Yuba 12

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Yuba yi a yabi, a naxa,

²“Ɲɔndin na a ra, muxuyaan kolonna birin ɛ yi, fekolonna ɲanma nɛn ɛ faxa xanbini.

³Koni, xaxilimayana nde n fan yi, alo ɛ tan, ɛ mi dangu n na, nayi nde mi nɔɛ feni itoe birin kolonɲɛ?

⁴N bata findi magele seen na n xɔyine xa, n tan naxan yi Ala maxandima, a yi n yabi. Muxu tinxinxi kamalixin bata findi magele seen na.

⁵Ɛ tan, muxu hɛrixine tɔrɔ muxune raɲaxuxi, na luxi nɛn alo muxun na salaxun, ɛ mɔn yi a radinɲɛ ayi.

⁶Bɔɲɛ xunbenla mafu tiine konne yi, naxanye Ala rafenma, ne makantanni, e e yɛtɛ sɛnbɛn nan yatɛxi e gbee ala ra.”

⁷“Koni, subene maxɔdin, e i xaranɲɛ nɛn. Xɔline maxɔdin kore xɔnna ma, e a falɛ i xa nɛn.

⁸Falan ti bɔxɔn na, a i xaranɲɛ nɛn, yɛxɛne baani, e a falɛ i xa nɛn.

⁹Ne birin yɛ, nde mi a kolon fa fala naxan birin daxi, a Alatala wanla nan na a ra?

¹⁰Dali seene birin niine a tan nan yii, e nun yengin naxan muxune birin yi.

¹¹Tunla falane tagi rabaan kolon, alo dɛɛn donseen ɲaxunna kolonma kii naxan yi.

¹²Fekolonna fama foriyaan nan xɔn, xaxilimayaan fama simaya xunkuyen nan xɔn.”

¹³“Koni Ala nan gbee fekolonna nun sɛnbɛn na. Maxadin nun xaxilimayana a tan nan yii.

¹⁴Ala na naxan kala, muxu yo mi na yitɔnɲɛ, a na naxan sa kasoon na, muxu yo mi na xɔrɔyɛ.

¹⁵Xa a mi tin tulen xa fa, furun yi ti, koni a na tulen beɲin, bɔxɔn yi kala.

¹⁶Sɛnbɛn nun kolonna a tan nan yi, yanfantenne nun muxu yanfaxine birin a tan nan bun.

¹⁷A tan nan a ligama yamaan kawandi muxune yi sigan ti e san yigenla ra, a yi kitisane findi daxune ra.

¹⁸A tan nan mangane sɛnbɛn bama e ra, a yi kasorasa dugin nagodo e ma.

¹⁹A tan nan saraxaraline fan nasigama e san yigenla ra, a yi nɔya kɛndɛne kala.

²⁰A tan nan falan bama fala tiine yi, a yi xaxilimayaan ba fonne yi.

²¹A tan nan tɔrɔn nafama kuntigine ma, a yi sɛnbɛmane sɛnbɛn kala.

²²A tan nan dimi yi feene raminin kɛnɛnni, naxanye yi laxira yi, a yi ne makɛnɛn.

²³A tan nan siyane rawuyama ayi, a yi e raxɔri. A siyane ragbo ayi, a yi e raxuya ayi.

²⁴A xaxinla ba yamaan kuntigine ma, a yi e rabeɲin tonbonni kira mi dɛnaxan yi.

²⁵E lu dimini kɛnɛn mi dɛnaxan yi, a yi e xun magi e ra alo dɔlɔ minna.”