IOBU 12

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Bena Iobu na e haere, eto:

²Momokani, umui na herea; ba mase negana ai aonega baine ore.

³A lau danu mai aonegagu, umui heḡereḡeremui, umui ese asio hereagumu. Ini ḡau daika asi dibana?

⁴Turagu ese e kirikirilaigumu; lau, Dirava na boi henia bena e haere henigu tauna, lau, kara maoromaoro bona asi egu kerere tauna, e kirikirilaigumu.

⁵E noho ḡoeva-daemu tauna lalona ese e hekwakwanaimu tauna na e dadaraiamu; to hekwakwanai vada e heḡaeḡaemu, aedia e dedimu taudia ediai.

⁶Dadidadi taudia edia kalaga na mai mainodia, bona Dirava e habaduamu taudia na e noho namonamomu; e tomu edia dirava na imadia ai.

⁷A uda boromadia ba nanadaidia, bena bae hadibamu; atai manudia danu, bena bae hamaoromu;

⁸eiava tanobada avadia, bena bae hadibamu; bona davara gwarumedia, bena bae herevalai henimu.

⁹Idia iboudiai bogaragidiai daika asi dibana Iehova imana ese ina kara vada e karaia?

¹⁰Mauri ḡaudia iboudiai edia mauri na ia imana ai, bona taunimanima iboudiai laḡadia danu.

¹¹Taia ese hereva e mamidia tohomu, udu ese aniani e mamidia tohomu na heto, ani?

¹²Aonega na taunimanima burukadia ediai, bona dina momo ese lalo-parara e havaraiamu.

¹³Aonega bona siahu na Dirava enai; hahealo bona lalo-parara danu ia enai.

¹⁴Bema ia ese ruma baine ḡiḡia dobi, ta ese basine haginia lou diba; bema ia ese tau ta baine koua ahu, ta ese basine kehoa diba.

¹⁵Bema ia ese sinavai lanudia baine laodia ahu, vada bae kororo; a bema ha-arudia lao, bena tanobada bae habubunidia.

¹⁶Goada bona aonega na ienai; koikoi tauna bona ia e koia tauna na iena.

¹⁷Hahealo taudia na ia ese ḡaḡaedia mo e hakaudia ohomu; hahemaoro taudia na ia ese e hakavakavadiamu.

¹⁸Hanua pavapavadia na e ruhadia negemu, bona riorio dabuadia e hariolaidiamu.

¹⁹Hahelaḡa taudia na ia ese ḡaḡaedia mo e hakaudia ohomu; bona siahu taudia na e hamorudiamu.

²⁰Taunimanima ese e abidadama henidiamu taudia ududia na ia ese e hakapudiamu; bona tau-badadia edia lalo-parara na ia ese e abia ohomu.

²¹Lohia taudia na ia ese e ḡonaḡonalaidiamu; bona goada taudia na edia gaba gavadia e ruhadiamu.

²²Dobu gabudia na dibura lalona amo e kehodiamu, bona dibura masemase gabudia na e hadiaridiamu.

²³Tanobada besedia na e habadadiamu, bona e habuadia tarimu; e hahutumadiamu, bona e hakaudia ohomu.

²⁴Tanobada besedia lohiadia edia amo lalo-parara e abia ohomu; e siaidia laomu, tano gagaena ai bae loa kava loa kava.

²⁵Dibura ai e hedarahumu, asi edia diari; ia ese e hararagadiamu, kekero tauna na heto.