu noo beebo.
9Pazer skaa nex lo we. Belne ykaadet nex lo we, lex ytxuug bo.”
10Te dxe ne rne men-Israel, kaneluu Jesus mén leen te ydoo.
11Nga zob te wnaa ne che wzaa chimtson iz rzhuun. Laa te menzab nak ne wsanmëg men, axtegue rakdetlel gaknli men.
12Chene wii Jesus men, wbëz Ne men, lex re Ne lo men: ―Wnaae, che wbëz gyelgyiz gwa ne rzak de.
13Lex wxob nya Ne led men; orgueguin waknli men. Wzelo men rzaknon men Dëdyuzh.
14Per kesentyent wlayaa mén ne rnebééy lenydoo guin por ne wneseyaken Ne wnaa guin dxe ne rne men-Israel, lex re men lo yra mén: ―Xuup dxe ne rak dxiin nuu; dxe guin gutaa gak de rmed, chiidet de dxe ne rne be.
15Lex wke Ne re Ne: ―¡Gugannaa laa de wen! ¿Pe rchildet de xyuz de u xbur de dxe ne rne be chen tsano de ma gonis?
16Le wnaaree naa ne zëëd xnëz Abraham ne che wzaa chimtson iz rlaa Bzelo ne rzhuun men, ¿peguin nuudet gyaken men dxe ne rne be?
17Chene re Ne zenga, wtuunen yra mén ne rlaa lo Ne. Per le yra mén rzhiilen men ne rwii men yra ne nzoon ne rlaa Ne.
18No re Jesus: ―¿Pagox rzaglo ne rkyeen Dëdyuzh? ¿Pagox ynesaglo noo we?
19Rzaglo we te medx lyagwlizh ne rlabni te mén lo xelyu men. Rroo we axtegue rako zegnak tebzhaan yag, ra mgyin rzhexkwaa ma xeftxëës ma zhuuko.
20Lex re Jesus ste: ―¿Pagox ynesaglo noo ne rkyeen Dëdyuzh?
21Rzaglo we lebadur ne rgoots te wnaa tson medid rin chen ynesegyi we yrandxee ngob.
22Chene za Jesus Jerusalén, rneluu Ne mén yra gyëzwin gyëznzhootee ne rdee Ne.
23Lex wnabdiiz te mén lo Ne, re men: ―Dechey, ¿pe zhindxee mén yláá lo dol? Wke Ne re Ne:
24―Guye gan pezee tee de nes ruyaglanzun; porke yna noo lo de ne ndalyaa mén ylaan tee, per gakdet tee men.
25Chene le mén ne nako xyuu che waxee wtsëë yuu, yra de belne wyan de fwer, ykanya de txuyaglaa; lex gue de: “Dechey, guxal yuu tee noo.” Per yke men, yna men lo de: “Nandet noo txu ménzhe de.”
26Lex selo de gue de lo men: “Wu noo, woo noo yra noo de, no wneluu de noo ledne nak ruxnëz noo.”
27Per yke men, yna men lo de: “Che na noo lo de ne nandet noo txu ménzhe de. Gubetxee lo noo, mendol.”
28Nga goon de axtegue guleey de ne kwii de le Abraham, le Isaac, le Jacob, no le yra profet nuu ledne rnebééy Dëdyuzh, le laa de wyan fwer.
29Porke sdxiin mén ne nuu ydendxee gyëzlyu sob men gu men ledne rnebééy Dëdyuzh.
30No ndal men ne nak men lultim naaree, gak men primer; no ndal ke men ne nak men primer, gak men lultim.
31Dxe ke guin wdxiin tebëd men ne nak farisew, re men lo Jesus: ―Guruu nee, gugya, porke le Herodes rlaan yket de.
32Wke Ne re Ne lo men: ―Gutsa gue de lo mëëzro nak Herodes: “Nedxeree no le yzhe koo noo menzab lextoo mén no yneseyaken noo mengyiz; wiz gyal noo.”
33Per rap noo degne tsa noo ledne ryal tsa noo nedxeree, yzhe lee no le wiz, porke nuudet guet te profet ste gyëz belne nakdeto gyëz-Jerusalén.
34’¡Men-Jerusalén, men-Jerusalén, ne rket profet no ne rgugye men ne wxaal Dëdyuzh lad de yra de! ¡Blazhtee tir wlaan noo ntop noo de yra de zegne rtop ngyed zhiin ngyed rguu ma ma lenxpaan maa, per nadet de!
35Por neguin noze nles gyan laz de; no yna noo lo de yra de, ne kwiidetre de noo axtegue ne ydxiin dxe ne gue de: “¡Dëdyuzh gaknonen men ne zëëd por la Dëdyuzh!”
